Ndlela Yo Humelela eVutirhelini Bya Vuphayona

XANA vutirheli bya vuphayona i ntirho-vutomi wa wena ke? Loko u ri phayona, kumbe muhuweleri wa Mfumo wa nkarhi hinkwawo, a swi kanakanisi leswaku wa swi tsakela ku va la humelelaka. Kambe ku humelela ku lava leswi tlulaka ku kota ku tirhisa nkarhi entirhweni lowu nyikiweke ntsena. Munhu la humelelaka u fanele ku amukela ndzetelo naswona hi ku phikelela a antswisa vuswikoti bya yena.

Manuku ke, u nga swi kotisa ku yini leswaku u nga hambeti ntsena tanihi phayona kambe u tlhela u endla nhluvuko eka ntirho-vutomi wa wena ke? Ku ni swivutiso-nkulu swo hlayanyana leswi u nga ha swi kambisisaka.

Byi Tiyise Ku Yini Vuxaka Bya Mina Na Xikwembu?

Xin’wana xa swilaveko swa nkoka swinene leswaku u humelela tanihi phayona i ku va ni vuxaka bya le kusuhi, lebyi tiyeke na Yehova Xikwembu. Malunghana ni leswi, hi nga kuma dyondzo eka mupisalema Davhida. U komberile a ku: “Yehova! Nḍi kombe tindlela ta wena, u nḍi dyonḍisa mikhuv̌a ya wena. Nḍi fambise ntiyisweni wa wena, u ri kari u nḍi dyonḍisa; hikuv̌a hi wena Šikwembu ša ku hlayiseka ka mina; hi masiku, nḍi ku ṭhembile.”—Psalma 25:4, 5.

Davhida a a titshega hi ku helela eka ‘Xikwembu xa ku hlayiseka ka yena.’ A a navela leswaku Yehova a n’wi dyondzisa naswona ‘a n’wi endla a tiva tindlela ta Yena n’wini.’ Xana a wu swi koti ku vona ku navela lokukulu ka Davhida leswaku a tsakisa Xikwembu ke? Leswi a swi tlula ku navela loku tolovelekeke, hikuva Davhida u te: “Hi masiku, nḍi ku ṭhembile.”

Kambe xana u nga byi hlayisisa ku yini vuxaka byo tano bya le kusuhi na Yehova? Xiya leswaku lama nga laha henhla i marito ya Davhida exikhongelweni. Ina, ku vulavula hi xikhongelo i masungulo ya vuxaka lebyinene na Xikwembu. Naswona hi nga kuma ku khongoteriwa hi ku tiva leswaku a ku na xilaveko xo veka nkarhi na Tata wa hina wa le tilweni. Hi nga n’wi tshinelela hi nkarhi wihi na wihi. Hi laha Davhida a vuleke ha kona: “Nḍi huwelela ka wena hi siku hikwaro.” (Psalma 86:3) Hambi ku ri N’wana wa Xikwembu hi yexe, loyi a hanyeke emisaveni tanihi munhu la hetisekeke, u swi xiyile leswaku a a nga ta humelela handle ka mpfuno wa Tata wakwe. Yesu u vulavule na yena hi xikhongelo siku hinkwaro—nimixo swinene, ninhlikanhi na nivusiku.—Marka 1:35; Luka 11:1; 6:12.

Tanihi Vakriste, hi fanele hi landzelela xikombiso xa Yesu loko hi ta humelela evutirhelini bya hina. (Vaheveru 5:7) Malunghana ni xikhongelo, wansati wa Mukriste loyi a veke phayona leri humelelaka hi malembe ya 30 u tiphofule hi ndlela leyi: “Ndzi kuma leswaku xikhongelo i xa nkoka eka mina loko ndzi ta humelela tanihi phayona. Xi ndzi pfune ku titshega ha Yehova hi laha ku heleleke, hi ku xiya leswaku a ndzi nge humeleli ndzi ri ndzexe. Ndzi hambeta ndzi kombela Yehova ku ndzi pfuna ku ya emahlweni.”

