Tsima Ro Hlawuleka Ro Sungula Tidyondzo Ta Bibele Hi September

Hi September, hi ta tirha hi matimba leswaku hi sungula tidyondzo ta Bibele ni vanhu vo tala hi ku tirhisa broxara leyi nge, Tiphine Hi Vutomi Hilaha Ku Nga Heriki! Vahuweleri va nga ha hlawula ku teka vuphayona bya nkarhinyana, bya 30 wa tiawara. Xana leswi hi ta swi endlisa ku yini?

• Eka Riendzo Ro Sungula: Tirhisa xifunengeto lexi nga emakumu ka broxara leswaku u pfuna munhu a tsakela ku dyondza, u tlhela u n’wi komba ndlela yo dyondza. Tsundzuka lava tshameke va tsakela ku dyondza swin’we ni maendzo yo vuyela. Hambiloko va tshame va ala ku dyondza enkarhini lowu hundzeke kambe sweswi swi nga endleka va tsakela ndlela ya hina leyintshwa yo dyondzisa ni broxara. Tibroxara a ti fanelanga ti siyiwa emitini leyi ku nga riki na munhu naswona lava va nga swi tsakeriki ku dyondza, a hi fanelanga hi va rhumela tibroxara leti hi mapapila. Komiti ya Ntirho ya Vandlha yi nga ha endla leswaku ku va ni tinhlengeletano ta ntirho wa nsimu leti engetelekeke exikarhi ka nh’weti.

• Tindlela Tin’wana: Loko vandlha ra n’wina ri ri ni swigolonyana, veka broxara leyi nge, Tiphine Hi Vutomi Hilaha Ku Nga Heriki! Byela lava tsakelaka ku dyondza leswaku va nga kuma dyondzo ya Bibele ya mahala hi ku tirhisa broxara leyi. Va kombe ndlela yo dyondza to ho suka kumbe mi veka nkarhi wun’wana. Mulanguteri wa nsimu a nga ha endla malunghiselelo ya leswaku vahuweleri lava nga ni vuswikoti va ya endhawini ya mabindzu leswaku va sungula tidyondzo ta Bibele. U nga ha tlhela u sungula dyondzo ya Bibele ni vatirhikulobye kumbe lava u hlanganaka na vona.

Yesu u lerise leswaku hi “endla vadyondzisiwa,” hi tlhela hi “va dyondzisa.” (Mt 28:19, 20) Onge tsima leri ro hlawuleka ri nga hi pfuna hi fikelela xikongomelo lexi, hi ku tirhisa Tiphine Hi Vutomi Hilaha Ku Nga Heriki!