U Tirhise Foni Ya Mani Na Mani Ku Fambisa Tidyondzo Ta Bibele

Daiane i Mbhoni ya Yehovha tlhelo muchumayeri wa nkarhi hinkwawo eBrazil. Siku rin’wana loko a ri karhi a chumayela rungula ra Bibele hi foni, u burisane ni vatekani lava ha riki vantshwa lava a va lava ku tiva leswi engetelekeke. Va byele Daiane leswaku va ta rhurhela eximutanini lexi nga xoxe laha ku nga riki na gezi kumbe Inthanete. Ku engetela kwalaho, a ku nga ri na Timbhoni ta Yehovha endhawini yoleyo. Leswaku vatekani volavo va yisa bulo ra vona ra Bibele emahlweni, va nyike Daiane tinomboro ta foni ya mani na mani ya le ximutanini xolexo naswona havanharhu va pfumelelane hi siku ni nkarhi lowu a va ta bula ha wona.

Daiane u fonele foni ya mani na mani hi nkarhi lowu va pfumelelaneke ha wona naswona vatekani volavo va hlamurile! Eka mavhiki mambirhi lama landzeleke va dyondze Bibele kanharhu na Daiane hi foni.

Endzhaku vatekani volavo a va ha hlamulanga foni loko a fona. Handle ko hela matimba, Daiane u ye emahlweni a fona kanharhu hi vhiki naswona u burisane ni munhu un’wana loyi a hlamuleke foni. Eku heteleleni, Daiane u kote ku sungula tidyondzo ta Bibele to hlayanyana ni vanhu va le ximutanini xolexo.

Siku rin’wana loko Daiane ni nuna wakwe va ri karhi va dyondza Bibele ni jaha rin’wana ra le ximutanini xolexo, mufundhisi wa le ximutanini xolexo u yingisele bulo ra vona. U yime etlhelo ka xichudeni xexo xa Bibele leswaku a ri yingisela kahle bulo ra vona. Kutani mufundhisi u kombele ku vulavula na Daiane ni nuna wakwe. U tsakisiwe swinene hileswi a swi tweke kutani na yena u kombele ku dyondzeriwa Bibele!

Hi ku famba ka nkarhi, Daiane ni nuna wakwe a va dyondza Bibele ni vanhu va tsevu hi ku tirhisa foni ku katsa ni mufundhisi, eximutanini xolexo xa le kule. Swin’wana swa swichudeni leswi a a dyondza na swona se a swi yingisela tinhlengeletano ta vandlha hi ku tirhisa foni yoleyo. Un’wana wa vona u endle bence leswaku swichudeni swi kota ku tshama loko swi ri karhi swi dyondza.

Daiane ni nuna wakwe va yi tlangela njombo leyi va veke na yona yo chumayela rungula ra Mfumo eximutanini xexo lexi nga ekule. Daiane u ri, “Yehovha a nga endla leswaku munhu un’wana ni un’wana a chumayeriwa mahungu lamanene hambiloko a tshama endhawini leyi nga ekule.”