Ku Pfuna Van’wana Ku Gandzela Xikwembu
“Loko . . . ku nghena munhu ntsena [kumbe] la nga riki mupfumeri, . . . swihundla swa mbilu ya yena swi ta humeseriwa erivaleni, kutani u ta wa hi mombo, a gandzela Xikwembu.”—1 VAKORINTO 14:24, 25.
1-3. Xana vo tala eKorinto va pfuniwe hi ndlela yihi ku kuma ku amukeriwa hi Xikwembu ke?
EKA pfhumba ra yena ra vumbirhi ra vurhumiwa, muapostola Pawulo u tshame emutini wa Korinto lembe na hafu. Kona a a ‘khomekile swinene hi rito, a veka vumbhoni.’ Hi vuyelo byihi ke? “Vakorinto lavo tala, loko va twa Rito, va pfumela, va va va khuvuriwa.” (Mintirho 18:5-11) Va ve ‘lava hlawuriweke . . . , va vuriwa vanhu lava kwetsimaka.’—1 Vakorinto 1:2.
2 Endzhakunyana Apolosi u endzele Korinto. Eku sunguleni, Prisila na Akwila va n’wi pfune ku twisisa “swinene-nene Ndlela ya Xikwembu,” ku katsa ni mhaka ya nkhuvulo. Xisweswo u ve Mukriste la nga ni minkateko kumbe ku amukeriwa hi Xikwembu. (Mintirho 18:24-19:7) Hi ku fanana, Apolosi u pfune Vakorinto lava nga tshama va ‘hambukiseriwa eka swikwembu leswi nga vulavuriki.’ (1 Vakorinto 12:2) Vanhu lava kumbexana a va nyikiwe dyondzo ya Bibele emakaya ya vona; a va ta tlhela va dyondza hi ku va kona eminhlanganweni ya Vukriste.—Mintirho 20:20; 1 Vakorinto 14:22-24.
3 Vuyelo bya ku dyondzisa ko tano a ku ri leswaku vo tala lava khale a ku ri ‘lava nga pfumelangiki kumbe vanhu ntsena’ va kokeriwe evugandzerini bya ntiyiso. Swi fanele swi phyuphyise swonghasi ku vona vavanuna ni vavasati va endla nhluvuko lowu yisaka eku khuvuriweni ni le ku amukeriweni hi Xikwembu! Leswi swa ha tsakisa.
Ku Pfuna ‘Lava Nga Riki Vapfumeri Ni Vanhu Ntsena’
4. Vo tala namuntlha va pfuniwa hi tindlela tihi ku fana ni lavaya va le Korinto?
4 Timbhoni ta Yehova na tona namuntlha ti yingisa xileriso xa Yesu xo ‘endla vadyondzisiwa hi vanhu va matiko hinkwawo, va va khuvula.’ (Matewu 28:19, 20) Endzhaku ko byala timbewu ta ntiyiso etimbilwini leti amukelaka, va tlhelela va ya ti cheleta. (1 Vakorinto 3:5-9; Matewu 13:19, 23) Timbhoni ti nyikela tidyondzo ta mahala ta le kaya ta Bibele ta vhiki na vhiki leswaku vanhu va ta hlamuriwa swivutiso swa vona ni leswaku va kota ku dyondza mintiyiso ya Bibele. Vanhu vo tano va tlhela va rhamberiwa ku va kona eminhlanganweni ya kwalaho ya Timbhoni ta Yehova, ku fana na leswi “lava nga riki vapfumeri” va lembe xidzana ro sungula va hlanganyeleke eKorinto. Kambe xana Timbhoni ta Yehova ti fanele ti va langutisa ku yini vanhu lava va dyondzaka Bibele ni lava va taka eminhlanganweni?
