Xiviko Xa Vahuweleri Va Mfumo

Matimba Lama Tengisaka Ya Rito Ra Xikwembu

KU VIKIWA leswaku vanhu vo tala lava godzomberiweke hi swidzidzirisi va tlhelela eka mukhuva wa vona endzhaku ka loko va ntshunxiwile etindhawini ta vutshunguri. Kambe Rito ra Xikwembu ri nga hetisisa leswi titliliniki hakanyingi ti tsandzekaka ku swi endla. (Vaheveru 4:12) Vo tala va pfuniwile hi Rito ra Xikwembu ni moya wa xona leswaku va hlula ku godzomberiwa hi swidzidzirisi ivi va tirhisa ndzayo leyi nge: “Hi fanele ku tibasisa, hi susa thyaka hinkwaro ra miri ni ra moya, hi ringeta ku hanya vutomi lebyo hlawuleka swinene, hi ri karhi hi chava Xikwembu.”—2 Vakorinto 7:1.

Leswi swi kombisiwa hi ntokoto wa le Myanmar. Wanuna la lwisaneke ni ku godzomberiwa hi swidzidzirisi emalembeni yo tala wa hlamusela: “Ndzi ve munhu la godzomberiweke hi swidzidzirisi loko ndza ha ri emalembeni ya kondlo-a-ndzi-dyi. Minkarhi yo tala ndzi ringetile ku tshika, kambe ndzi tsandzekile. Leswaku ndzi kota ku seketela mukhuva wa mina wo tirhisa swidzidzirisi, ndzi sungule ku yiva. Hikwalaho ka sweswo, hi 1988, ndzi pfaleriwe ekhotsweni lembe hinkwaro.

“Endzhaku ka loko ndzi ntshunxiwile ekhotsweni, ndzi sungule ku hlangana ni khale ka vanghana va mina. Endzhakunyana ka sweswo ndzi tlhelele eka mukhuva wa mina wo tirhisa swidzidzirisi. Ndlela leyi ya ku tisunga yi endle leswaku swirho swa ndyangu swi tshika ku tihlanganisa na mina. Ku engetela kwalaho, ku xandzuka ka mina ku vangele vanhu vo tala leswaku va ndzi chava, kutani na vona va sungule ku ndzi papalata.

“Kutani siku rin’wana ku humelele xilo lexi nga papalatekiki—ndzi vabyile hikwalaho ko tirhisa swidzidzirisi ku tlula mpimo. Ndzi tlhele ndzi pfaleriwa ekhotsweni, laha sweswi a ndzi ta heta malembe manharhu. Hambileswi vutomi ekhotsweni a byi nonon’hwa, ndzi swi kotile ku hanya.

“Loko ndzi humile ekhotsweni ndzi tlhelele ekaya, ndzi kombela ku rivaleriwa hi ndyangu wa ka hina eka swihoxo leswi ndzi swi endleke enkarhini lowu hundzeke. Va ndzi amukele hi tintswalo, kambe nakambe, vanghana va ndzi yengile leswaku ndzi tlhelela eka tindlela ta mina to sungula.

“Eku heteleleni, kokwana wa xisati u vulavule ni mufundhisi wa kwalaho leswaku ndzi fanele ku nghena xikolo xo karhi xa Bibele. Mufundhisi u pfumerile. Hambiswiritano, ndzi nga si sungula ku ya eka xona, hahani wa mina, loyi a nga un’wana wa Timbhoni ta Yehovha, u vule leswaku loko ndzi swi lava hakunene ku dyondza Bibele, ndzi fanele ndzi dyondza ni Timbhoni.

“Ndzi ye eHolweni ya Mfumo naswona ndzi tivisiwile eka wanuna un’wana loyi a pfumeleke ku dyondza na mina Bibele. Vo tala eka lava a va ri kona va ndzi xewete hi musa ivi va ndzi endla ndzi titwa ndzi amukelekile.

“Loko ndzi sungule ku dyondza Bibele ni ku va kona eminhlanganweni ya Vukreste, ku navela swidzidzirisi ku siviwe hi ku navela ku tshinela ekusuhi ni Xikwembu. Endzhaku ka lembe a ndzi endle nhluvuko ku fikela laha ndzi nga nyiketela vutomi bya mina eka Yehovha Xikwembu, kutani ndzi kombisa ku tinyiketela koloko hi nkhuvulo wa mati.

“Sweswinyana, loko ndzi ri karhi ndzi famba hi yindlu na yindlu, ndzi hlangane ni un’wana wa khale ka vanghana va mina lava tirhisaka swidzidzirisi. A a nga ku twisisi ku cinca loku xiyekaka loku ndzi ku endleke. Leswi swi ndzi nyike nkarhi wo nyikela vumbhoni, naswona ndzi kote ku vulavula na yena hi ntshembo wa Mfumo.

“Eku heteleleni ndzi kume xikongomelo xa xiviri evuton’wini. Hikwalaho ka mpfuno wa Xikwembu ni ndzayo leyi humaka eRitweni ra xona, sweswi ndza swi kota ku pfuna van’wana leswaku va tshika mukhuva lowu wa ku tirhisa swidzidzirisi hi ndlela yo biha lowu onhaka mahanyelo.”