Xana Bibele Yi Nga Ku Pfuna Ku Hlula Ku Godzomberiwa Hi Swidzidziharisi?
Vanhu va timiliyoni va fa lembe ni lembe hikwalaho ka leswi va swi dzahaka, leswi katsaka swidzidziharisi. Xiphiqo lexi xi ye xi nyanya hi nkarhi wa ntungu wa COVID-19. Kambe vutlhari bya le Bibeleni byi pfune vo tala ku hlula ku godzomberiwa hi swidzidziharisi. Na wena byi ta ku pfuna loko u ri ni xiphiqo lexi fanaka.a
Eka nhlokomhaka leyi
Hikwalahokayini hi lava mpfuno wa le Bibeleni wo hlula ku godzomberiwa hi swidzidziharisi?
Magoza ya mune lama kumekaka eBibeleni yo hlula ku godzomberiwa hi swidzidziharisi
Tindzimana ta le Bibeleni leti nga ku pfunaka ku hlula ku godzomberiwa hi swidzidziharisi
Mitokoto ya lava swi tshikeke: Ku tshika ku godzomberiwa hi swidzidziharisi hi ku pfuniwa hi Bibele
Xana Bibele ya swi alela ku tshungula ku godzomberiwa hi swidzidziharisi?
Xana Bibele ya ma alela matshungulelo lama tirhisaka swidzidziharisi?
Hikwalahokayini hi lava mpfuno wa le Bibeleni wo hlula ku godzomberiwa hi swidzidziharisi?
Valavisisi va kume leswaku lava godzomberiwaka hi swidzidziharisi, hakanyingi hi lava nga ni xivundza, xitirese, ku vilela ni ntshikilelo wa miehleketo. Bibele yi nga ku pfuna ku va ni ripfumelo leri nga endlaka u hlula swiphiqo leswi nga ku endlaka u tirhisa swidzidziharisi. Yi ta ku dyondzisa tindlela to va munghana wa Xikwembu. (Pisalema 25:14) Mpfuno lowu u nga ta wu kuma, wu ta ku endla u hlula swiphiqo leswi a wu nga ehleketi leswaku u nga swi hlula u ri wexe.—Marka 11:22-24.
Magoza ya mune lama kumekaka eBibeleni yo hlula ku godzomberiwa hi swidzidziharisi
1. Tiva Yehovha Xikwembu.b (Yohane 17:3) Hi yena Muvumbi ni Xihlovo xa matimba lama nga pimekiki. Ku tlula kwalaho, i Tata wa wena wa le matilweni loyi a nga ni rirhandzu. U lava ku va ni vuxaka lebyikulu na wena ni ku tirhisa matimba yakwe leswaku a ku pfuna. (Esaya 40:29-31; Yakobo 4:8) U lava ku ku nyika vumundzuku byo tsakisa loko u hlawula ku tshinela erirhandzwini rakwe.—Yeremiya 29:11; Yohane 3:16.
2. Kombela Yehovha a ku pfuna. Khongela eka Xikwembu u kombela xi ku pfuna u hlula ku godzomberiwa hi swidzidziharisi leswaku u ta ‘kwetsima kumbe ku basa ni ku amukeleka eka xona.’ (Varhoma 12:1) Hi ku tirhisa moya wa xona lowo kwetsima kumbe matimba ya xona lama tirhaka, xi ta ku nyika “matimba lama tlulaka lama tolovelekeke”. (2 Vakorinto 4:7; Luka 11:13) Matimba lawa ma ta ku pfuna u tshika swidzidziharisi ni ku va ni “vumunhu lebyintshwa” lebyi tsakisaka Xikwembu.—Vakolosa 3:9, 10.
3. Tata miehleketo ya wena hi miehleketo ya Xikwembu. (Esaya 55:9) Xi ta ku ‘endla lontshwa eka ndlela ya wena ya ku ehleketa’ kumbe xi cinca ndlela leyi u ehleketaka hayona, sweswo swi ta ku pfuna u hlula ku godzomberiwa hi swidzidziharisi. (Vaefesa 4:23) Miehleketo ya Xikwembu yi kumeka eBibeleni kutani i swa nkoka leswaku u hlaya Bibele nkarhi ni nkarhi. (Pisalema 1:1-3) Vo tala va vuyeriwile hi ku kombela ku pfuniwa leswaku va twisisa leswi Bibele yi swi dyondzisaka. (Mitirho 8:30, 31) Timbhoni ta Yehovha ti nga tsakela ku dyondza na wena Bibele mahala. Ha ku rhamba leswaku u va kona etinhlengeletanweni ta hina ta vandlha laha hi dyondzaka Bibele ni ndlela yo tirhisa leswi yi swi dyondzisaka evuton’wini bya hina.
