Ku Tirhisa Switirho Swa Nkoka Hi Vutlharhi
1 Loko u famba hi yindlu na yindlu u veka vumbhoni, pakani ya wena ku fanele ku va ku nghenisa n’wini wa muti ebulweni ra Matsalwa leri akaka hi ku tirhisa Bibele ni switirho swin’wana swa nkoka. (Ringanisa 2 Vakorinto 6:1; 2 Timotiya 2:15.) I yini lexi vanhu va nsimu ya ka n’wina va karhatekaka ha xona masiku lawa? Xana va karhatiwa hi xiyimo xa ikhonomi ni ku tsana ka vutomi bya ndyangu? Xana a va dyi byi rhelela hi mhaka ya vugevenga ni vuhomboloki lebyi nga kona eka tiko leri? Marito ma nga ri mangani yo sungula ha wona eka yin’wana ya timhaka leti ma nga yisa ebulweni lerinene ra Bibele.
2 U nga ha ku:
◼ “Eminkarhini leyi yo nonon’hwa, vanhu vo tala swa va tikela ku nhlangavetana ni swiphiqo swa vutomi. Xana u ehleketa leswaku tihulumendhe ta vanhu ti ta swi lunghisa swiphiqo swa hina swa mali hi ndlela leyi nga ta hi enerisa hinkwerhu? [Yingisela nhlamulo.] Mhaka leyi mina ndzi vona yi khutaza swinene . . . ”
3 Kutani u nga hlaya Tipisalema 72:12-14 ivi u gimeta bulo hi ku hlawula ndzimana yin’wana eka leti humaka eka matluka 154-5 ya buku leyi nge Reasoning. Kumbe endzhaku ko hlaya tsalwa rin’we, u nga hlamusela ndzimana yin’we kumbe timbirhi (kumbexana tindzimana 4 na 5) eka ndzima 1 ya buku leyi nge Ntiyiso.
4 Eka tindhawu to tala u nga ha tirhisa ku tshinelela loku:
◼ “Vanhu vo tala va vula leswaku hi hanya ‘emasikwini ya makumu’ ni leswaku misava leyi yi siyiwa hi nkarhi. U titwa njhani hi sweswo? [Yimela nhlamulo.] Xana a wu swi xiyile leswaku Bibele ya hi byela leswaku hi nga pona njhani emakun’wini ya misava leyi kutani hi hanya emisaveni leyi nga ta endliwa paradeyisi? Ndzi tsakela ku avelana na wena tsalwa leri, leri khutazaka swinene?” Hlaya Pisalema 37:9-11. Komba n’wini wa muti ndzima 12 ebukwini leyi nge Ntiyiso kutani u hlaya ndzimana 10. Hi ku ya hi ku tsakela ka n’wini wa muti ni nkarhi lowu nga kona, u nga ha avelana na yena matsalwa man’wana. (Vona buku leyi nge Reasoning, matluka 234-43.)
5 Vahuweleri van’wana va swi kume swi tirha ku tirhisa xiphephana lexi nge Vutomi eMisaveni Leyintshwa Ya Ku Rhula loko va sungula bulo. Va komba n’wini wa muti xifaniso kutani va n’wi vutisa leswaku xana a nga swi tsakela ku hanya ehansi ka swiyimo swo tano swa ku rhula. Kutani va yisa nyingiso wa n’wini wa muti eka ndzimana leyi nga exiphephanini. Endzhaku ko bula hi tinhla ti nga ri tingani exiphephanini ni ku hlaya tsalwa rin’we kumbe mambirhi, va fambisa buku leyi nge Ntiyiso.
6 Loko buku yi nga tekiwi, u nga siya xiphephana ni n’wini wa muti kutani u endla malunghiselelo yo vuyela u yisa bulo emahlweni. Vahuweleri vo tala—ku katsa ni lavatsongo—va sungula tidyondzo ta Bibele hi laha ku humelelaka hi xin’wana xa swiphephana hi ku hlaya ndzimana kutani va vutisa n’wini wa muti leswaku yena u yi vona njhani mhaka leyi hlayiweke.
7 Loko u swi kota ku sungula dyondzo eka riendzo ro sungula, endla malunghiselelo lama tiyeke ya ku yisa bulo emahlweni siku rin’wana. U nga ha veka masungulo ya riendzo ra wena leri landzelaka hi ku byela n’wini wa muti leswaku loko u vuya u lava ku n’wi nyika nhlamulo ya xivutiso lexi tolovelekeke: “Hikwalaho ka yini Xikwembu xi pfumelela ku xaniseka?” Xihloko lexi nga la hansi xi ta komba leswaku mhaka leyi yi nga ndlandlamuxiwa njhani eka riendzo ro vuyela.