Xana U Ma Tirhisa Kahle Makhadi Yo Pfuna Vanhu Ku Nghena Eka JW.ORG?

Leswi nhlomulo lowukulu wu ya ka wu tshinela, ntirho wa hina wo chumayela i wa xihatla. (Swiv 24:11, 12, 20) Hi nga pfuna vanhu hi ku tirhisa makhadi lawa, leswaku va dzikisa mianakanyo eka Rito ra Xikwembu ni le ka website ya hina. Khadi leri ri ni khodi leyi yi yisaka eka vhidiyo leyi nge Ha Yini U Fanele U Dyondza Bibele? swin’we ni xirhambo xo kombela rungula leri engetelekeke kumbe dyondzo ya Bibele. Vanhu van’wana a va yi tsakeli minkandziyiso ya hina kambe va tiyimiserile ku nghena eka website ya hina. U nga kanakani ku va nyika khadi leri. Hambiswiritano, u nga ma siyi makhadi lawa eka lava nga tsakeriki.

Loko u ri karhi u endla mintirho ya wena ya siku ni siku, u nga endla leswaku munhu a tsakela hi ku vula u ku: “Ku ni leswi ndzi lavaka ku ku nyika swona. Khadi leri ri ku kongomisa eka website leyi nga ni rungula ra mahala ni tivhidiyo leti vulavulaka hi tinhlokomhaka to hambanahambana.” (Yh 4:7) Leswi makhadi lawa ma khomekaka, u nga tshama u ri na wona leswaku u ta nyika van’wana loko u pfulekeriwa hi nkarhi.