Ha Yini U Fanele Ku Nyika Yehovha?

DYAMBU a ri ri karhi ri vangama exidorobaneni xa Sarepta, eSidoni, wansati wa noni a a ri eku rhoteleni ka tihunyi. A a lava ku tshivela ndzilo leswaku a ta sweka swakudyanyana—swi nga endleka leswaku a ku ri swakudya swa makumu eka yena ni n’wana wakwe wa mufana. U kayakayekile a ringeta ndlela ya ku tihanyisa, yena na n’wana wakwe wa mufana hi nkarhi wa dyandza ni ndlala leyi nga teka nkarhi wo leha kutani sweswi a va ri emaxangwini lawa. A va sika.

Ku te wanuna. Vito ra yena a a ri Eliya naswona hi ku hatlisa wansati loyi wa noni u swi vonile leswaku i muprofeta wa Yehovha. Swi vonaka onge a a twile hi ta Xikwembu lexi. Yehovha a a hambanile na Baali loyi vugandzeri byakwe bya tihanyi, lebyi hombolokeke a a byi tolovelekile etikweni ra rikwavo ra Sidoni. Xisweswo loko Eliya a n’wi kombele mati yo nwa, a a tiyimisele ku n’wi pfuna. Kumbexana u vone leswaku a a ta amukela tintswalo ta Yehovha hi ku endla tano. (Matewu 10:41, 42) Kambe hiloko Eliya a kombela swakudya—leswi engetelekeke. Wansati u hlamusele leswaku leswi a swi sele a swi ri swa makumu. Kambe Eliya u phikelerile, a n’wi tiyisekisa hileswaku Yehovha a a ta n’wi phamela hi ndlela ya mahlori ku kondza dyandza ri hela. Xana u endle yini? Bibele yi ri: “Wansati a famba a ya endla hi laha Elia a ṅwi byeleke ha kona.” (1 Tihosi 17:10-15) Marito lawa ma twisisekaka hi ku olova ma hlamusela xiendlo lexikulu xa ripfumelo—entiyisweni a ri ri rikulu lerova Yesu Kreste u bumabumele wansati yoloye wa noni kwalomu ka gidi ra malembe endzhaku!—Luka 4:25, 26.

Hambiswiritano, swi nga ha twakala swi nga twisikeki leswaku Yehovha a nga lava swo tala hi ndlela yoleyo eka wansati la pfumalaka. Leswi swi tano ngopfu-ngopfu loko hi ehleketa hi xikhongelo lexi nga tshama xi endliwa hi wanuna wa ndhuma swinene. Minyikelo leyi Hosi Davhida a nga yi hlengeletela n’wana wa yena Solomoni leswaku a ta yi tirhisa eku akeni ka tempele, yi susumetele ku hanana lokukulu. Manguva lawa, tinyiko leti nyikeriweke a ti ta endla magidi-gidi ya timiliyoni ya tirhandi! Hambiswiritano, Davhida exikhongelweni xakwe eka Yehovha, u te: “Nḍi mani šana, ni tiko ra nga i rihi šana, leŝaku hi tiv̌a ku humesa ŝilo leŝi? Hikuv̌a hikwaŝo ŝi huma ka wena, kutani leŝi hi ku humeselaka ŝona hi nyikiwile hi v̌oko ra wena.” (1 Tikronika 29:14) Hilaha Davhida a vuleke hakona, swilo hinkwaswo swi huma eka Yehovha. Xisweswo, loko hi nyikela leswaku vugandzeri lebyi tengeke byi yisiwa mahlweni, kahle-kahle hi tlherisela Yehovha swilo leswi ana swi nga swa yena. (Pisalema 50:10) Xisweswo ku tlakuka xivutiso, Ha yini Yehovha a lava leswaku hi nyika?

I Xiphemu Xa Nkoka Xa Vugandzeri Bya Ntiyiso

Nhlamulo leyi kongomeke hi leswaku Yehovha u endle ku nyika ku va xiphemu xa nkoka xa vugandzeri bya ntiyiso. Avele wanuna wa ripfumelo u nyikele hi swin’wana swa swifuwo swa yena swa risima eka Yehovha. Vapatriarka Nowa, Abrahama, Isaka, Yakobo na Yobo va endle magandzelo yo kota wolawo.—Genesa 4:4; 8:20; 12:7; 26:25; 31:54; Yobo 1:5.

