Swiringanyeto Leswi Nga Tirhisiwaka Eka Vugandzeri Bya Ndyangu Ni Le Ka Dyondzo Ya Munhu Hi Yexe
KU SUKELA eku sunguleni ka lembe ra 2009, mavandlha ya Timbhoni ta Yehovha emisaveni hinkwayo ma cince xiyimiso xa minhlangano ya wona. Minhlangano yimbirhi leyi a yi khomiwa exikarhi ka vhiki yi hlanganisiwile naswona vamakwerhu hinkwavo va khutaziwe ku tirhisa siku lerin’wana leswaku va va ni vugandzeri bya ndyangu kumbe dyondzo ya munhu hi yexe. Xana wa ri tirhisa lunghiselelo leri lerintshwa? Xana wa vuyeriwa hi ku helela eka rona?
Van’wana va tivutisile leswaku i yini leswi va faneleke va swi dyondza eka vugandzeri bya ndyangu. Huvo leyi Fumaka a yi yi hlawuleli mindyangu leswi yi faneleke yi swi hlaya vhiki ni vhiki. Leswi swiyimo swa mindyangu swi nga faniki, swa fanela leswaku nhloko yin’wana ni yin’wana ya ndyangu kumbe munhu un’wana ni un’wana, a kambisisa leswaku siku leri ri nga tirhisiwa njhani vhiki ni vhiki hi ndlela leyi vuyerisaka.
Van’wana va tirhisa siku leri ku lunghiselela minhlangano ya vandlha, kambe vugandzeri bya ndyangu a byi fanelanga byi tirhiseriwa xikongomelo xexo ntsena. Van’wana va hlaya, va burisana ni ku encenyeta leswi va swi hlayaka eMatsalweni, ngopfu-ngopfu leswaku ku vuyeriwa vana. A swi bohi naswona a swi nge va tsakisi vana ku va minkarhi hinkwayo ku tirhisiwa endlelo ra swivutiso ni tinhlamulo, hilaha ku endliwaka hakona eminhlanganweni ya vandlha. Hi ntolovelo, ku dyondza mi ntshunxekile swi endla leswaku ku va ni mabulo lama khutazaka ni ku pfunana hi mavonelo. Xiyimo xo tano xi susumetela hinkwavo leswaku va ehleketa naswona sweswo swi nga endla leswaku nkarhi wolowo wu tsakisa wu tlhela wu nga rivaleki.
Tatana un’wana loyi a nga ni vana vanharhu u tsale a ku: “Leswi hina hi swi endlaka minkarhi yo tala swi va swi sekeriwe eka ku hlaya ka Bibele ka vhiki rero. Un’wana ni un’wana wa hina u hlaya tindzima ta kona ka ha ri emahlweni ivi vana va hlawula rungula ro karhi leri va nga ta endla ndzavisiso ha rona kutani va hlamusela leswi va swi kumeke. Michael [loyi a nga ni malembe ya nkombo] u tala ku mpfampfarhuta xifaniso kumbe a tsala ndzimana hi leswi a swi dyondzeke. David na Kaitlyn [lava nga ni malembe ya 13 na 15] minkarhi yin’wana va tsala hi mhaka ya le Bibeleni onge hiloko a va ri vahlaleri. Hi xikombiso, loko hi hlaye nhlamuselo ya Yosefa ya milorho ya mubaki ni mucheri wa vhinyo lava a va tirhela Faro, Kaitlyn u tsale xitsalwana onge hiloko a a ri ekhotsweni a hlalele xiendlakalo xexo loko xi endleka.”—Gen., ndzi. 40.
Hi ntolovelo, swiyimo swa mindyangu ni swa vanhu a swi fani. Leswi tirhaka eka munhu un’wana kumbe eka ndyangu wun’wana a swi nge tirhi eka lowun’wana. Bokisi leri fambisanaka ni xihloko lexi ri ni swiringanyeto swo hlayanyana leswi nga ha tirhisiwaka eka vugandzeri bya ndyangu kumbe eka dyondzo ya munhu hi yexe. A swi kanakanisi leswaku u nga ehleketa hi swiringanyeto swin’wana swo tala.
[Bokisi/Xifaniso lexi nga eka matluka 6, 7]
Mindyangu leyi nga ni vantshwa:
• Hlayani mi tlhela mi tlhuvutsa buku leyi nge Swivutiso Leswi Vantshwa Va Swi Vutisaka—Tinhlamulo Leti Tirhaka.
• Vulavulani hi leswi vana va n’wina a va ta swi endla loko a va hanye eminkarhini ya ku tsariwa ka Bibele. (Hlayani Xihondzo xo Rindza xa May 15, 1996, tluka 14, tindzimana 17-18.)
• Vulavulani hi tipakani leti tekaka nkarhi wo leha ni leti tekaka nkarhi wo koma.
• Nkarhi ni nkarhi hlalelani mi tlhela mi tlhuvutsa tivhidiyo leti sekeriweke eBibeleni.
• Hlayani swihloko leswi nga eka Xihondzo xo Rindza leswi nge “Ta Vantshwa Va Hina.”
Mimpatswa leyi nga riki na vana:
• Hlayani ndzima 1, 3, 11-16 ya buku leyi nge Xihundla Xa Ntsako eNdyangwini.
• Vulavulani hi tinhla leti mi ti kumeke eka ndzavisiso wa ku hlaya ka Bibele.
• Lunghiselelani Dyondzo ya Bibele ya Vandlha kumbe ya Xihondzo xo Rindza.
• Vulavulani hi tindlela leti ha tona mi nga ndlandlamuxaka ntirho wa n’wina wa nsimu tanihi mpatswa.
Vamakwerhu va xinuna ni va xisati lava nga nghenelangiki vukati kumbe lava ngheneleke vukati kambe va hlanganyelaka va ri voxe:
• Dyondzani minkandziyiso leyintshwa leyi humesiweke emintsombanweni ya muganga.
• Hlayani Tibuku Ta Lembe ta sweswinyana ni ta khale.
• Endlani ndzavisiso hi swivutiso leswi vanhu va le nsin’wini ya ka n’wina va talaka ku swi vutisa.
• Lunghiselelani swingheniso leswi mi nga ta swi tirhisa ensin’wini.
Mindyangu leyi nga ni vana lavatsongo:
• Encenyetani timhaka ta le Bibeleni.
• Tlangani mintlango yo fana ni leyi nga eka matluka 30 na 31 ya Xalamuka!
• Endlani swilo leswi khutazaka vana ku tirhisa miehleketo ya vona. (Hlayani xihloko lexi nge “Ku Dyondza Bibele eNtangeni Wa Swiharhi!” eka Xalamuka! ya March 8, 1996, matluka 16-19.)
• Kambisisani swihloko leswi kumekaka eka Xihondzo xo Rindza leswi nge “Dyondzisa Vana Va Wena.”