Swiringanyeto Leswi U Nga Swi Tirhisaka Eka Dyondzo Ya Munhu Hi Yexe Ni Le Ka Vugandzeri Bya Ndyangu

A hi gandzeli Yehovha ntsena loko hi hlanganile etinhlengeletanweni ta vandlha, ta muganga ni ta xifundzha kambe ni loko hi ri hexe swin’we ni mindyangu ya hina. Hi leswi swiringanyeto swin’wana leswi u nga swi tirhisaka eka dyondzo ya munhu hi yexe ni le ka vugandzeri bya ndyangu:

• Lunghiselelani tinhlengeletano ta vandlha. Mi nga ha praktisa tinsimu ni ku pfuna hinkwavo ekaya va lunghiselela tinhlamulo.

• Hlaya hi mhaka yo karhi ya le Bibeleni. Endzhaku, dirowa xifaniso xa xiendlakalo lexi u hlayaka hi xona kumbe u tsala tinhla to karhi leti u ti dyondzeke.

• Kambisisani xikhongelo xo karhi xa le Bibeleni ivi mi bula hi ndlela leyi xi nga mi pfunaka hayona mi antswisa swikhongelo swa n’wina.

• Hlalela vhidiyo leyi humesiweke hi nhlangano ivi u bula ni van’wana hi yona kumbe u tsala swo karhi hi yona.

• Lunghiselelani leswi mi nga ta swi vula ensin’wini kumbe mi swi praktisa kunene.

• Tinyikeni nkarhi wo xiyisisa ntumbuluko ivi mi anakanyisisa kumbe mi bula hi leswi wu mi dyondzisaka swona hi Yehovha.a