4. Hlawula vanghana lavanene. Vanghana va wena va nga va ni nkucetelo lowukulu lowu nga endlaka swi ku olovela kumbe swi ku tikela ku hlula ku godzomberiwa hi swidzidziharisi. (Swivuriso 13:20) Xikwembu xi ni vanghana lavanene lava xi gandzelaka naswona xi lava u tiphina hi ku va ni xinghana na vona. (Pisalema 119:63; Varhoma 1:12) Nakambe hlawula hi vutlhari leswi u tihungasaka hi swona hikuva swi fana ni loko u hungasa hi ku kongoma ni vanhu lava u va hlalelaka, u va yingiselaka kumbe u hlayaka hi vona. Fambela ekule ni swilo leswi nga ta endla swi ku tikela ku endla swilo leswinene.—Pisalema 101:3; Amosi 5:14.
Tindzimana ta le Bibeleni leti nga ku pfunaka ku hlula ku godzomberiwa hi swidzidziharisi
Pisalema 27:10: “Hambiloko tatana na manana vo ndzi tshika, Yehovha u ta ndzi teka.”
“A ndzi nga n’wi tivi bava wa mina, sweswo swi ndzi endle ndzi titwa ndzi ri xikangalafula. Ndzi tive xikongomelo xa vutomi ni ku hlula ku godzomberiwa hi swidzidziharisi hi siku leri ndzi tiveke leswaku Yehovha i Xikwembu xa xiviri naswona wa ndzi rhandza.”—Wilby wa le Haiti.
Pisalema 50:15: “Ndzi vitane loko u ri emaxangwini. Ndzi ta ku ponisa.”
“Ndzimana leyi yi ndzi pfune mikarhi yo tala leswaku ndzi lwa hi matimba ndzi hlula ku godzomberiwa hi swidzidziharisi hambiloko ndzi pfa ndzi swi navela. Yehovha u endle leswi a swi tshembiseke.”—Serhiy wa le Ukraine.
Swivuriso 3:5, 6: “Tshemba Yehovha hi mbilu ya wena hinkwayo, u nga titshegi hi ku twisisa ka wena. N’wi tivise tindlela ta wena hinkwato, kutani yena u ta lulamisa tindlela ta wena.”
“Ndzimana leyi yi ndzi pfunile leswaku ndzi tshemba Yehovha, ku nga ri ku titshemba. Hi mpfuno wakwe, ndzi kote ku cinca vutomi bya mina.”—Michele wa le Italy.
Esaya 41:10: “U nga chavi, hikuva ndzi na wena. U nga vileli, hikuva ndzi Xikwembu xa wena. Ndzi ta ku tiyisa, ina, ndzi ta ku pfuna. Ndzi ta ku khoma swi tiya hi voko ra mina ra xinene ra ku lulama.”
“A ndzi karhateka swinene loko ndzi nga ri na swidzidziharisi. Tsalwa leri ri ndzi endle ndzi tshemba leswaku Xikwembu xi ta ndzi pfuna ndzi hlula ku karhateka loku a ndzi ri na kona naswona xi endle tano.”—Andy wa le Afrika Dzonga.
1 Vakorinto 15:33, nhlamuselo ya le hansi: “Mi nga xisiwi. Vanghana vo biha va onha mikhuva leyinene.”
“Vanghana vo biha va ndzi dyondzise ku tirhisa swidzidziharisi naswona swi ndzi godzomberile. Ndzi kote ku swi tshika loko ndzi dlaye xinghana na vona ivi ndzi va ni vanghana lavantshwa lava a va ri ni mahanyelo lamanene.”—Isaac wa le Kenya.
2 Vakorinto 7:1: “A hi tibasiseni eka swilo hinkwaswo leswi thyakisaka nyama ni moya.”
“Marito wolawo ma ndzi susumetele ku ya emahlweni ndzi lwela ku basisa miri wa mina ni ku tshika swidzidziharisi ni swilo leswi a swi onha miri wa mina.”—Rosa wa le Colombia.