5. I xisekelo xihi xa Matsalwa lexi nga kona xo tivonela eku hanyisaneni ni vanhu vo karhi?
5 Ha tsaka ku va vona va tshinelela Xikwembu. Hambi swi ri tano, hi tsundzuka leswaku a va si va vapfumeri lava khuvuriweke. Nakambe tsundzuka tidyondzo timbirhi leti seketeriweke exihlokweni lexi hundzeke. (1) Vaisrayele va kombise ku tivonela eka valuveri lava, hambi leswi a va ri na vanhu va Xikwembu ni ku yingisela milawu yin’wana, a va nga ri vaproselita lava yimbisiweke, vamakwerhu evugandzerini. (2) Vakriste va le Korinto lava hanyisanaka ni ‘lava nga riki vapfumeri ni vanhu ntsena’ a va xalamukile hikwalaho ka marito ya Pawulo lama nge: “Mi nga rhwaleni mpingu wun’we ni lava nga riki vapfumeri; hikuva ku tirhisana ku kwihi exikarhi ka ku lulama ni ku homboloka xana?”—2 Vakorinto 6:14.
6. Xana “lava va nga riki vapfumeri” va nga “tshinyiwa” hi ndlela yihi hi minhlangano, naswona i muxaka muni wa ku tshinya ko tano?
6 Kutani hambi loko hi amukela ‘lava nga riki vapfumeri kumbe vanhu ntsena,’ ha swi xiya leswaku a va si pfumelelana ni mimpimanyeto ya Xikwembu. Hi laha Bibele yi kombisaka ha kona eka 1 Vakorinto 14:24, 25, (NW) vanhu vo tano va nga ha lava ku “kamberiwa swinene,” hambi ku ri “ku tshinyiwa,” hi leswi va swi dyondzaka. Ku tshinya ko tano a hi ka muxaka wo avanyisa; naswona hikwalaho a va vitaneriwi emahlweni ka komiti yo avanyisa ya bandlha tanihi leswi va nga si vaka swirho leswi khuvuriweke swa rona. Ku ri na sweswo, hikwalaho ka leswi va swi dyondzaka, vanhu lava vantshwa va sungula ku khorwiseka leswaku Xikwembu xi yirisa tindlela tihi na tihi ta vutianakanyi ni ta vunghwavava.
7. I nhluvuko wihi lowu engetelekeke lowu swichudeni swo tala swi lavaka ku wu endla naswona ha yini ke?
7 Vanhu vo tala lava nga khuvuriwangiki hi nkarhi lowu faneleke va nga ha lava ku endla leswi tlulaka ku va kona eminhlanganweni ntsena tanihi vadyondzi lava tsakelaka. Marito lawa ya Yesu ma kombisa xivangelo: “Mudyondzisiwa a nga tluli mudyondzisi wa yena; kambe mudyondzisiwa un’wana ni un’wana la dyondzekeke swinene, u ta va tanihi mudyondzisi wa yena.” (Luka 6:40) Xichudeni xa Bibele xi nga swi vona leswaku mudyondzisi wa xona u teka vutirheli bya nsimu tanihi lebyi nga bya nkoka naswona u kuma ntsako eka byona. (Matewu 24:14) Kutani, hi ripfumelo leri kulaka, munhu loyi a a ri karhi a dyondza mintiyiso ya Bibele ni ku va kona eminhlanganweni a nga ma nghenisa embilwini marito lama nge: “Yi sasekile ŝongasi e tinṭhav̌eni, e milenge ya loyi a tisaka timhaka to nanḍiha, l’a v̌ulav̌ulaka ŝo rula, ya loyi a tisaka timhaka le’ti ṭakisaka, loyi a v̌ulaka ŝa v̌utomi.” (Esaya 52:7; Varhoma 10:13-15) Hambi loko a nga khuvuriwanga, a nga ha lava ku va muhuweleri wa Mfumo a tinamarheta eka bandlha ra Timbhoni ta Yehova.
8, 9. (a) Xana ku fanele ku endliwa yini loko xichudeni xa Bibele xi lava ku hlanganyela evutirhelini bya le rivaleni? (b) Loko vakulu vambirhi va hlangane ni loyi a languteriwaka ku va muhuweleri ni mudyondzisi wakwe, va ta endla yini ke? (c) I vutihlamuleri byihi lebyi muhuweleri lontshwa a byi rhwalaka?
