Lunghelo Lerinene Ra Ntirho

¹ Muhlayi un’wana u vule leswaku u dyondze swo tala leswi nga ni ntikelo hi ku hlaya Xihondzo xo Rindza ni Xalamuka! ku tlula leswi a nga swi dyondza emalembeni ya tsevu loko a dyondza eyunivhesiti. Swi tolovelekile leswaku vahlayi lavanene va vula marito yo tano lama tsakisaka ya ku tlangela endzhaku ko hlaya timagazini leti swa nkarhinyana. Mawaku lunghelo lerinene leri hi nga na rona ra ku avela van’wana timagazini ta hina nkarhi na nkarhi ni lava va ti rhandzaka hakunene!

² Vo tala, hambi loko va wu tsakelanyana ntiyiso, a va wu endli nhluvuko ku fikela laha va amukelaka dyondzo ya le kaya ya Bibele. Kambe ku tsakela ka vona ku nga hlakuleriwa loko un’wana a vuyela nkarhi na nkarhi a khome nkandziyiso wun’wana ni wun’wana lowuntshwa wa Xihondzo xo Rindza ni Xalamuka! Ina, ku fambisa timagazini hi ku tshembeka eka ntila wa timagazini swi susumete vanhu leswaku eku heteleleni va pfumela ku va ni dyondzo ya Bibele ya nkarhi na nkarhi.

³ Ha pfuneka hi ku va ni ntila wa timagazini loko hi rhanga hi ku hlaya timagazini kutani hi tsala tinhla to karhi leti nga ta tsakisa munhu un’wana ni un’wana loyi hi nga n’wi tsala ehansi.

⁴ Minkarhi yin’wana n’wini wa muti a nga ha hi nyika mali yo tlula leyi hi yi vuleke. Ha yini u nga ringanyeti leswaku u ta n’wi tisela minkandziyiso ya sweswinyana endzhaku ka mavhiki mambirhi? Koloko ku nga ha va ku sungula ka ntila wun’wana wa timagazini. Un’wana ni un’wana la tsakelaka timagazini ta hina u fanele a tsariwa eka phepha ra wena ra maendzo ya ntila wa timagazini. Loko munhu a ri ni ku tsakela ka ntiyiso loko a teka timagazini, u nga hlamusela leswaku swihloko leswinene swa huma eka timagazini ta hina endzhaku ka mavhiki man’wana ni man’wana mambirhi naswona u nga tsakela ku ti tisa. Tiyiseka leswaku wa ya nkarhi na nkarhi, u tirhisa minkarhi ya ku vulavula ni n’wini wa muti hi tinhloko-mhaka ta Bibele. Ha swi tiva leswaku u ta ri tsakela lunghelo leri lerinene ra ntirho.