Swingheniso Leswi Hi Nga Swi Tirhisaka

Ku Sungula Tidyondzo Ta Bibele Hi Mugqivela Wo Sungula Wa July

“Vanhu vo tala endhawini ya ka hina va tsakela ku hanya vutomi byo leha lebyi tsakisaka. Hi tsakela ku twa vonelo ra wena eka xivutiso lexi: U anakanya leswaku sayense ni mirhi swi nga hi pfuna leswaku hi hanya hilaha ku nga heriki siku rin’wana? [Yimela nhlamulo.] Xiya leswi magazini lowu wu swi vulaka.” N’wi kombe xifunengeto xa le ndzhaku eka Xihondzo xo Rindza xa July 1 kutani u hlaya na yena rungula leri nga ehansi ka xivutiso xo sungula ni tsalwa rin’we leri kombisiweke. N’wi nyike magazini kutani u hlela ku tlhela u vuya leswaku mi ta bula hi xivutiso lexi landzelaka.

Xiya: Nkombiso wa xingheniso lexi wu fanele wu endliwa hi nkarhi wa nhlangano wa nsimu hi July 6.

Xihondzo xo Rindza July 1

“Vanhu vo tala lava hi vulavulaka na vona va ni vukhongeri bya vona. Kambe van’wana va vula leswaku a va byi tshembi vukhongeri hinkwabyo. Wena u titwa njhani hi vukhongeri? [Yimela nhlamulo] Yesu u hi nyika milawu leyi hi pfunaka loko hi lava ku hlawula vukhongeri. [Hlaya Luka 6:44a.] Magazini lowu wu vulavula hi yin’wana ya mihandzu yo biha leyi vukhongeri byi yi humeseke. Wu tlhela wu hlamula xivutiso lexi nge, xana vukhongeri byin’wana ni byin’wana byi faneriwa hi ku tshembiwa?”

Xalamuka! July

“Hi endzela vaakelani va hina leswaku hi burisana na vona malunghana ni xiphiqo lexikulu ku nga vuhomboloki. Vanhu van’wana va lwisana na byona hi ku tereka. Xana u anakanya leswaku vanhu lava lwisanaka na byona va ta tisa ku cinca? [Yimela nhlamulo] Xiya leswaku Bibele yi vula leswaku i yini lexi nga ta tisa ku cinca ka xiviri emisaveni. [Hlaya Matewu 6:9, 10.] Magazini lowu wu hlamula xivutiso lexi nge, xana ku tereka i ntlhantlho wa swiphiqo?”

Mahungu Lamanene Lama Humaka Eka Xikwembu!

“Hi endzela mindyangu leyi nga laha xitarateni xa n’wina leswaku hi burisana na yona hi rungula leri khutazaka leri humaka eBibeleni. Vo tala lava hi vulavuleke na vona va tivutisa leswaku ha yini Xikwembu lexi nga ni rirhandzu xi pfumela leswaku vanhu va xaniseka laha misaveni. Xana u anakanya leswaku ku xaniseka a ku ri xiphemu xa xikongomelo xa Xikwembu hi misava?” Yimela nhlamulo. Kutani u pfula eka Dyondzo 5 ivi mi bula hi tindzimana timbirhi to sungula swin’we ni matsalwa lama voyamisiweke. N’wi nyike broxara kutani u hlela ku tlhela u vuya leswaku mi ta bula hi xivutiso lexi landzelaka xo dzihatiwa.