8 Loko Mbhoni leyi fambisaka dyondzo ya Bibele yi kuma leswaku xichudeni lexi xi navela ku hlanganyela entirhweni wa nsimu, yi nga vulavula hi mhaka leyi ni mulanguteri la ungamelaka, loyi a nga ta lunghiselela vakulu vambirhi leswaku va hlangana na xichudeni lexi xa Bibele ni mudyondzisi wa xona. Vakulu va tsaka loko munhu lontshwa a lava ku tirhela Xikwembu. Va nge n’wi languteli leswaku a va ni mpimo wa vutivi lebyi nga na lavaya va khuvuriweke ni lava va endleke nhluvuko entiyisweni, lava ku lavekaka swo tala eka vona. Hambi swi ri tano, vakulu va ta lava ku vona leswaku emahlweni ka ku va munhu lontshwa a hlanganyela evutirhelini bya nsimu ni bandlha, u na vutivi bya tidyondzo ta Bibele naswona u twananise vutomi byakwe ni misinya ya milawu ya Xikwembu. Xisweswo i swivangelo leswinene leswi vakulu vambirhi va hlanganaka ni loyi a languteriweke ku va muhuweleri ni Mbhoni leyi fambisaka dyondzo.a
9 Vakulu lava vambirhi va ta tivisa xichudeni lexi leswaku loko xi faneleka naswona xi hlanganyela entirhweni wa nsimu, xi nga ha tisa xiviko xa ntirho wa nsimu naswona khadi ra Rhekhodo ya Muhuweleri wa Bandlha ri ta endliwa hi vito ra xona. Leswi swi ta kombisa ku amukeriwa ka yena hi nhlengeletano ya le tilweni ya Timbhoni ta Yehova ni ku titsongahatela yona. (Leswi swi ta tlhela swi va tano hi lavan’wana hinkwavo lava tisaka swiviko swa ntirho wa nsimu.) Bulo ri fanele ku tlhela ri hlanganisa ndzayo ya Bibele, yo tanihi leyi yi andlariweke eka matluka 98 na 99 ya Organized to Accomplish Our Ministry.b Hikwalaho, lowu a wu ta va nkarhi lowu faneleke wa leswaku xichudeni lexi xi kuma kopi ya munhu hi xiyexe ya buku yoleyo.
10. (a) Muhuweleri la nga siki khuvuriwaka a nga hambeta a endla nhluvuko hi ndlela yihi, naswona a ri na pakani yihi ke? (b) Ha yini ku lulamisa ku endliwile malunghana ni marito lama nge “nakulorhi la amukelekaka”? (Vona nhlamuselo.)
10 Munhu loyi a fanelekeke tanihi muhuweleri la nga khuvuriwangiki wa mahungu lamanene u ye etlhelweni ra ku va ‘munhu la katekeke.’c (Luka 2:14) Hambileswi a nga tinyiketelangiki ni ku khuvuriwa, se a nga vika ntirho wakwe wa ku veka vumbhoni kun’we ni timiliyoni ta vanhu lava gingiritekaka emisaveni hinkwayo lava ‘twarisaka rito ra Xikwembu.’ (Mintirho 13:5; 17:3; 26:22, 23) Xitiviso xa leswaku i muhuweleri lontshwa la nga khuvuriwangiki xi nga endliwa ebandlheni. U fanele ku hambeta a dyondza Bibele, a hlanganyela eminhlanganweni, a tirhisa leswi a swi dyondzaka, ni ku avelana ni van’wana. Ku nga ri kungani, u ta lava ku teka goza ra nkhuvulo wa Vukriste, xisweswo a amukeriwa hi Xikwembu ivi a ‘fungheriwa’ ku pona.—Ezekiel 9:4-6.