Vafilipiya 4:13: “Eka hinkwaswo ndzi ni matimba hikwalaho ka loyi a ndzi nyikaka matimba.”
“A ndzi swi tiva leswaku a ndzi nga ta swi kota ku tshika swidzidziharisi ndzi ri ndzexe kutani ndzi khongele eka Yehovha leswaku a ndzi pfuna. U ndzi nyike matimba lawa a ndzi ma lava.”—Patrizia wa le Italy.
Mitokoto ya lava swi tshikeke: Ku tshika ku godzomberiwa hi swidzidziharisi hi ku pfuniwa hi Bibele
Joseph Ehrenbogen u kulele endhawini leyi a yi ri ni madzolonga naswona u godzomberiwe hi byala, fole, mbangi ni heroin. Mikarhi yo tala u pone ri ahlamile hileswi a a swi tirhisa ku tlula mpimo. Kambe ndzimana yin’wana ya le Bibeleni yi n’wi endle a tshemba leswaku a nga swi kota ku cinca. Hlaya hi mhaka yakwe eka nhlokomhaka leyi nge: “Ndzi Dyondze Ku Xixima Vavasati Ndzi Tlhela Ndzi Tixixima.”
Dmitry Korshunov u ringete mikarhi yo tala leswaku a hlula ku godzomberiwa hi byala. Leswaku u vona ku u pfuniwe hi yini, hlalela vhidiyo leyi nge: ‘A Ndzi Lava Ku Cinca Vutomi Bya Mina.’
Xana Bibele ya swi alela ku tshungula ku godzomberiwa hi swidzidziharisi?
Doo. Bibele yi ri: “Vanhu lava hanyeke kahle a va lavi dokodela, kambe u laviwa hi lava vabyaka.” (Matewu 9:12) Xiyenge Lexi Lwisanaka Ni Ku Tirhisiwa Ko Biha Ka Swidzidziharisi xa le U.S. xi ri: “Ku godzomberiwa hi swidzidziharisi i vuvabyi lebyi nga twisisekiki naswona ku swi tshika swi lava matshalatshala yo tala ku tlula ku vula ntsena leswaku u navele ku swi tshika.” Kambe mpfuno wa Yehovha wu ni matimba lama nga ringaniki ni ya munhu. Hambiswiritano, vo tala lava pfuniweke hi Bibele ku tshika swidzidziharisi, va lave ni mpfuno wa swa vutshunguri.c Hi xikombiso, wanuna la vuriwaka Allen, u ri: “Loko ndzi tshika byala, a ndzi tshamela ku twa ku vava emirini wa mina. Sweswo swi endle ndzi xiya leswaku a ndzi nga lavi mpfuno wa Bibele ntsena kambe a ndzi lava ni wa swa vutshunguri.”
Xana Bibele ya ma alela matshungulelo lama tirhisaka swidzidziharisi?
Doo. Bibele yi hlamusela byala tanihi murhi lowu nga tshungulaka munhu loyi a vabyaka kumbe a nga ni switlhavi. (Swivuriso 31:6; 1 Timotiya 5:23) Kambe hi fanele hi tivonela eka byala ni swidzidziharisi leswi hungutaka switlhavi hikuva swi nga hi godzombela. Hikwalaho, i swa nkoka ku vona khombo ra ha ri ekule ivi hi tivonela eka ndlela leyi hi ma tirhisaka hayona maphilisi yo hunguta switlhavi emirini.—Swivuriso 22:3.
a Hambileswi nhlokomhaka leyi yi vulavulaka ngopfu hi ku hlula ku godzomberiwa hi swidzidziharisi kambe milawu ya Bibele na yona yi nga va pfuna lava lwisanaka ni swiphiqo swo tanihi ku godzomberiwa hi byala, fole, makolo, ku gembula, ku hlalela swifaniso swa masangu kumbe swivandla swa mabulo (social media).
b Yehovha i vito ra Xikwembu. (Pisalema 83:18) Vona nhlokomhaka leyi nge “I Mani Yehovha?”
c Tindhawu to tala ta swa vutshunguri, swibedlhele ni minongonoko ya vanhu lava hluleke swiyimo swo tika yi nga ku pfuna. Un’wana ni un’wana u fanele a kambisisa matshungulelo lama nga kona kutani a hlawula lama nga manene.—Swivuriso 14:15.