Ku Suka eGondzweni Leri Yaka Eku Feni Ku Ya eGondzweni Leri Yaka eVuton’wini
HI MALEMBE yo tala vutomi bya mina byi onhiwile hi ku godzomberiwa ka mina hi swidzidzirisi. Ndzi sungule hi swidzidzirisi leswo olova ivi ndzi hetelela hi leswi swo nonon’hwa, swo tanihi LSD. Swidzidzirisi swi sungule ku kombisa ntshunxeko eka tinxaka hinkwato ta swiphiqo swa munhu hi xiyexe ni swa vanhu. Lexi vavisaka, ndzi khutaze vanhu van’wana lavantshwa ku ndzi khomisa ndlela yo ya eku feni.
Tanihi leswi a ndzi tiviwa tanihi muxavisi wa swidzidzirisi, maphorisa a ma tshama ma ndzi veke tihlo. Ndzi boheka ku pfumela leswaku a ndzi chava, hikuva a ndzi swi tiva leswaku ku khomiwa a swi ta vula malembe yo tala ekhotsweni. Hambi leswi a ndzi hanya enhlomulweni, a swi nga anelanga ku ndzi hundzurisa tindlela ta mina.
Vatswari va mina va ringete ku ndzi pfuna hi ku ndzi yisa ekaya ra lava vabyaka mianakanyo leswaku ndzi kuma vutshunguri. A ku tshembiwa leswaku mirhi ni vutshunguri leswi amukeriweke kona swi ta tlhantlha xiphiqo xa mina, kambe hi ku hatlisa loko ndzi huma, vatswari va mina va xiye leswaku hambi ku ri vutshunguri bya mirhi a byi nga koti ku ndzi hundzula. Va ringete ku ndzi pfuna nakambe hi ku ndzi vulavurisa ni mufundhisi. Leswi na swona a swi tirhanga. A ndzi dzaha mbangi ni ku nwa emahlweni ka yena, onge hi loko a nga ri kona kwalaho. Kahle-kahle a ndzi nga lavi ku hundzuka!
Oriana, nhwanyana loyi ndzi tshembiseke ku n’wi teka, a a lwisana ngopfu ni mahanyelo ya mina, naswona a ndzi nga swi lavi leswaku a ndzi tshika. Loko swi langutisiwa, leswi swi tikombe ku ri nhlohlotelo lowunene wo navela ku hundzuka. Kambe, ematshan’wini ya sweswo, ndzi hambetile ni mukhuva wa mina wa swidzidzirisi exihundleni. Ndzi endle leswaku Oriana a pfumela leswaku a ndzi vabya. Hi ku hatlisa ndzi ve munhu loyi a nga pfuniki nchumu hi laha ku heleleke. Ndzi tshame ndzi ri karhi ndzi titshembisa leswaku ndzi ta tshika, leswaku ndzi nga swi kota, kambe a swi nga pfuni nchumu. A ndza ha famba ndzi ya emahlweni ni gondzo ra mina ro ya eku feni ntsena.
Tanihi leswi a ndzi lava ku tekana na Oriana hi ku hatlisa hi laha swi nga kotekaka ha kona, hi vulavule ni musasekisi wa le ndzeni leswaku a endla ntirho wo karhi ekamareni ra hina lerintsongo. Nsati wa yena a a ri un’wana wa Timbhoni ta Yehova, naswona u vulavule na hina hi vupfumeri bya yena. Eku sunguleni bulo ri khumbe Oriana swinene ku tlula mina, kambe loko ri ri karhi ri ya emahlweni, ndzi swi xiyile leswaku Timbhoni ta Yehova a ti pfumela hi ku tiyiseka leswaku Xikwembu ku nga ri khale xi ta endla misava leyi yi va paradeyisi ni leswaku vanhu va ta hanya kwala hi ku rhula hi laha ku nga heriki.
Ndzi lave ku tikumela hi ndzexe loko ku ri ntiyiso leswaku “hambi ku ri sweswi Timbhoni ta Yehova ti kombisana rirhandzu ni ku xiximana,” hi laha wansati loyi a vuleke ha kona. Kutani mina na Oriana hi ye eHolweni ya Mfumo. Ndzi twe ndzi khomiwa hi tingana hikwalaho ka misisi ya mina leyo leha ni swiambalo swa mina leswi nga langutekiki, kambe ku amukela loku Timbhoni ti hi nyikeke kona kan’we-kan’we ku ndzi endle ndzi titwa ndzi ri ekaya. Ndzi swi vonile leswaku ndzi nga va tshemba. A swi ri erivaleni leswaku ku rhandzana ni ku xiximana ka xiviri ana se a ku ri mfungho wa vona.