Mpfuno Wa Munhu La Dyohaka
11. Xana bandlha ri hanyisana njhani na vadyohi lava khuvuriweke ke?
11 Exihlokweni lexi hundzeke, hi bule hi malunghiselelo ya bandlha yo pfuna Mukriste un’wana ni un’wana la khuvuriweke la endlaka xidyoho lexikulu. (Vaheveru 12:9-13) Naswona hi swi vonile eBibeleni leswaku loko mudyohi la khuvuriweke a nga hundzuki, bandlha ri nga ha fanela ku n’wi hlongola ivi endzhaku ka kwalaho ri papalata vuxaka byihi na byihi na yena. (1 Vakorinto 5:11-13; 2 Yohane 9-11; 2 Vatesalonika 2:11, 12) Kambe, i magoza wahi lama nga tekiwaka loko muhuweleri la nga khuvuriwangiki a hoxa kumbe ku dyoha swinene?
12. (a) Ha yini mpfuno na musa wu ri kona ni le ka vahuweleri lava nga khuvuriwangiki lava dyohaka? (b) Xana nsinya wa nawu lowu nga eka Luka 12:48 wu nga yelanisa ku yini ni ku tihlamulela eka xidyoho ke?
12 Yuda u khutaze leswaku tintswalo ti kombisiwa eka Vakriste lava totiweke lava vumbeke minkanakano kumbe lava weleke eswidyohweni swa nyama, loko va hundzuka ntsena. (Yuda 22, 23; nakambe vona 2 Vakorinto 7:10.) Manuku ke, xana a swi nga ta fanela swinene leswaku tintswalo ti kombisiwa eka munhu la dyohaka la nga khuvuriwangiki loyi a kombisaka ku hundzuka? (Mintirho 3:19) Ina, hikuva masungulo ya yena ya moya a ma tiyanga ngopfu, naswona ntokoto wakwe evuton’wini bya Vukriste wu hikiwile swinene. A nga ha va a nga dyondzanga mianakanyo ya Xikwembu etimhakeni tin’wana. A nga si nghena eminxaxamelweni ya mabulo ya Bibele ya le mahlweni ka nkhuvulo ni vakulu, naswona a nga si tiveka ehansi ka goza lerikulu ra ku nghenisiwa ematini. Ku tlula kwalaho, Yesu u vule leswaku “un’wana ni un’wana la nyikiweke ngopfu, ku ta laviwa ngopfu eka yena.” (Luka 12:48) Kutani ke, ku languteriwa swo tala eka vanhu lava khuvuriweke lava, kun’we ni vutivi ni minkateko leyi engetelekeke, va nga na vutihlamuleri lebyi hlawulekeke.—Yakobo 4:17; Luka 15:1-7; 1 Vakorinto 13:11.
13. Loko muhuweleri la nga khuvuriwangiki a dyoha, xana vakulu va ta endla yini leswaku va n’wi pfuna?
13 Ku pfumelelana ni xitsundzuxo xa Pawulo, vamakwerhu lava fanelekaka emoyeni va lava ku pfuna muhuweleri un’wana ni un’wana la nga khuvuriwangiki loyi a tekaka goza leri hoxeke a nga si swi xiya. (Ringanisa Vagalatiya 6:1.) Vakulu va nga kombela vambirhi va vona (kumbexana lavaya va nga hlangana na yena eku sunguleni) leswaku va ringeta ku n’wi lulamisa loko a lava ku pfuniwa. Va ta endla tano, ku nga ri hikwalaho ka ku navela ku tshinya hi tihanyi, kambe hi ndlela ya tintswalo ni moya wa musa. (Psalma 130:3) Etimhakeni to tala, ku khongotela ka Matsalwa ni swiringanyeto leswinene swi ta va swi ringene ku humesa ku hundzuka ivi swi n’wi veka endleleni leyi lulameke.
14, 15. (a) Ku nga ha endliwa yini loko mudyohi a hundzukile hakunene? (b) I nhlamuselo yihi leyi hikiweke leyi nga erivaleni leyi yi nga ha endliwaka etimhakeni tin’wana?