Nawu wa Muxe wu simeke ni ku lawula ndlela leyi minyikelo a yi ta nyikeriwa ha yona eka Yehovha. Hi xikombiso, Vaisrayele hinkwavo a va lerisiwe ku humesa vukhume kumbe va nyikela hi xiphemu xa vukhume xa ntshovelo wa le masin’wini ni xa ku andza ka swifuwo swa vona. (Tinhlayo 18:25-28) Minyikelo yin’wana a yi nga lawuriwi ngopfu. Hi xikombiso, Muisrayele un’wana ni un’wana a swi laveka leswaku a nyika Yehovha swirhangana swa swifuwo ni ntshovelo wa yena. (Eksoda 22:29, 30; 23:19) Kambe Nawu a wu swi tshikela eka munhu hi yexe ku vona leswaku u ta nyikela hi swirhangana swo tanihi kwihi, ntsena loko a nyikela hi leswinene leswi a nga na swona. Nawu a wu tlhela nakambe wu pfumelela magandzelo ya ku nkhensa ni ya ku tiboha hi ku hlambanya, lama a ma endliwa hi ku tirhandzela hi laha ku heleleke. (Levhitika 7:15, 16) Yehovha u khutaze vanhu vakwe leswaku va nyikela hi ndzingano lowu a va katekiseke ha wona. (Deteronoma 16:17) Hilaha a swi ri hakona loko ku akiwa tabernakele ivi ku landzela tempele endzhaku, un’wana ni un’wana u nyikele hi ku ya hi leswi mbilu yakwe a yi n’wi susumeta ku nyikela hakona. (Eksoda 35:21; 1 Tikronika 29:9) Hakunene minyikelo yo tano ya ku tirhandzela a yi tsakisa Yehovha swinene!

Ehansi ka “nawu wa Kriste” ku hanana hinkwako a ku fanele ku va ka ku tirhandzela. (Vagalatiya 6:2; 2 Vakorinto 9:7) Sweswo a swi vuli swona leswaku valandzeri va Kreste va tshikete ku hanana kumbe a va hanana katsongo. Nikatsongo! Loko Yesu ni vaapostola vakwe va ri karhi va chumayela eIsrayele, ntlawa wa vavasati wu va landzerile kutani wu va tirhela wu tirhisa swilo swa wona ku va pfuna. (Luka 8:1-3) Hi ku fanana muapostola Pawulo u nyikiwe tinyiko leti ti nga n’wi pfuna entirhweni wakwe wa vurhumiwa, naswona u tlhele a khutaza mavandlha man’wana leswaku ma nyikela eka lava va pfumalaka. (2 Vakorinto 8:14; Vafilipiya 1:3-5) Huvo leyi fumaka ya le Yerusalema yi avele vavanuna lava nga ni vutihlamuleri ku tiyisekisa leswaku swilo leswi ku nyikeriweke hi swona swi averiwa lava pfumalaka. (Mintirho 6:2-4) Swi le rivaleni leswaku Vakreste vo sungula va swi teke swi ri lunghelo ku seketela vugandzeri lebyi tengeke hi tindlela to tano.

Hambiswiritano, hi nga ha hlamala leswaku hikwalaho ka yini Yehovha a endla ku hanana ku va xiphemu xa vugandzeri byakwe. Xiya swivangelo swa mune.

