Tsima Ro Hlawuleka Ro Fambisa Broxara Leyintshwa
1 Vanhu vo tala namuntlha va karhateka hi swiyimo swa misava, kambe a va talanga lava tivaka leswaku ha yini swilo swi yime hi ndlela leyi, ni leswaku vumundzuku byi ta va njhani ni leswi va faneleke va swi endla leswaku va pona eku avanyisiweni loku taka. (Ezek. 9:4) Leswaku hi va pfuna va tiva leswi minkarhi leyi hi nga eka yona yi vulaka swona, ku ta va ni tsima ro hlawuleka ro fambisa broxara leyintshwa leyi nge Tshamani Mi Rindzile! ku sukela hi Musumbhunuku, March 21, ku ya fika hi Sonto, April 17.
2 Broxara leyi hi nga yi fambisa hi yindlu na yindlu, eka maendzo yo vuyela, loko hi chumayela hi xitshuketa, kumbe exitarateni. Hambiswiritano, broxara leyi nge Tshamani Mi Rindzile! a yi fanelanga yi phakeriwa mani na mani handle ko xiya. Ku ri na sweswo, yi ta nyikiwa ntsena lava tsakelaka leswi Bibele yi swi vulaka mayelana ni swilo leswi endlekaka emisaveni. Lava nga ri tsakeliki ngopfu rungula leri, va nga nyikiwa xiphephana.
3 U nga ha koka mianakanyo ya munhu hi ku vula leswi:
◼ “Vanhu vo tala va karhateka hi swiphiqo leswikulu ni hi swilo leswi tsemaka nhlana leswi humelelaka namuntlha. [Vula xikombiso lexi tiviwaka endhawini ya ka n’wina.] Xana a wu swi tiva leswaku swilo leswi swi profetiwile eBibeleni? [Yimela nhlamulo. Kutani u hlaya tsalwa leri fanelaka xikombiso lexi u xi tirhiseke, ro kota Matewu 24:3, 7, 8; Luka 21:7, 10, 11; kumbe 2 Timotiya 3:1-5.] Bibele yi paluxa leswi minkarhi ya hina yi vulaka swona naswona yi hlamusela hi ta vumundzuku bya vanhu. Xana u nga tsakela ku tiva leswi engetelekeke? [Yimela nhlamulo. Fambisa broxara loko munhu wa kona a tsakela hakunene.] Broxara leyi a yi xavisiwi. Loko u tsakela ku nyikela eka ntirho wa hina wa misava hinkwayo, hi nga wu amukela munyikelo wo tano.”
4 Kumbe xingheniso lexi xi nga ku pfuna:
◼ “Namuntlha vanhu vo tala va ni gome hikwalaho ka swilo leswi tsemaka nhlana leswi humelelaka laha misaveni kumbe hikwalaho ka makhombo lawa ya va humelelaka. Van’wana va tivutisa leswaku ha yini Xikwembu xi nga swi siveli swilo swo tano. Bibele ya hi tiyisekisa leswaku ku nga ri khale Xikwembu xi ta wisisa vanhu emaxangwini ya vona. Xiya mikateko leyi Xikwembu xi nga ta yi tisela vanhu. [Hlaya Pisalema 37:10, 11.] Xana wa swi tsakela ku tiva leswi engetelekeke?” Gimeta hi ndlela leyi fanaka ni ya xingheniso xo sungula.
5 Ringeta ku tsala vito ni adirese ya munhu un’wana ni un’wana loyi a amukeleke broxara, u hlela ku tlhelela eka yena leswaku u ya hlakulela ku tsakela ka yena. Vutirheli Bya Hina Bya Mfumo bya April 2005, byi ta hi nyika swiringanyeto leswi hi nga swi tirhisaka loko hi tlhelela eka vanhu vo tano. Loko munhu a tsakela eka riendzo ro sungula, u nga kota ku sungula dyondzo ya Bibele hi nkarhi wolowo, u tirhisa yona broxara leyi nge Tshamani Mi Rindzile! kumbe nkandziyiso wun’wana, wo kota broxara leyi nge Leswi Xi Swi Languteleke.
6 Broxara leyintshwa yi ta kumeka endzhaku ka Nhlangano wa Ntirho lowu eka wona ku nga ta buriwa hi xihloko lexi. Ku ringanyetiwa leswaku eku sunguleni vahuweleri ni maphayona va teka ntsena tibroxara leti va nga ta ti fambisa eka masiku ma nga ri mangani yo sungula ya tsima leri. Onge Yehovha a nga katekisa ntirho lowu wo hlawuleka wo n’wi dzunisa leswaku ku pfuneka vanhu va timbilu letinene hinkwako laha va kumekaka kona.—Ps. 90:17.