14 Vakulu lava vambirhi va ta nyikela vukongomisi lebyi faneleke eka xiyimo xa mudyohi la nga khuvuriwangiki. Etimhakeni tin’wana, va nga ha lunghiselela leswaku munhu loyi a dyohaka a nga vi kona eka Xikolo xa Vutirheli bya le Tilweni ku ringana nkarhi wo karhi kumbe ku pfumeleriwa ku hlamula eminhlanganweni. Kumbe va nga n’wi byela leswaku a nga hlanganyeli evutirhelini bya le rivaleni na bandlha ku kondza loko a endle nhluvuko lowu engetelekeke wa moya. Manuku va nga ha n’wi byela leswaku a nga tlhela a hlanganyela evutirhelini bya nsimu. Loko xidyoho xi nga dumanga naswona xi nga tisanga khombo eka ku tenga ka ntlhambi, a hi swa nkoka ku xalamukisa bandlha hi xitiviso xihi na xihi.
15 Kambe ke, ku vuriwa yini loko vakulu lava vambirhi va kuma leswaku munhu loyi u hundzuke hakunene, kambe xidyoho xi tiveka ngopfu? Kumbe ku vuriwa yini loko ku dyoha loku ku va loku tivekaka ngopfu endzhakunyana? Etimhakeni leti hinkwato, va nga tivisa Komiti ya Ntirho wa Bandlha, leyi nga ta lunghiselela xitiviso lexi olovaka, xo tanihi lexi landzelaka: “Mhaka leyi khumbaka . . . yi tameriwile, naswona u hambeta a tirha na bandlha tanihi muhuweleri la nga khuvuriwangiki.” Tanihi le timhakeni to tano hinkwato, huvo ya vakulu yi nga kunguhata loko swi ta pfuna ku nyikela nkulumo leyi nga ni ndzayo leyi vulavulaka hi muxaka wa ku dyoha loku katsekaka nkarhi lowu taka.
16, 17. (a) I swiyimo swihi swimbirhi leswi nga ha vaka xisekelo xa xitiviso lexi hambaneke? (b) Xitiviso lexi i xa muxaka muni?
16 Nkarhi na nkarhi, muhuweleri la nga khuvuriwangiki loyi a nga mudyohi a nge wu amukeli mpfuno lowu wa rirhandzu. Kumbe muhuweleri la nga khuvuriwangiki a nga ha tiyimisela leswaku a nga swi lavi ku ya emahlweni a endla nhluvuko lowu yisaka eku khuvuriweni, ivi a tivisa vakulu leswaku a nga lavi ku xiyiwa tanihi muhuweleri. Xana ku fanele ku endliwa yini ke? Goza ro susa a ri tekiwi ehenhleni ka vanhu vo tano lava kahle-kahle va kalaka va nga si amukeriwa hi Xikwembu. Lunghiselelo ro tsema vadyohi lava nga hundzukiki ri tirha eka lava va ‘vuriwaka vamakwerhu,’ eka vanhu lava khuvuriweke. (1 Vakorinto 5:11) Kambe, xana leswi swi vula leswaku ku dyoha loku ku biwa hi makatla? E-e.
17 Vakulu va ni vutihlamuleri byo ‘risa ntlhambi wa Xikwembu lowu nge hansi ka vona.’ (1 Petro 5:2) Loko vakulu vambirhi lava nyikelaka mpfuno va xiya leswaku mudyohi la nga khuvuriwangiki a nga hundzuki naswona a nga faneleki ku va muhuweleri, va ta tivisa munhu wo tano.d Kumbe loko munhu un’wana la nga khuvuriwangiki a byela vakulu leswaku yena a nga ha tsakeli ku xiyiwa tanihi muhuweleri, va ta amukela xiboho xakwe. Etimhakeni leti hinkwato, swa fanela leswaku Komiti ya Ntirho wa Bandlha yi va ni xitiviso xo olova lexi endliweke hi nkarhi lowu faneleke, yi ku “ . . . a ka ha ri muhuweleri wa mahungu lamanene.”