Ku sukela siku rero ku ya emahlweni, ndzi sungule ku va kona eminhlanganweni ya Vukriste nkarhi na nkarhi, naswona ndzi sungule ku dyondza Bibele na Timbhoni ta Yehova. Ndzi suse misisi ya mina ivi ndzi hundzula ndlela ya mina ya ku ambala, naswona hi matshalatshala lamakulu, ndzi swi kotile ku tshika ku dzaha ni ku tirhisa swidzidzirisi. (2 Vakorinto 7:1) Hambi swi ri tano, a ka ha ri na xiphiqo xin’wana lexikulu evuton’wini bya mina. Handle ko swi xiya, ndzi ve mutirhisi wa xihoko. Loko ndzi nwile, a ndzi nghena ekhombyeni. A ndzi holova ni vanhu naswona ndzi ve la nga ni mavondzo swinene hi Oriana. Ndzi wele exiyin’weni xa gome lerikulu. (Swivuriso 23:29-35) Ndzi endle matshalatshala yo hambana ni mukhuva lowu, naswona hi mpfuno wa Yehova, matimba ya xikhongelo ni mpfuno wa vamakwerhu va Vukriste, ndzi kote ku simula mukhuva lowu wo biha evuton’wini bya mina.
Mina na nsati wa mina hi khuvuriwe hi August 23, 1974. Hi nkhensa ntiyiso, leswi vutomi bya hina manuku byi nga ni nhlamuselo. Tanihi leswi ndzi tlheleke ndzi kuma ku titshemba ka mina, ndzi kumile xichavo entirhweni. Mina ni nsati wa mina hi kume mali leyinene havambirhi, kambe endzhaku hi xiye leswaku hi ni nkarhi lowuntsongo lowu siyeriwaka ntirho wa hina lowu hlawulekeke. Loko hi lave ku tiphina hi vunghana bya le kusuhana na Yehova, a hi fanele hi endla ku hundzuka evuton’wini bya hina. Handle ka swona, a ku ri ni khombo ra leswaku rirhandzu ra hina ro sungula ra ntiyiso ri ta titimela. Kutani hi 1979 hi sungule ku phayona, hi tinyiketela hi laha ku heleleke entirhweni wo chumayela.
Ha yini ndzi bohe makungu lawa? Wa nga vonanyana, xana a ndzi ta va ndzi ri kwihi namuntlha loko a ku nga ri rivoningo ra ntiyiso? Lava a va ri na mina egondzweni leri yisaka eku feni sweswi va tirhisa xihoko kumbe a va ha ri na ndyangu kumbe va le khotsweni—kumbe va file. Hambi swi ri tano, i rungula ra Bibele leri ndzi ntshunxeke. Vutshunguri na ku tiyimisela lokukulu kahle-kahle a swi nga ringananga. Nsusumeto wa matimba a wu laveka. Ku lava ku hlakulela vunghana bya ntiyiso na Yehova, Muvumbi, ku nyike nsusumeto wo tano. Sweswi, i ku navela ka mina ka xiviri ku endla hinkwaswo leswi ndzi nga swi kotaka ku pfuna lava va nga mahlonga ya mukhuva wa swidzidzirisi, kun’we ni lava va xanisekaka kumbe lava lavaka ndlela yo huma eswiphiqweni swa vona. Hi ku hlanganyela hi ku gingiriteka evutirhelini bya Vukriste, mina ni nsati wa mina a hi endla sweswo. Hi ve ni lunghelo ro pfuna vanhu vo tala leswaku va famba hi gondzo leri yisaka evuton’wini. Exikarhi ka vona ku ni vanhu vanharhu lava mina hi ndzexe ndzi va ngheniseke eswidzidzirisini. Sweswi ndzi tirha tanihi muungameri wa xifundza en’walungwini ka Italy.
I ntiyiso: Ku tirhisiwa loko biha ka swidzidzirisi ku fana ni gondzo leri hi ku hatlisa ri ku yisaka eku feni kumbe evuton’wini lebyi nga pfuniki nchumu lebyi nga riki na vumundzuku. Ndzi pfumala marito yo phofula ku nkhensa ka mina eka Yehova Xikwembu! U ndzi kombise ndlela yo huma emunyameni lowu a ndzi hanya eka wona ivi a ndzi kongomisa egondzweni ra vutomi, leri taleke hi ku voninga, leri yisaka eka vumundzuku lebyi nga heriki.—Hi ku vula ka Ruggero Polotti.