Lexi Endlaka Leswaku Hi Hanana

Xo sungula, Yehovha u endla ku hanana ku va xiphemu xa vugandzeri bya ntiyiso hikuva ku endla tano i swinene eka hina. Swi kandziyisa ku tlangela ka hina vunene bya Xikwembu. Hi xikombiso lexi, hikwalaho ka yini mutswari a n’wayitela hi ku tsaka loko n’wana a n’wi xavela kumbe a n’wi endlele nyiko? Xana nyiko yeleyo yi kota ku enerisa xilaveko xo karhi lexikulu lexi nkarhi wun’wana mutswari a a nga ta kota ku langutana na xona? Kumbexana a swi tano. Ematshan’weni ya sweswo, mutswari u tsakela ku vona n’wana a hlakulela moya wo tlangela ni wa ku hanana. Hilaha ku fanaka, Yehovha u hi khutaza ku hanana naswona wa tsaka loko hi endla tano. Hi yona ndlela leyi hi nwi kombisaka ha yona leswaku ha byi tlangela hakunene vunene bya yena lebyi nga pimanisiwiki na nchumu ni ku hanana ka yena eka hina. I munyiki wa “nyiko yin’wana ni yin’wana leyo saseka ni minkateko hinkwayo leyi hetisekeke,” hikokwalaho a hi nge pfuki hi heleriwe hi swivangelo swa ku n’wi nkhensa. (Yakobo 1:17) Ku tlula kwalaho, Yehovha u nyikele hi N’wana wa yena la rhandzekaka, a n’wi pfumelela ku fa leswaku hi kota ku hanya hilaha ku nga heriki. (Yohane 3:16) Xana hi nga n’wi nkhensa hilaha ku ringaneke?

Xa vumbirhi, loko hi endla ku hanana ku va mukhuva, xisweswo hi dyondza ku tekelela Yehovha na N’wana wakwe Yesu Kreste hi ndlela leyikulu. Yehovha wa hanana nkarhi hinkwawo, wa hanana nkarhi hinkwawo. Hi laha Bibele yi vulaka hakona, u hi nyika “vutomi, ni ku hefemula, ni swilo hinkwaswo.” (Mintirho 17:25) Hilaha ku faneleke hi nga n’wi nkhensa hikwalaho ka moya lowu hi wu hefemulaka, hinkwaswo swakudya leswi hi swi dyaka, nkarhi wun’wana ni wun’wana lowu tsakisaka ni lowu enerisaka evuton’wini. (Mintirho 14:17) Yesu, ku fana ni Tata wakwe u kombise moya wa ku hanana. U tinyikele hi ku swi rhandza. Xana a wu swi tiva leswaku loko Yesu a endla mahlori a a lahlekeriwa hi swokarhi? Makhamba ma nga ri mangani Matsalwa ma hi byela leswaku loko a hanyisa vanhu lava vabyaka, matimba a ‘ma huma eka yena.’ (Luka 6:19; 8:45, 46) Yesu a a hanana lerova u nyikele hi moya-xiviri wa yena n’wini, vutomi byakwe ku yisa eku feni.—Esaya 53:12.

Xisweswo, loko hi hanana ku nga khathariseki leswaku hi hanana hi nkarhi wa hina, matimba ya hina kumbe swilo swa hina, hi tekelela Yehovha naswona hi tsakisa mbilu yakwe. (Swivuriso 27:11; Vaefesa 5:1) Naswona hi landzela xikombiso lexinene xa vanhu lexi Yesu Kreste a nga hi siyela xona.—1 Petro 2:21.

Xa vunharhu, ku hanana ku hlangavetana ni swilaveko leswikulu ni swa nkoka. I ntiyiso leswaku Yehovha a nga swi kota ku hetisisa swilaveko swa Mfumo hi ku olova handle ka mpfuno wa hina, tanihi leswi a a ta swi kota ku endla leswaku maribye ma huwelela ematshan’weni ya ku tirhisa hina leswaku hi chumayela rito. (Luka 19:40) Kambe u hlawule ku hi fundzha hi ku hi nyika malunghelo lawa. Xisweswo, loko hi hanana hi swilo swa hina leswaku hi yisa swilaveko swa Mfumo emahlweni, hi na ku eneriseka lokukulu ka ku tiva leswaku hi endla xiphemu lexikulu eka ntirho wa nkoka swinene lowu endliwaka emisaveni.—Matewu 24:14.

Swi le rivaleni leswaku mali ya laveka ku hakelela ntirho wa misava hinkwayo wa Timbhoni ta Yehovha. Hi lembe ra ntirho ra 1995, Sosayiti yi tirhise ku lava ku ringana R260 wa timiliyoni, ku khathalela ntsena maphayona lama hlawulekeke, varhumiwa ni valanguteri lava famba-fambaka eswiavelweni swa vona swa vutirheli. Hambiswiritano, yoleyo i mali yitsongo loko yi ringanisiwa ni ku akiwa xikan’we ni ku tirha ka tihofisi ta marhavi ni tindhawu ta ku kandziyisa ta misava hinkwayo. Kambe hinkwaswo sweswo swa koteka hikwalaho ka minyikelo ya ku tirhandzela!