18. (a) Endzhaku ka xitiviso xo tano, xana Vakriste va ta tsundzuka yini eku boheni ka makungu hi munhu hi xiyexe ka goza leri va faneleke ku ri teka? (b) Xana swa laveka ku papalata vanhu lava nga khuvuriwangiki lava nga ni nandzu wa ku dyoha ka nkarhi lowu hundzeke hi laha ku heleleke?
18 Endzhaku ka kwalaho, xana Timbhoni ti ta languta munhu yoleyo hi ndlela yihi? Phela, eyinhleni yo sungula a a ri ‘la nga pfumelangiki’ la vaka kona eminhlanganweni. Manuku u lave ku va muhuweleri ni ku fanelekela ku va muhuweleri wa mahungu lamanene. Leswi a swa ha ri tano, kutani nakambe i munhu wa misava. Bibele a yi lavi leswaku timbhoni ti papalata ku vulavula na yena, hikuva a nga susiwanga.e Hambi swi ri tano, Vakriste va ta kombisa ku tivonela malunghana ni munhu wo tano wa misava loyi a nga gandzeriki Yehova, ku fana ni leswi Vaisrayele va swi endleke malunghana na valuveri lava nga yimbangiki. Ku tivonela loku ku pfuneta ku sirhelela bandlha eka “comelanyana lexintsongo,” kumbe xirho lexi onhaka. (1 Vakorinto 5:6) Loko enkarhini wun’wana wa le ndzhaku a kombisa ku navela ntiyiso ka leswaku dyondzo ya Bibele yi khomiwa na yena, naswona leswi swi vonaka swi fanerile eka vakulu, kumbexana swi ta n’wi pfuna ku tlhela a tlangela lunghelo leronghasi leri ku nga rona ku tirhela Yehova ni vanhu Vakwe.—Psalma 100.
19. Xana vakulu va nga nyikela mpfuno wun’wana exihundleni hi ndlela yihi etimhakeni tin’wana?
19 Loko vakulu va vona leswaku munhu wo karhi wa muxaka lowu i nxungeto lowu nga tolovelekangiki entlhambini, va nga tsundzuxa lava va hlaseriwaka exihundleni. Hi xikombiso, khale ka muhuweleri loyi a nga ha va muntshwa loyi a tinyiketeleke eku pyopyiweni ni le ka vunghwavava. Ku nga khathariseki xitiviso xa leswaku a nga ha ri muhuweleri la nga khuvuriwangiki, a nga ha ringeta ku tolovelana ni vantshwa lava nga ebandlheni. Eka xiyimo xexo, vakulu va ta vulavula ni vatswari va vanhu lava nga ekhombyeni exihundleni naswona kumbexana na vona vantshwa volavo. (Vaheveru 12:15, 16; Mintirho 20:28-30) Eka mhaka ya xiwelo ya munhu loyi a kavanyetaka ni ku va ni khombo swinene, a nga byeriwa leswaku a nga amukeriwi eminhlanganweni ni leswaku ku ringeta kwihi na kwihi ko nghena ku ta tekiwa tanihi ku tlula nawu.
Ku Pfuna Vana Ku Gandzela Xikwembu
20. Vatswari va Vakriste va lunghiselela vana va vona mpfuno wihi, naswona hi vuyelo byihi ke?
20 Bibele yi nyika vatswari vutihlamuleri byo dyondzisa vana va vona hi ndlela ya ntiyiso wa Xikwembu. (Deuteronoma 6:4-9; 31:12, 13) Xisweswo, Timbhoni ta Yehova i khale ti khutaze mindyangu ya Vukriste leswaku yi va na dyondzo ya Bibele ya vhiki na vhiki. Vatswari va Vukriste va fanele va khutaza vana va vona ku endla nhluvuko lowu yisaka eku tinyiketeni ni le ku khuvuriweni ivi hi ndlela yoleyo va amukeriwa hi Xikwembu. (Swivuriso 4:1-7) Hi vona vuyelo lebyi tsakisaka emabandlheni—madzana ya magidi ya vantshwa lava vekaka xikombiso lava rhandzaka Yehova ni ku lava ku n’wi gandzela hi laha ku nga heriki.
