Kurisa Ku Tsakela Hi Ku Endla Maendzo Yo Vuyela Lama Humelelaka

 ¹ Nkulumo yin’wana ni yin’wana leyi lunghiseleriweke kahle yi katsa xingheniso lexi pfuxaka ku tsakela, miri lowu dyondzisaka ni mahetelelo lama khutazaka. Xingheniso xi koka nyingiso wa vayingiseri, kambe handle ka miri ni mahetelelo, nkulumo yi ta va yi nga helelanga. Nsinya wa nawu lowu fanaka wa tirha ni le vutirhelini bya hina. I swinene ku pfuxa ku tsakela ka n’wini wa muti eka riendzo ro sungula, kambe hi fanele hi hambeta hi aka ku tsakela koloko ko sungula hi ku endla maendzo yo vuyela.

 ² Hikwalaho ka yini Xikwembu xi pfumelela ku xaniseka? I xivutiso lexi tlhontlhaka miehleketo hakunene! Xana a wu pfumeli leswaku mhaka leyi yi le mianakanyweni ya vanhu vo tala namuntlha? Hi yona mhaka leyi ha yona eka xihloko lexi nga la henhla ku ringanyetiweke leswaku u tlakusa xivutiso lexi loko u heta riendzo ro sungula, kutani u xi hlamula loko u endla riendzo ro vuyela.

 ³ U nga ha vula leswi:

◼ “Xewani. Nkarhi lowu hundzeke loko hi vulavula, ku tlakuke mhaka ya ku pfumelela ka Xikwembu ku xaniseka, naswona ndzi tshembise ku ku tela ni rungula ro karhi. Vanhu vo tala va ehleketa leswaku loko Xikwembu xi hi khathalela hakunene, xi nga herisa ku xaniseka. Kumbexana na wena u ehleketa hi ndlela leyi. [Yimela nhlamulo ya n’wini wa muti.] Bibele ya hi tiyisekisa leswaku Xikwembu xa hi khathalela hakunene. [Hlaya 1 Yohane 4:⁠8.] Xikwembu xi ni swivangelo leswi twalaka swa ku pfumelela ku xaniseka ku ta fika sweswi. Xin’wana xa swivangelo sweswo xi hlamuseriwa eka 2 Petro 3:⁠9. [Hlaya.] Swivangelo swin’wana swi nyikeriwe eka broxara leyi.” Kutani pfula eka tluka 15 ra broxara leyi nge “Vonani, Ndzi Endla Swilo Hinkwaswo Swi Va Leswintshwa”! kutani u hlamusela yinhla leyi tsakisaka.

 ⁴ Vini van’wana va miti va nga ha tsakela nhlamuselo leyi heleleke, naswona ku nga ha laveka u endla maendzo yo vuyela yo hlayanyana va nga si eneriseka hi nhlamulo. Tibuku to tala ta Sosayiti ta matluka ya 192 leti nga ta fambisiwa hi January ti katsa ndzima leyi yi nga tirhisiwaka tanihi xisekelo xa bulo rin’wana ra mhaka leyi.

 ⁵ Loko u gimeta bulo, tlakusa xivutiso xin’wana kutani u byela n’wini wa muti leswaku u nga tsakela ku n’wi avela rungula leri tsakisaka loko u vuya. Vanhu vo tala va nga lava ku tiva leswaku ku humelela yini hi munhu loko a fa. Ha yini u nga hleli ku bula hi nhloko-mhaka yoleyo hi nkarhi lowu faneleke?

 ⁶ Swi nga ku pfuna loko u tshama u tsundzuka tinhla tinharhu. Pfumelelana ni xiyimo. N’wini wa muti swi nga ha endleka a nga swi tolovelanga ku veka nkarhi wa bulo ra Bibele etlhelo. Komisa. U nga tshami nkarhi wo leha kumbe u hlanganisa tinhla to tala eku sunguleni. Minkarhi yo tala, u ta amukeriwa kahle loko u endza, ivi u hlanganisa tinhla ti nga ri tingani hi xinkarhana. Vana ni rirhandzu ni xinghana. Komba n’wini wa muti leswaku wa n’wi tsakela.

 ⁷ Pakani ya hina leyikulu i ku nghenisa n’wini wa muti ebulweni ra Matsalwa. Kutani hi sungula dyondzo ya le kaya ya Bibele leyi vekaka mihandzu hi buku leyi faneleke, yo fana ni leyi nge Hanya Hi Masiku. U nga kuma ntsako loko u lehisa mbilu, u kurisa ku tsakela ko sungula hi ku endla maendzo yo vuyela lama humelelaka.