Endla Leswaku Tihlo Ra Wena Ri Tshama Ri Ri Rinene

1. Swi vula yini ku va ni tihlo lerinene, naswona ha yini swi ri swa nkoka?

¹ Eka Dyondzo yakwe ya le Ntshaveni, Yesu u kombise ndlela leyi tihlo ra moya ri nga vaka ni nkucetelo lowukulu ha yona evuton’wini bya hina hinkwabyo. U te: “Kutani, loko tihlo ra wena ri olova, miri wa wena hinkwawo wu ta vangama; kambe loko tihlo ra wena ri hombolokile, miri wa wena hinkwawo wu ta va ni munyama.” (Mat. 6:22, 23) Tihlo ro olova kumbe lerinene hi leri langutaka eka nchumu wun’we ntsena—ku nga ku endla ku rhandza ka Xikwembu—ri nga kavanyetiwi hi ku vilela swi nga fanelanga hikwalaho ka swilo leswi vonakaka. (Mat. 6:19-21, 24-33) Xana i yini lexi nga hi pfunaka leswaku tihlo ra hina ri tshama ri ri rinene?

2. Hi rihi langutelo leri Rito ra Xikwembu ri hi khutazaka ku va na rona hi swilo leswi vonakaka?

² Ku Hlakulela Ku Eneriseka: Ku va munhu a khathalela swilaveko swa ndyangu wa yena kahle i vutihlamuleri lebyi humaka eMatsalweni. (1 Tim. 5:8) Kambe vutihlamuleri lebyi a byi lavi leswaku hi hlongorisa swilo swo durha swa fexeni. (Swiv. 27:20; 30:8, 9) Ku ri na sweswo, Matsalwa ma hi tsundzuxa leswaku hi eneriseka hi “swakudya ni swifunengeto,” ku nga swona swi lavekaka evuton’wini. (1 Tim. 6:8; Hev. 13:5, 6) Loko hi yingisa ndzayo leyi yi ta hi pfuna leswaku tihlo ra hina ri tshama ri ri rinene.

3. I yini lexi nga hi pfunaka ku papalata ku titikisela?

³ I vutlhari ku papalata ku titikisela hi swikweleti ni hi rifuwo kumbe ku hlongorisa swilo leswi hi dyelaka nkarhi nileswaku hi tshama hi ri karhi hi anakanya hi swona. (1 Tim. 6:9, 10) Xana hi nga swi papalatisa ku yini? Loko u anakanya hi ku endla swo karhi, rhanga u khongela ha swona kutani u kambisisa loko swi ta ku kavanyeta leswaku u nga ha vi na wona nkarhi wa timhaka ta swa moya. Tiyimisele ku rhangisa timhaka ta moya evuton’wini bya wena.—Filp. 1:10; 4:6, 7.

4. Ha yini hi fanele hi lava tindlela to hanya vutomi byo olova?

⁴ Olovisa Vutomi Bya Wena: Xin’wana lexi nga hi pfunaka leswaku hi papalata ku yengiwa hi swilo leswi vonakaka i ku lava tindlela to hanya vutomi byo olova. Makwerhu un’wana loyi a swi lemukeke leswaku ndyangu wakwe wu nga swi kota ku hanya wu nga ri na swilo swo tala, u te: “Sweswi se ndzi nga kota ku endla swo tala evandlheni leswaku ndzi pfuna vamakwerhu. Ndza tiyiseka leswaku Yehovha u katekisa malandza yakwe hinkwawo loko ma rhangisa vugandzeri bya ntiyiso evuton’wini bya wona.” Xana u nga kuma mikateko yo tala loko u olovisa ndlela leyi u hanyaka ha yona?

5. Ha yini ku laveka leswaku hi tshama hi ri karhi hi endla matshalatshala leswaku hi hlayisa tihlo ra hina ri ri rinene?

⁵ Ku laveka leswaku hi tshama hi ri karhi hi endla matshalatshala yo papalata nkucetelo wa Sathana ni misava yakwe leyi hlongorisaka swilo leswi vonakaka ni wa nyama ya hina leyi nga hetisekangiki. Ematshan’weni yo pfumelela mahlo ya hina ma pembela, a hi ma kongomiseni eku endleni ku rhandza ka Xikwembu ni le ka ntshembo wa hina wa risima wa vutomi lebyi nga heriki.—Swiv. 4:25; 2 Kor. 4:18.