21-23. (a) Eku sunguleni, xana ku dyoha ka n’wana ku nga tameriwa hi ndlela yihi ke? (b) Vakulu va bandlha va endla xiphemu xihi eka xiyimo xo tano xana?
21 Vatswari va Vukriste nakambe va ni vutihlamuleri lebyikulu byo laya ni ku tshinya vana va vona, va simeka minsivelo yihi na yihi kumbe ku xupula ka rirhandzu loku va ku vonaka ku fanerile. (Vaefesa 6:4; Vaheveru 12:8, 9; Swivuriso 3:11, 12; 22:15) Kambe ke, loko n’wana lontsongo loyi a a ri karhi a hlanganyela tanihi muhuweleri la nga khuvuriwangiki a katseka exidyohweni lexikulu, i nkhathalelo wa vakulu lava ‘risaka mimoya’ ya ntlhambi.—Vaheveru 13:17.
22 Kahle-kahle, ku dyoha ko tano ku fanele ku khathaleriwa hi laha swi xaxametiweke ha kona eku sunguleni eka xihloko lexi. Vakulu vambirhi va nga averiwa ku ya kambisisa mhaka yo tano. Hi xikombiso, va nga ha rhanga va vulavula ni vatswari (kumbe mutswari) hi leswi humeleleke, leswi langutelo ra n’wana loyi ri nga swona, ni magoza yo lulamisa lama tekiweke. (Ringanisa Deuteronoma 21:18-21.) Loko vatswari va Vukriste va ri karhi va tamela xiyimo xexo, vakulu va nga ha tihlanganisa na vona nkarhi na nkarhi leswaku va nyikela ndzayo leyi pfunaka, swiringanyeto ni xikhutazo xa rirhandzu.
23 Kambe, minkarhi yin’wana ku vulavurisana ni vatswari ku kombisa leswaku a swi ta va swinene ngopfu leswaku vakulu va hlangana na n’wana loyi a nga yingisiki ni vatswari. Va ri karhi va tsundzuka mindzilikana ni mimboyamelo ya vantshwa, valanguteri va ta ringeta ku laya muhuweleri lontsongo, la nga khuvuriwangiki hi musa. (2 Timotiya 2:22-26) Etimhakeni tin’wana, swi nga ha va erivaleni leswaku a nga ha faneleki ku va muhuweleri ni leswaku xitiviso lexi faneleke xi fanele ku endliwa.
24. (a) Hambi loko n’wana a hlanganyerile eku dyoheni lokukulu, i yini leswi vatswari va faneleke ku swi endla, naswona leswi va nga swi endlisa ku yini? (b) Xana leswi a swi ta tirhisa ku yini eka n’wana la susiweke?
24 Endzhaku ka kwalaho, xana vatswari va ta endla yini hikwalaho ka n’wana wa vona lontsongo la dyohaka ke? Va ha ri ni vutihlamuleri eka n’wana wa vona, hambi leswi a nga ha fanelekiki tanihi muhuweleri la nga khuvuriwangiki kumbe hambi loko a lo susiwa hikwalaho ka ku dyoha endzhaku ka nkhuvulo. Tanihi leswi va nga ta hambeta va n’wi nyika swakudya, swiambalo ni byetlelo, va fanele va n’wi dyondzisa ni ku n’wi laya hi ku ya hi Rito ra Xikwembu. (Swivuriso 6:20-22; 29:17) Vatswari va rirhandzu xisweswo va nga lunghiselela dyondzo ya le kaya ya Bibele na yena, hambi loko a susiwile.f Kumbexana u ta kuma mpfuno lowu lulamisaka swinene eku dyondzeni ka vona na yena a ri yexe. Kumbe va nga kunguhata leswaku a nga hambeta a hlanganyela eka lunghiselelo ra dyondzo ya ndyangu. Hambi leswi a hambukeke, va lava ku n’wi vona a tlhelela eka Yehova, hi laha n’wana wa vusopfa a endleke ha kona exifanisweni xa Yesu.—Luka 15:11-24.