Ina, ku humelela entirhweni wa vuphayona, u fanele u hlayisa vuxaka lebyi tiyeke na Yehova, u titshega hi laha ku heleleke hi yena hi xikhongelo. Hambi swi ri tano, lexi landzelaka i xivutiso xin’wana xa nkoka xo tivutisa xona.

Ndzi Rhandza Vanhu Ku Fikela Kwihi Ke?

Vuphayona i xikombiso xa rirhandzu. Ha yini? Hikuva vutirheli bya nkarhi hinkwawo byi katsa moya wa ku tinyikela. Tanihi phayona, u hambeta u nyikela nkarhi ni matimba ya wena ku pfuna van’wana. Kambe loko u ta hambeta u endla leswi, u fanele u va ni ku tsakela ka xiviri eka swilaveko swa van’wana. Loko a ri emisaveni, Yesu u kombise rirhandzu ro tano eka vanhu. Hi xikombiso, a ku ri ni xiendlakalo laha yena ni vadyondzisiwa va yena a va famba hi byatso va ya endhawini leyi rhuleke leswaku va “kota ku wisanyana.” Hambi swi ri tano, mintshungu yi va rhangerile ku fika kwalaho. “Loko Yesu a huma ebyatsweni, a vona ntshungu lowukulu wa vanhu, a va twela vusiwana, hikuva a va fana ni tinyimpfu leti nga riki na murisi; kutani a va dyondzisa leswo tala.”—Marka 6:30-34.

Ku fana na Yesu, tanihi maphayona hi fanele hi va ni rirhandzu leri enteke eka vanhu. Rirhandzu ro tano ri hi susumetela leswaku hi va tirhela. Hi laha mutsari a tshameke a vula ha kona eka Yesu: “‘Ku rhandza Hosi Xikwembu hi mbilu hinkwayo, ni ku anakanya hinkwako, ni matimba hinkwawo’, swin’we ni ‘ku rhandza munhu-kulobye, tanihi loko munhu a tirhandza’, swi tlula magandzelo hinkwawo lama hisiwaka ni timhamba hinkwato.” (Marka 12:33) Marito lawa ma hi pfuna ku twisisa leswaku a hi leswi hi swi endlaka evutirhelini bya hina ntsena leswi nga swa nkoka kambe ni mhaka leyi hi swi endlaka ha yona.

Tanihi phayona, u heta nkarhi wo tala entirhweni wo chumayela ni ku endla vadyondzisiwa ku tlula leswi van’wana va swi endlisaka xiswona. Kambe u tlhela u hlangana ni vanhu vo tala. U titwisa ku yini ha vona? Phayona rin’wana ri te: “Ndza swi tiva leswaku rirhandzu i mihandzu ya moya wa Xikwembu. Kutani handle ka rona a ndzi ta va ndzi nga ri kona entiyisweni, ndzi nga ha vuli ku humelela tanihi phayona. Rirhandzu ri ndzi endla ndzi anakanya hi vanhu, ndzi xalamukela swilaveko swa vona, naswona ndza swi xiya leswaku vanhu va ri amukela rirhandzu. Kavula, ku ni minkarhi leyi rirhandzu ra wena eka vanhu ri nga ta ringiwa hikwalaho ka malangutelo kumbe vumunhu bya vona. Ngopfu-ngopfu hikwalaho laha ndzi ringetaka ku yingisa ni ku leha mbilu.”

Xana yoleyo i ndlela leyi u titwaka ha yona hi vanhu ensin’wini ya ka n’wina ke? Leswaku u va phayona leri humelelaka, u fanele u rhandza vanhu. (1 Vatesalonika 2:6-8) Hambi swi ri tano, leswaku u va la humelelaka eka ntirho-vutomi wa wena wa vuphayona, nakambe u lava xiyimiso lexinene. Kutani tivutise u ku:

Xana Ndzi Ni Xiyimiso Lexi Ringaniseriweke Ke?

Ku ya emahlweni hi ndlela leyi humelelaka evutirhelini bya nkarhi hinkwawo, phayona ri fanele ri va leri hlelekeke kahle. Handle ka xiyimiso lexinene xa munhu hi xiyexe, vuphayona byi nga ha va lebyi hetaka matimba. Kavula, ku va ni xiyimiso lexi ku pfumelelaka ku heta nkarhi wo karhi evutirhelini bya nsimu a hi swona ntsena leswi katsekaka.