Vanhu va Yehovha a va swi teki hi ku olova leswaku loko vona va pfumala, va nga ha tikisela van’wana hi ndzhwalo. Langutelo ro tano ri nga hi vangela leswaku hi kayela eka xiphemu lexi xa vugandzeri bya hina. Hi ku ya hi muapostola Pawulo, Vakreste va le Makedoniya a va ri “evusiwaneni lebyikulu.” Kambe va kombele ku va ni lunghelo ra ku hanana. Naswona Pawulo u tiyisa vumbhoni bya leswaku, leswi va nga swi nyika a swi ri “hinkwaswo leswi a va ri na swona”!—2 Vakorinto 8:1-4.

Xa vumune, Yehovha u endle ku nyika ku va xiphemu xa vugandzeri bya ntiyiso hikuva ku hanana ku ta hi pfuna hi tshama hi tsakile. Yesu hi byakwe u te: “Ku nyika i nkateko lowu tlulaka ku nyikiwa.” (Mintirho 20:35) Hi yona ndlela leyi Yehovha a hi vumbeke ha yona. I xin’wana xa swivangelo leswi swi nga hi endlaka hi titwa leswaku, ku nga khathariseki leswaku hi nyikela ku fikela kwihi eka yena, a hi nge pfuki hi ku ringanise ni ku tlangela loku hi nga na kona hi yena etimbilwini ta hina. Hambiswiritano, lexi tsakisaka hileswaku Yehovha a nga langutelanga leswi tlulaka leswi hi nga nyikelaka ha swona. Hi nga tiyiseka leswaku wa tsaka loko hi tsakisiwa hi leswi hi nga swi kotaka!—2 Vakorinto 8:12; 9:7.

Moya Wa Ku Hanana Wu Tisa Mikateko

Loko hi tlhelela eka xikombiso lexiya xo sungula, a hi nge wansati wa noni wa le Sarepta a a tibyele leswaku u kona un’wana la nga ta khathalela xilaveko xa Eliya xa swakudya. Vona mikateko leyi a ta va a lahlekeriwe hi yona!

A swi kanakanisi leswaku Yehovha u katekisa lava kombisaka moya wa ku nyika. (Swivuriso 11:25) Wansati wa noni wa le Sarepta a nga xanisekanga hikwalaho ka ku nyikela hileswi a nga ehleketa leswaku a ku ri swakudya swakwe swa makumu. Yehovha u n’wi hakele hi ndlela ya hlori. Hi laha Eliya a tshembiseke hakona, timbita ta yena ta mapa ni ta mafurha ti tshame ti tele ku fikela loko dyandza ri herile. Kambe u tlhele a kuma hakelo leyikulu. Eliya, wanuna wa Xikwembu xa ntiyiso u n’wi pfuxele n’wana wa yena loyi a file hikwalaho ka vuvabyi. Vona ndlela leyi sweswo swi n’wi akeke ha yona emoyeni!—1 Tihosi 17:16-24.

Namuntlha a hi langutelanga ku katekisiwa hi mahlori. (1 Vakorinto 13:8) Kambe Yehovha wa hi tiyisekisa leswaku u ta hlayisa lava n’wi tirhelaka hi mbilu hinkwayo. (Matewu 6:33) Xisweswo, emhakeni yoleyo hi nga fana ni wansati wa noni wa le Sarepta, hi nyika hi ku tirhandzela, hi tiyiseka leswaku Yehovha u ta hi khathalela. Hilaha ku fanaka, hi nga tsakela mbuyelo lowukulu wa moya. Loko ku hanana ka hina ku ri ka nkarhi hinkwawo, ku nga ri ka xiwelo, ka xitshuketa, swi ta hi pfuna leswaku hi nga languti swo tala naswona hi tshama hi langute eka swilaveko swa Mfumo hilaha Yesu a vuleke hakona. (Luka 11:34; ringanisa 1 Vakorinto 16:1, 2.) Nakambe swi ta hi pfuna leswaku hi titwa hi ri ekusuhi na Yehovha na Yesu, hi ri vatirhi-kulobye na vona. (1 Vakorinto 3:9) Naswona swi ta engetela eka moya wa ku hanana, moya wa ku hanana lowu ana wu funghaka vagandzeri va Yehovha emisaveni hinkwayo.

