Xana Swipimelo Swi Ku Heta Matimba?

SWIPIMELO! Kahle-kahle ku hava loyi a swi rhandzaka; kambe hinkwerhu ka hina hi fanele ku swi tiyiselela hi mpimo wo karhi. Kambe, xana minkarhi yin’wana u hela matimba hi ku vona onge vutomi bya wena byi vekeriwa swipimelo swo tala? Kumbexana swi nga ku antswela loko u cinca langutelo ra wena. Ematshan’wini yo vilerisiwa hi leswi u nga kotiki ku swi endla, ha yini u nga wu tirhisi swinene ntshunxeko wihi na wihi lowu u nga na wona wo endla leswi u swi kotaka?

Hi xikombiso, vo tala lava nga evuswetini hi tlhelo ra timali va navela ku va lava fumeke. Kambe hambi leswi vusweti byi hi sivelaka ku endla leswi hi nga swi kotaka emafambiselweni lawa ya swilo, kambe vanhu hinkwavo va tiphina hi swilo swa nkoka evuton’wini. Vanhu lava sweleke kun’we ni lava fumeke va fa hi rirhandzu, va tekana, va kurisa vana, va va ni xinakulobye lexinene, ni swin’wana. Xa nkoka ngopfu, vanhu lava sweleke kun’we ni lava fumeke va n’wi tiva Yehovha, naswona va langutele misava leyintshwa leyi a yi tshembiseke. Vanhu lava sweleke kun’we ni lava fumeke va endla nhluvuko evutlharhini ni le vutivini bya Vukreste leswi tlulaka rifuwo. (Swivuriso 2:1-9; Eklesiasta 7:12) Hinkwavo—lava sweleke ni lava fumeke—va nga tiendlela vito lerinene na Yehovha. (Eklesiasta 7:1) Enkarhini wa Pawulo, vo tala exikarhi ka vandlha ra Vukreste a ku ri vanhu va xiyimo xa le hansi—van’wana a va ri mahlonga—lava va wu tirhiseke hi vutlharhi ntshunxeko wihi na wihi lowu va wu kumeke.—1 Vakorinto 1:26-29.

Vunhloko Lebyi Fambisanaka Ni Matsalwa

Evukatini bya Vakreste, wansati u le hansi ka nuna wa yena—ku nga lunghiselelo leri kunguhateriweke ku pfuna ndyangu hinkwawo. (Vaefesa 5:22-24) Xana wansati u fanele a titwa a tsongahatiwile hikwalaho ka leswi? Nikatsongo. Wanuna ni wansati i nyandza yin’we. Loko wanuna a tirhisa vunhloko byakwe hi laha Kreste a byi tirhiseke ha kona, a nge n’wi vekeli swipimelo swo tala nsati wakwe, naswona u tala ku n’wi tshika a kombisa vuswikoti byakwe. (Vaefesa 5:25, 31) “Wansati wa migingiriko” loyi a hlamuseriweke eka Swivuriso ndzima 31 a a khomekile hi mintirho yo tala leyi tsakisaka ni leyi a yi lava vutshila ni ku tiyimisela. Handle ko kanakana, ku titsongahata eka nuna wakwe a swi nga n’wi heti matimba.—Swivuriso 31:10-29, NW.

Hi ku fanana, a ri kona lunghiselelo ra leswaku wansati a rhangela vavanuna lava fanelekaka evandlheni ra Vukreste. (1 Vakorinto 14:34; 1 Timotiya 2:11, 12) Xana vavasati va Vakreste va fanele ku titwa va nga enerisekanga hi xipimelo xexo? E-e. Vo tala va tsaka loko va vona mhaka yoleyo ya ntirho wa Vukreste yi tameriwa hi ku ya hi vukongomisi bya Xikwembu. Va wu tsakela mpfuno lowu va wu kumaka hi vurisi ni ku dyondzisa ka vakulu lava vekiweke, naswona va tikarhatela ku endla ntirho wa nkoka wa ku chumayela ni ku endla vadyondzisiwa. (Matewu 24:14; 28:19, 20) Vavasati va Vakreste va endla ntirho lowukulu emhakeni leyi, naswona leswi swi endla leswaku va va lava dzunekaka emahlweni ka Yehovha Xikwembu.—Pisalema 68:11; Swivuriso 3:35.

