Hambeta U Vulavula Hi Swilo Leswi U Swi Voneke Ni Leswi U Swi Tweke
1 Hambi loko va biwa ni ku khotsiwa, vaapostola va byele vakaneti va vona va ku: “Hi nga ka hi nga koti ku tshika ku vula leswi hi swi voneke ni leswi hi swi tweke.” (Mint. 4:20) A va twisisa ntikelo wa mintirho ni tidyondzo ta Yesu.
2 Mahungu lamanene malunghana na Yesu ni Mfumo wakwe i ya nkoka evanhwini namuntlha ku fana ni le nkarhini wolowo. Hikwalaho, hi fanele hi tirhisa nkarhi wun’wana ni wun’wana leswaku hi vulavula hi leswi hi swi voneke ni leswi hi swi tweke eRitweni ra Xikwembu. Hi ntolovelo vanhu va tsakela ku vulavula hi timhaka ta vukhongeri hi nguva ya masiku yo wisa, naswona yi hi nyika nkarhi lowu engetelekeke wa ku veka vumbhoni.
3 Vantshwa, Vulavulani eMasikwini Yo Wisa Ya Xikolo: Vantshwa vo tala va Timbhoni va tirhisa minkarhi leyi engetelekeke ku veka vumbhoni hi nkarhi wa masiku yo wisa. N’wina lava khuvuriweke mi nga ha tsarisa mi va maphayona ya nkarhinyana hi December. Emavandlheni yo tala vakulu va hlele minhlangano leyi engetelekeke ya ntirho wa nsimu leswaku va pfuna vahuweleri lava nghenaka xikolo. A hi swi tsakeli leswaku vantshwa va famba voxe, kambe ematshan’wini ya sweswo hi rhandza leswaku va famba ni vatswari kumbe vahuweleri van’wana lava kuleke. Hi December hi kuma nkarhi lowunene wa ku endla ntirho wa le xitarateni tanihi leswi vanhu va yaka eku xaveni ka swilo swa Khisimusi. Timagazini ta hina ti ta va ni swihloko leswi nga ta tivisa vanhu leswaku Yesu tanihi Hosi leyi fumaka u ta swi lunghisa njhani swiphiqo swa misava. (Ringanisa Luka 2:14.) Tanihi leswi miehleketo yo tala ni miehleketo ya ku rhula yi yisiwaka eka Yesu Kreste hi nkarhi lowu wa lembe, xana a wu nge vi nkarhi lowunene wa ku fambisa buku leyi nge Nghwazi eka vanhu vo tala hi laha swi kotekaka ha kona?
4 Loko ku va ni mphikamakaneta hikwalaho ka leswi u alaka ku hlanganyela eka mikhuva ya vukhongeri leyi khumbanaka ni Khisimusi, u nga ha ku:
◼ “A ndzi hlanganyeli eminkhubyeni ya Khisimusi hikuva minkhuvo yo tano a yi n’wi xiximi Yesu tanihi loyi a nga ndlela yin’we leyi hi nga ponisiwaka ha yona ni loyi a nga ta herisa nyimpi ni swiphiqo swa tinxaka. [Tshaha kumbe u hlaya Mintirho 4:12.] Yesu a nga ha ri n’wana kambe se i Hosi leyi fumaka. Buku leyi nge Nghwazi Leyi Tshameke Yi Hanya, yi bula hi tidyondzo ni masingita hinkwawo ya Yesu ni ku komba ndlela leyi a nga ta herisa ha yona ku xaniseka ka vanhu.” Kutani kombisa xifaniso lexi nga eka ndzima 133, kutani u hlaya ndzimana ya vumbirhi eka tluka leri landzelaka. Kombisa tinhla tin’wana leti u vonaka leswaku ti ta n’wi tsakisa.
5 Vulavula Ni Vatirhi-kuloni: Makwerhu un’wana u fambise tibuku ta 63 hi ku veka buku leyi nge Nghwazi ehenhla ka tafula rakwe. Ku languteka ka yona loku kokaka mahlo ni nhloko-mhaka hi yoxe swi vangela swivutiso. U nga ha vutisa mutirhi-kuloni u ku: “Xana u nga vula leswaku i mani loyi a nga nghwazi leyi tshameke yi hanya?” Kutani u engeta u ku: “Buku leyi yi ni vuxokoxoko bya vutomi hinkwabyo bya Yesu, yi hlamusela hinkwaswo leswi a nga swi vula, yi hlamula swivutiso leswi vunyingi byi swi vutisaka mayelana ni masingita yakwe, naswona yi ni vuxokoxoko byin’wana lebyi tsakisaka. I mpfuxeto wa rixaladza wa leswi Bibele yi swi dyondzisaka hi Yesu naswona yi swi veka erivaleni leswaku Yesu Kreste a ri nghwazi leyi tshameke yi hanya.” Kutani, kombetela eka nhlamuselo ya Napoléon malunghana na Yesu hi laha yi tshahiweke ha kona eka ndzimana ya vunharhu ya xingheniso xa buku leyi.
6 Hi nga ha kuma minkarhi leyi fanaka ya ku veka vumbhoni eka vaakelani kumbe maxaka lama nga pfumeriki. Khongelela leswaku Yehovha a ku tiyisa ni ku ku nyika vuswikoti bya ku vulavula hi xivindzi hi nkarhi lowu faneleke. (Mint. 4:29, 31) Leswi hi swi vulaka mayelana na Yesu swi ta kufumeta timbilu ta vanhu lava ehleketaka, lava rhandzaka ku lulama. Xana hi nga va ni ntokoto muni wo antswa ku tlula ku pfuna vadyondzi-kulorhi, vatirhi-kulorhi, vaakelani kumbe maxaka, leswaku va nghena endleleni leyi yisaka evuton’wini lebyi nga heriki?—Yoh. 14:6.