Ntlhontlho Wa Ku Endla Maendzo Yo Vuyela
1 Tanihi vatirheli va mahungu lamanene, hi lerisiwa ku endla vadyondzisiwa. (Mt. 28:19, 20) Leswi swi katsa ku endla maendzo yo vuyela. Xana xiphemu lexi xa nkoka xa vutirheli bya hina bya Vukreste u xi languta hi ndlela leyinene? Ku va ni vutshila eku endleni ka maendzo yo vuyela ku nga ha va ntlhontlho lowu phyuphyisaka.—Swiv. 22:29.
2 Mukreste un’wana ni un’wana la tinyiketeleke u fanele a titwa a ri ni vutihlamuleri byo tirha ntirho wo endla vadyondzisiwa. Leswi swi nga ha lava leswaku hi veka nkarhi wa hina wo titsakisa etlhelo leswaku hi avelana ntshembo wa Mfumo ni van’wana. Maendzo yo vuyela ma hi nyika nkarhi wo pfuna vanhu lavanene leswaku va enerisa swilaveko swa vona swa moya.
3 Landzelela Ku Tsakela Hinkwako: Maendzo yo vuyela ma fanele ku endliwa eka hinkwavo lava tsakelaka rungula ra Mfumo, hambi loko va ala tibuku ta hina. Va tele vanhu lava kombisaka ku tsakela hi ku rhandza ka vona ku bula na hina hi timhaka ta Bibele. Yesu ni vaapostola va kombe ndlela leyi ku tsakela rungula ra Mfumo ku nga hlakuleriwaka ha yona hi ku nghenisa vanhu eka mabulo lama kongomeke ya Matsalwa.—Mar. 10:21; Mint. 2:37-41.
4 Xikongomelo xa hina xa ku tlhela hi endza xi fanele xi va ku ya sungula dyondzo ya Bibele. Hi nga ha swi kota ku komba n’wini wa muti ndlela leyi dyondzo ya Bibele yi fambisiwaka ha yona. U nga tiyiseka leswaku Yehovha u ta hlamula xikhongelo xa wena leswaku a ku pfuna u kuma munhu wa mbilu leyinene loyi u nga n’wi dyondzisaka. Yehovha u ta katekisa matshalatshala ya wena lamakulu entirhweni wakwe. Ha yini u nga kombeli Yehovha a ku pfuna ivi u endla pakani yo sungula dyondzo ya Bibele?
5 Tirhisa Swiphephana Hi Ndlela Leyinene: Swiphephana swi nga tirhisiwa hi laha ku humelelaka eku sunguleni ka tidyondzo ta Bibele. Vo tala va swi kotile ku sungula bulo hi ku bula hi xifaniso xa xifunengeto ntsena. Hlaya ndzimana yin’we ntsena ni n’wini wa muti. Loko a vutisa xivutiso, yimanyana, u kombela n’wini wa muti a tiphofula. Pfula matsalwa naswona u komba leswaku ma tirhisa ku yini. Kutani bulo ri nga yisiwa ebukwini leyi dyondzo yi nga ha sunguriwaka ha yona.
6 Tirhisa Buku Leyi Nge Reasoning: Maendzo yo vuyela lama humelelaka ma nga endliwa hi buku leyi nge Reasoning. Ku kambisisa ku longoloka ka timhaka-nkulu kumbe xikombo swi nga ku pfuna ku hlawula rungula leri fanelekaka ro bula ha rona loko u landzelerisisa mabulo ya nkarhi lowu hundzeke. Xiyege lexi nge “Scriptures Often Misapplied” xi nga pfuna ku hlula minkaneto leyi nga ha vaka kona. Maphayona ma vika leswaku ma humelela ngopfu eku sunguleni ka tidyondzo ta Bibele hi ku tirhisa rungula ro tanihi leri kumekaka ebukwini leyi nge Reasoning eka tluka 204 ehansi ka “How do Jehovah’s Witnesses arrive at their explanation of the Bible?” Va komba munhu la tsakelaka leswaku hi yi pfumelerisisa ku yini Bibele yi hlamusela mhaka hi yoxe. Leswi swa humelela naswona swi endle leswaku ku sunguriwa tidyondzo to tala ta Bibele.
7 Ku fana na Yesu ni vadyondzisiwa vakwe, hi fanele hi kombisa ku tsakela ka xiviri tinyimpfu ta Yehovha. (Lk. 9:11) Ku rhandza vanhu ku ta hi pfuna leswaku hi va fikelela hi mintiyiso ya Mfumo. (2 Kor. 2:17) Loko hi kandziyisa swinene ku tinyikela ka hina leswaku van’wana va ta hlayiseka emoyeni, ha swi kota ku hlangavetana ni ntlhontlho wa ku endla maendzo yo vuyela.