Swipimelo Eka Vana

Vana na vona minkarhi yin’wana va vilela, va vula leswaku va siveriwa-siveriwa ngopfu evuton’wini bya vona, ngopfu-ngopfu hikwalaho ka leswi va nga ehansi ka vatswari va vona. Kambe na swona leswi swi fambisana ni Matsalwa. (Vaefesa 6:1) Vantshwa va Vakreste lava tlhariheke, va tinyiketela ngopfu ku tsakela ntshunxeko lowu va nga na wona—lowu hakanyingi wu katsaka ku pfumala vutihlamuleri lebyikulu, ematshan’wini yo va va siringiwa hi swipimelo leswi vatswari va vona va va vekelaka swona. Xisweswo va tirhisa matimba ya vuntshwa bya vona ni swiyimo swa vona leswaku va tilunghiselela ku va ni vutomi lebyinene loko va kurile.

Khale ka mulanguteri wa xifundzha le Brazil u n’wi tsundzuka kahle mufana loyi a a ri ni malembe ya 12 loyi a a ri eka ntlawanyana wa vahuweleri lava nga voxe, loyi a pimeriweke leswi a faneleke a swi endla. Loyi a a tamela tirhekhodo a a khomekile swinene hi ntirho wo tihanyisa lerova a a nga swi koti kahle ku khathalela ntlawa lowu wa vahuweleri, kambe u hlele leswaku mufana loyi a n’wi pfuna. U dyondze lomu tifomo hinkwato ti nga kona, naswona minkarhi hinkwayo a a tinyiketela ku pfuna. Nkhathalelo wakwe a wu khutaza, naswona a a hlanganyela hi ku tshembeka entirhweni wa nsimu. Mufana luya namuntlha i nkulu evandlheni.

Ku ni swiyimo swo tala leswi hikaka ntshunxeko wa munhu. Van’wana va siveriwa hi vuvabyi. Van’wana va tshama emindyangwini leyi avaneke, naswona va kuma ntshunxeko wa vona wu hikiwa hikwalaho ka swilaveko swa munghana wa vukati loyi a nga riki mupfumeri. Hambi leswi lava va hanyaka hi ku siveriwa-siveriwa va navelaka ku va exiyin’weni lexi hambaneke, va nga swi kota ku hanya vutomi lebyi phyuphyisaka. Magazini leyi yi hlamusele timhaka to tala ta vanhu vo tano lava veke xikhutazo lexikulu eka van’wana hikwalaho ka leswi va tshembaka Yehovha ni ku swi tirhisa swinene swiyimo swa vona.

Loko a vulavula hi xiyimo lexi a xi tolovelekile enkarhini wakwe, muapostola Pawulo u te: “Xana a wu ri hlonga loko u vitaniwa? U nga vileli hi swona; kambe loko u tshuka u kuma nkateko wo ntshunxiwa, wu tirhise.” (1 Vakorinto 7:21) Vona langutelo leri faneleke swonghasi! Swiyimo swin’wana swa cinca. Vana va kula. Vanghana va vukati lava kanetaka minkarhi yin’wana va wu amukela ntiyiso. Swa tiveka leswaku swiyimo swa timali swa cinca. Vavabyi va nga hlakarhela. Eka swiyimo swin’wana, swi nga endleka swilo swi nga cinci ku ko ku fika misava leyintshwa ya Yehovha. Hambi swi ri tano, xana swi pfuna yini ku vilela hi leswi u nga swi kotiki ku endla leswi van’wana va swi kotaka?

Xana u tshama u hlalela swinyenyana leswi hahaka empfhukeni, u navela vuxongi ni ntshunxeko wa ku haha-haha ka swona? Kumbexana a wu navela onge u nga haha ku fana na swona. Hambi swi ri tano, u nge swi koti ni siku ni rin’we ku haha ku fana na swona! Kambe swi nga endleka u nga vileli ha swona. Ku ri na sweswo, wa tsaka hi vuswikoti lebyi u nyikiweke byona hi Xikwembu. U kota ku hanya kahle u ri emisaveni. Hi ku fanana, ku nga khathariseki leswaku xiyimo xa hina hi xihi evuton’wini, loko hi anakanyisisa swinene hi leswi hi nga swi endlaka, ematshan’wini yo vilela hi leswi hi nga swi kotiki, hi ta va ni vutomi lebyi enerisaka, naswona ku endla ntirho wa Yehovha swi ta hi tsakisa.—Pisalema 126:5, 6.

[Xifaniso lexi nga eka tluka 28]

Xana u vona onge vatswari va wena va ku pfalela ehokweni?