Swivangelo Swa 12 Leswi Hi Endlaka Hi Chumayela

Ha yini hi chumayela hi tlhela hi dyondzisa vanhu mahungu lamanene? Xana hi endla tano hi leswi hi lavaka ku pfuna vanhu va timbilu letinene leswaku va famba egondzweni leri yisaka evuton’wini? (Mat. 7:14) Lexi i xivangelo xo sungula eka leswi xaxametiweke laha hansi, kambe a hi xona xivangelo-nkulu. Eka swivangelo swa 12 leswi landzelaka, hi xihi lexi u vonaka onge i xa nkoka swinene?

1. I ku ponisa vutomi bya vanhu.—Yoh. 17:3.

2. I ku lemukisa vanhu vo homboloka.—Ezek. 3:18, 19.

3. I ku hoxa xandla eku hetisiseni ka vuprofeta bya Bibele.—Mat. 24:14.

4. I ku kombisa vululami bya Xikwembu. A ku na xihehlo lexi Yehovha a nga hehliwaka ha xona xa leswaku u lovise vanhu vo homboloka handle ko va nyika nkarhi wa leswaku va hundzuka.—Mint. 17:30, 31; 1 Tim. 2:3, 4.

5. I ku hi pfuna ku hetisisa xitshembiso xa hina xo pfuna vanhu hi tlhelo ra moya hikwalaho ka ngati ya Yesu.—Rhom. 1:14, 15.

6. Swi hi endla hi nga vi ni nandzu wa ngati.—Mint. 20:26, 27.

7. I xilaveko xa leswaku hi kota ku ponisiwa.—Ezek. 3:19; Rhom. 10:9, 10.

8. Hi kombisa leswaku hi rhandza vaakelani va hina.—Mat. 22:39.

9. Hi kombisa leswaku hi yingisa Yehovha ni N’wana wakwe.—Mat. 28:19, 20.

10. I xiphemu xa vugandzeri bya hina.—Hev. 13:15.

11. Swi komba leswaku hi rhandza Xikwembu.—1 Yoh. 5:3.

12. I ku hoxa xandla eku kwetsimisiweni ka vito ra Yehovha.—Esa. 43:10-12; Mat. 6:9.

Entiyisweni leswi a hi swona ntsena swivangelo leswi endlaka hi ya ensin’wini. Hi xikombiso, ku chumayela swi tiyisa ripfumelo ra hina nakambe swi endla leswaku hi va vatirhi-kulobye ni Xikwembu. (1 Kor. 3:9) Hambiswiritano, xivangelo-nkulu xo chumayela i xa vu-12. Ku nga khathariseki leswaku vanhu va hi yingisa kumbe a va hi yingisi, loko hi chumayela hi va hi ri eku kwetsimiseni ka vito ra Xikwembu naswona sweswo swi endla leswaku Yehovha a kota ku hlamula loyi a n’wi tlhontlhaka. (Swiv. 27:11) Hakunene hi ni xivangelo lexinene xo ‘hambeta hi nga rhuteli ku dyondzisa ni ku vula mahungu lamanene.’—Mint. 5:42.