Mintokoto

◼ Australia: Loko John wanuna la dyondzekeke, a ha ri ntsongo a a ya ekerekeni kambe u hetelele a “yi namarhele swinene dyondzo ya leswaku Xikwembu a xi kona.” Phayona rin’wana ri n’wi nyike broxara leyi nge, Xana Swilo Leswi Hanyaka Swi Lo Tumbuluxiwa? naswona eka riendzo leri landzelaka ri n’wi nyike broxara leyi nge, Origin of Life. Leswaku munhu loyi a tsakela ku dyondza, phayona leri ri hambete ri n’wi nyika timagazini letintshwa ri tlhela ri n’wi komba swihloko swo hambana-hambana leswi vulavulaka hi ntumbuluko kumbe hi vuprofeta bya le Bibeleni. Loko ri vona leswaku John se wa tsakela, ri n’wi nyike buku leyi nge, Bibele—I Rito Ra Xikwembu Kumbe I Ra Munhu? Loko John a yi hlayile, u sungule ku vula leswaku u tshemba leswaku a swi koteki ku tiva leswaku Xikwembu xi kona kumbe a xi kona. Endzhaku phayona leri ri nyike John buku leyi nge, Leswi Bibele Yi Swi Dyondzisaka, kutani ri n’wi komba ndzimana 8 leyi nga eka tluka 20 ni tindzimana 13-16 leti nga eka matluka 23-24. Matsalwa lama kombisiweke eka tindzimana toleto ma tsakise John swinene lerova a ku: “Swi tikomba onge ndzi fanele ndzi kambisisa Bibele.”

◼ Mexico: Wanuna un’wana u byele muhuweleri un’wana leswaku a nga tshembi leswaku Bibele yi huhuteriwe hi Xikwembu. Muhuweleri yoloye u kombele ku komba wanuna yoloye vumbhoni bya leswaku Bibele yi huhuteriwile. Endzhaku ko burisana minkarhi yo hlayanyana, wanuna loyi u sungule ku khumbiwa mbilu hi leswi a a swi dyondza eBibeleni. U khumbeke swinene loko a dyondze hi milawu ya Xikwembu. U byele muhuweleri yoloye a ku: “Eku sunguleni loko hi hlaya swin’we Bibele, eka mina a yi fana ni xitsundzuxo lexi humaka ebukwini yin’wana ni yin’wana, a yi nga ndzi pfuni ha nchumu. Kambe sweswi loko hi yi hlaya, ngopfu-ngopfu laha yi vulavulaka hi ku tikhoma hi ndlela leyinene, swi khumba ripfalo ra mina.”

◼ United States: Loko mpatswa wun’wana wu ri karhi wu chumayela eka tsima ro hlawuleka ro chumayela emadorobeni lamakulu, wu hlangane ni wansati loyi a humaka eTaiwan loyi a a tshemba leswaku Xikwembu xi kona kambe a a anakanya leswaku Bibele i ya Valungu. U ye laha a va veke minkandziyiso ya vona kona hikuva a a titwa a nga ri na xikongomelo evuton’wini hambileswi a ri ni mali. A a tshemba leswaku Bibele yi ta n’wi pfuna a va ni xikongomelo evuton’wini. Mpatswa lowu wu sungule ku dyondza na yena Bibele wu tirhisa buku leyi nge, Leswi Bibele Yi Swi Dyondzisaka swin’we ni broxara leyi nge Lasting Peace and Happiness—How to Find Them. Ematshan’weni yo dyondza na yena ndzima 2 ya buku yoleyo, va bule hi xiyenge xa broxara lexi nge A Guidebook for the Blessing of All Mankind (Buku Leyi Kongomisaka Vanhu Hinkwavo Leswaku Va Kuma Mikateko.) Loko va burisane hi tindzimana ta tsevu to sungula eka xiyenge xexo, wansati loyi u vule leswaku u hlamarisiwa hi ndlela leyi Bibele yi hambaneke swinene ha yona ni tibuku tin’wana ta vukhongeri. Endzhaku ko burisana hi vuprofeta bya le Bibeleni lebyi hetisekeke, u te: “A ku na buku yin’wana leyi pakanisaka ku fana ni Bibele!”

◼ Japani: Muhuweleri un’wana u hambete a endzela wanuna un’wana ivi a bula na yena katsongo hi swihloko leswi kumekaka eka Xalamuka! leswi nge, “Xana Swi Lo Endliwa?,” hambileswi wanuna loyi a a n’wi byele leswaku a nga tshembi leswaku Xikwembu xi kona. Wanuna yoloye u sungule ku cinca vonelo rakwe hakatsongo-tsongo kutani a vula leswaku swi nga endleka Muvumbi a ri kona. Sweswi wa tshemba leswaku Xikwembu xi kona naswona muhuweleri yoloye u dyondza na yena broxara leyi nge, Mahungu Lamanene Lama Humaka Eka Xikwembu!

◼ Canada: Makwerhu wa xisati u fambisele wansati un’wana timagazini letintshwa loko wansati yoloye a huma endlwini a ya emovheni. Loko makwerhu loyi wa xisati a endla riendzo ro vuyela, wansati loyi u n’wi byele hi ku kongoma leswaku a nga ri tsakeli rungula ra hina naswona a nga tshembi leswaku Xikwembu xi kona. Makwerhu loyi wa xisati a nga helanga mbilu u tlhele a n’wi yisele broxara leyi nge, A Satisfying Life—How to Attain It. Makwerhu wa xisati u n’wi kume a ri ekaya, kutani a n’wi byele leswaku hambileswi a swi tivaka leswaku wansati yoloye a nga pfumeli leswaku Xikwembu xi kona, kambe a a ri karhi a ehleketa hi yena hikuva a a swi tiva leswaku i mutswari loyi a nga yexe. U kombe wansati yoloye ndzimana 6 eka tluka 4 ra broxara yoleyo leyi vulavulaka hilaha nkongomiso lowunene wu nga kumiwaka kona. Kutani u n’wi khutaze ku hlaya swiringanyeto leswi nga eka dyondzo 2 leyi vulavulaka hi ku kurisa vana. Wansati yoloye u yi amukerile broxara yoleyo.