25. Ha yini ku khathalela ni mpfuno wa rirhandzu swi kongomisiwa eka “lava nga riki vapfumeri” namuntlha ke?
25 Pakani ya ku chumayela ni ku dyondzisa ka hina i ku pfuna van’wana ku va vagandzeri lava tsakeke va Xikwembu xa ntiyiso. ‘Lava nga pfumelangiki ni vanhu ntsena’ eKorinto va susumeteriwe ku ‘wa hi mimombo ya vona ivi va gandzela Xikwembu,’ va ku: “Hakunene Xikwembu xi kona la xikarhi ka n’wina.” (1 Vakorinto 14:25) A hi ku tsakisa ka swona ku vona vanhu lavo tala va ta va ta gandzela Xikwembu! Loku i ku hetiseka loku vangamaka ka marito ya ntsumi lama nge: “Ku kwetsima a ku ve eka Xikwembu ematilweni ya le henhla, ku rhula a ku ve emisaveni eka vanhu lava xi va tsakelaka [kumbe, vanhu lava amukeriwaka hi Xikwembu].”—Luka 2:14.
[Tinhlamuselo ta le hansi]
a Un’wana wa vakulu u fanele ku va xirho xa Komiti ya Ntirho wa bandlha. Loyi un’wana a nga ha va nkulu loyi a tolovelaneke swinene ni xichudeni lexi kumbe mudyondzisi wa xona, wo tanihi mufambisi wa Dyondzo ya Buku ya Bandlha.
b Leyi humesiweke hi Watchtower Bible and Tract Society of New York, Inc., 1983.
c Nkarhi lowu hundzeke, munhu la nga khuvuriwangiki loyi a fanelekaka ku hlanganyela evutirhelini bya nsimu a a vuriwa “nakulorhi la amukelekaka.” Hambi swi ri tano, “muhuweleri la nga khuvuriwangiki” i mavitanelo lama fanelaka swinene, ngopfu-ngopfu hikwalaho ka ku kombisa ka Bibele leswaku ku amukeriwa hi Xikwembu ku huma eka ku tinyiketela loku tiyeke ni nkhuvulo wa Vukriste.
d Loko munhu a nga anerisekangi hi makumu lawa, a nga ha kombela (hi masiku ya nkombo) ku va mhaka leyi yi pfuxetiwa.
e Nkarhi lowu hundzeke, vanhu lava nga khuvuriwangiki lava va dyoheke handle ko hundzuka a va papalatiwa hi laha ku heleleke. Hambi leswi, hi laha swi lulamisiweke ha kona laha henhla, leswi swi nga lavekiki, ndzayo leyi nga eka 1 Vakorinto 15:33 ya ha fanele ku yingisiwa.
f Maxaka lama susiweke lama tshamaka ehandle ka muti ma fanele ku khomiwa hi ku ya hi ndzayo ya Matsalwa leyi hlamuseriweke eka Xihondzo xo Rindza xa April 15, 1988, matluka 26-31; March 1, 1982, matluka 14-19.
Wa Tsundzuka Xana?
◻ Xana langutelo ra Vakriste eka “lava nga riki vapfumeri” lava vaka kona eminhlanganweni hi rihi ke?
◻ Loko xichudeni xa Bibele xi lava ku hlanganyela entirhweni wa nsimu, i magoza wahi lawa vakulu va ma landzelaka, naswona i vutihlamuleri byihi lebyi xichudeni xi byi amukelaka?
◻ Ku endliwa yini loko muhuweleri la nga khuvuriwangiki a endla xidyoho lexikulu?
◻ Xana vatswari ni vakulu va nga pfuna vana lavantsongo lava tshamaka ekaya hi ndlela yihi, hambi loko vantshwa va tano va dyoha swinene?
[Xifaniso lexi nga eka tluka 16]
Ku va muhuweleri, hambi loko u nga si khuvuriwa, i goza ra nkoka ni ra vutihlamuleri ro ya eku kumeni ka ku amukeriwa hi Xikwembu