[Bokisi leri nga eka tluka 31]

TINDLELA LETI VAN’WANA VA HLAWULAKA KU NYIKELA HA TONA

MINYIKELO ENTIRHWENI WA MISAVA HINKWAYO

Vo tala va vekela etlhelo kumbe va hlengeleta mali leyi va nga ta yi nghenisa emabokisini ya minyikelo eHolweni ya Mfumo. N’hweti na n’hweti mavandlha ma rhumela minyikelo leyi hi ku kongoma eyindlu-nkulu eBrooklyn, eNew York, kumbe ehofisini ya rhavi ya le kusuhi.

Minyikelo ya ku tirhandzela na yona yi nga ha rhumeriwa hi ku kongoma eka Treasurer’s Office, Watch Tower Bible and Tract Society of Pennsylvania, 25 Columbia Heights, Brooklyn, New York 11201-2483, kumbe ehofisini ya rhavi ra Sosayiti leyi langutelaka tiko ra ka n’wina. Swin’wetsin’wetsi kumbe swilo swin’wana swa nkoka na swona swi nga ha nyikeriwa. Minyikelo yo tano yi fanele ku fambisana ni papila ro koma leri hlamuselaka leswaku leyi i nyiko.

LUNGHISELELO RA MINYIKELO YA KU YA HI SWIYIMO

Mali yi nga nyikiwa Sosayiti ya Watch Tower leswaku yi yi hlayisa ku kondza loyi a yi nyikeleke a lova, swi endliwa hi lunghiselelo ra leswaku loko munhu wa kona a yi lava, yi ta tlheriseriwa eka yena.

NYIKO LEYI KUNGUHATIWEKE

Ku engetela eka minyikelo leyi kongomeke ni minyikelo ya mali ya ku ya hi swiyimo, ku na tindlela tin’wana ta ku nyikela leti vuyerisaka ntirho wa Mfumo wa misava hinkwayo. Leti ti katsa:

Ndzindza-khombo: Sosayiti ya Watch Tower yi nga ha tsarisiwa tanihi leyi nga ta vuyeriwa eka fambiselo ra ndzindza-khombo wa vutomi, eku kunguhateni ka ntirho kumbe mudende. Sosayiti yi fanele yi tivisiwa hi lunghiselelo rihi na rihi ro tano.

Mali Leyi Lombisiweke Hi Ntswalo: Mali leyi lombisiweke hi ntswalo yi nga nyikeriwa eka Sosayiti ya Watch Tower tanihi munyikelo yi ri hinkwayo kumbe hi lunghiselelo ra leswaku ntswalo wa yona wu ta hamba wu nyikiwa munhu la yi nyikeleke.

Purasi: Purasi leri xavisiwaka ri nga ha nyikeriwa eka Sosayiti ya Watch Tower tanihi nyiko leyi heleleke kumbe hi ntwanano wa leswaku a ri nge tekiwi loko loyi a ri nyikeleke a ha tshama ka rona, a ha hanya. Munhu u fanele a tivisa Sosayiti a nga si nyikela ndhawu yo karhi eka Sosayiti.

Swiboho: Nhundzu kumbe mali swi nga ha nyikiwa Sosayiti ya Watch Tower hi ku tirhisa xileriso xa mufi lexi nga enawini. Kopi ya xiboho lexi yi fanele yi rhumeriwa eka Sosayiti.

Lava va lavaka ku tiva hi man’wana ya malunghiselelo ya tinyiko leti kunguhatiweke, va fanele va vulavurisana na Treasurer’s Office eka adirese leyi nga laha hansi kumbe eka hofisi ya Sosayiti leyi langutelaka tiko ra ka n’wina. Treasurer’s Office yi fanele yi rhumeriwa kopi ya matsalwa ya le nawini lama faneleke, lama yelanaka ni malunghiselelo lawa.

TREASURER’S OFFICE

Watch Tower Bible And Tract Society Of Pennyslvania

Private Bag X2067, Krugersdorp, 1740

Riqingho: (011) 761-1000