Phayona ri lava xiyimiso lexi ringaniseriweke. Xana u na xona ke? Hi laha ku faneleke u nga ha tivutisa u ku: Xana ndzi heta nkarhi lowu faneleke eswivumbekweni swo hambana-hambana swa vutirheli? Xana ndzi nga vula leswaku ndzi endla matshalatshala hinkwawo ku fikelela vanhu ensin’wini ke? Xana ndzi endla mindzulamiso leyi lavekaka exiyimisweni xa mina leswaku ndzi endza loko va ri ekaya ke? Xana ndzi endla maendzo yo vuyela lama humelelaka? Yesu u te: “Yanani ha kona, mi ya hundzula vamatiko hinkwavo leswaku va va vadyondzisiwa . . . mi va dyondzisa.” (Matewu 28:19, 20) Ku chumayela ni ku dyondzisa i swiphemu swa nkoka swa vutirheli bya hina. Xana wa aneriseka hi ku fambisa tibuku, kumbe wa tlhelela eka hinkwavo lava kombisaka ku tsakela, hambi va ti amukela tibuku ta Bibele kumbe e-e? Hi ku komisa, xana u endla nkarhi wa wena wu va ni ntikelo?

Xana Ndzi Mudyondzisi La Endlaka Nhluvuko?

Xexo i xivutiso xin’wana xa nkoka. Eka 2 Timotiya 4:2, Pawulo u tsarile a ku: “Twarisa Rito, u hiseka hi nkarhi wa kona hambi ku nga ri hi nkarhi wa kona; . . . u nga tsandzeki hi tlhelo ra ku lehisa mbilu ni le ku dyondziseni.” Leswaku ma chumayela rito, hambi hi le ndzeni kumbe ehandle ka bandlha, maphayona lama humelelaka ma chivirikela ku kuma ni ku antswisa vutshila byo dyondzisa. Ha yini Pawulo a ku ku dyondzisa i vutshila ke? Hikuva ku dyondzisa ku lava vuswikoti ni ku titoloveta.

Xana u ta byi antswisisa ku yini vuswikoti bya wena tanihi mudyondzisi? Muapostola Pawulo wa hlamula a ku: “Endla tifanelo leti, tinyiketele eka tona, leswaku hinkwavo va ta vona hi laha u yaka emahlweni ha kona.” (1 Timotiya 4:15) Ina, maphayona ma fanele ku nyikela nkarhi eka dyondzo ya Bibele ya munhu hi xiyexe, ku tsundzuka ni ku anakanyisisa. Leswi swi katsa ku tirhisiwa ka le rivaleni ka swiringanyeto leswi kumiwaka etibukwini to tanihi leyi nge Reasoning From the Scriptures, Vutirheli Bya Hina Bya Mfumo, ni leyi nge Theocratic Ministry School Guidebook.a

Hikwalaho ke, leswaku u humelela evutirhelini bya vuphayona, hlayisa vuxaka bya wena bya munhu hi xiyexe lebyi tiyeke na Yehova Xikwembu. Leswi hi ku fanana swi ta ku susumetela ku nghenisa ni ku kombisa rirhandzu leri enteke eka vanhu. Kavula, ku kombisa rirhandzu leri, a wu fanelanga u khathalela ntsena leswaku u tirhisa nkarhi wo tanihi kwihi evutirhelini, kambe u fanele u tlhela u lava ku endla nkarhi wa wena wu va ni ntikelo. Njhani? Hi ku endla matshalatshala lama lavekaka ku fikelela vanhu vo tala hi laha swi nga kotekaka ha kona hi rungula ra Mfumo. Eku heteleleni, yana emahlweni u endla nhluvuko tanihi mudyondzisi hi ku dyondza tindlela to hambana-hambana to tshinelela vanhu evutirhelini ni ku dyondza Bibele hi ku tinyiketela hi xikongomelo xo antswisa vutshila bya wena byo dyondzisa.

[Nhlamuselo ya le hansi]