Yehovha I Mani?

YEHOVHA u byele un’wana wa vagandzeri vakwe vo tshembeka a ku: “A ku na munhu l’a nga nḍi v̌onaka a v̌a a hanya.” (Eksoda 33:20) “Xikwembu i Moya,” naswona vanhu a va nge xi voni hi mahlo ya vona ya nyama. (Yohane 4:24) Tanihi leswi ku languta dyambu hi ku kongoma ninhlikanhi swi nga hi tlunyaka mahlo, xisweswo swi nga va ni khombo eka hina ku vona Xihlovo lexikulu xa matimba, lexi nga hi vumbelangiki dyambu leri vangamaka ntsena, kambe xi vumbeke ni timboni tin’wana leti nga hlayekiki leti nga kona evuakweni.

Lexi tsakisaka, a swi bohi leswaku hi vona Xikwembu leswaku hi ta kota ku xi tiva. Bibele ya hlamusela leswaku i mani Loyi a hi endleleke nchumu lowu wo hlamarisa, ku nga misava, yi tlhela yi boxa vumunhu bya yena. Kutani i swa nkoka ku languta Bibele leswaku hi ta kota ku tiva hi ta Tatana loyi a hi nyikeke vutomi ni kaya lero tsakisa, leri hi tsakelaka vutomi byebyo eka rona.

Nhlamuselo Ya Vito Ra Xona

Mavito hinkwawo ma ni tinhlamuselo, hambiloko namuntlha vanhu vo tala va nga ha vaka va nga ti tivi tinhlamuselo ta kona. Hi xikombiso, vito leri tolovelekeke ra Xitsonga leri nge Davhida ri huma eka rito ra Xiheveru leri vulaka la “Rhandzekaka.” Vito ra Muvumbi, Yehovha, na rona ri ni nhlamuselo. Xana ri vula yini? Eka ririmi ro sungula ra Bibele hi ririmi xa Xiheveru, vito ra Xikwembu ri tsariwe hi switatisi swa mune, YHWH, naswona ri humelela minkarhi ya kwalomu ka 7000 eka xiphemu xa Bibele ya Xiheveru. Vito ra Xikwembu ri twisiseka tanihi leri vulaka leswaku “U Endla Swi Va Kona.” Ri kombisa leswaku hi vutlharhi Yehovha u tiendla a va lexi a lavaka ku va xona leswaku a hetisisa swikongomelo swa yena. Hi yena Muvumbi, Muavanyisi, Muponisi, Muhlayisi wa Vutomi, xisweswo a nga hetisisa switshembiso swa yena. Ku tlula kwalaho, vito ra Yehovha eka Xiheveru ri ni mongo lowu kombisaka xiendlo lexi hetisisiwaka. Ina, Yehovha wa ha ri muhetisisi wa swikongomelo swa yena. I Xikwembu lexi hanyaka!

Timfanelo Ta Yehovha Leti Xiyekaka

Bibele yi hlamusela Muvumbi tanihi “Šikwembu ša tintŝalo ni v̌unene, le’ši hlwelaka ku kariha, le’ši teleke tintŝalo ni ku ṭhembeka, le’ši ṭeṭelelaka e tinšaka ta madzana ya khume, le’ši khomelaka munhu e ku homboloka, ni ku dyoha, ni šivi.” (Eksoda 34:6, 7) Xiga lexi nge “le’ši ṭeṭelelaka” xi yimela rito ra Xiheveru leri nga ni nhlamuselo. Ri vula musa lowu hi rirhandzu, wu namarhelaka eka nchumu wokarhi, ku kondza xikongomelo xa wona hi nchumu wolowo xi hetiseka. Ri nga tlhela ri hundzuluxeriwa va ku “rirhandzu ro tshembeka.” Musa wa Yehovha wa rirhandzu wu tinamarheta eka swivumbiwa swa yena naswona wu hetisisa xikongomelo xa yena xo hlamarisa. Xana a wu nga ta ri tlangela rirhandzu ro tano ro huma eka Loyi a ku nyikeke vutomi?

Yehovha wa hlwela ku kariha naswona wa hatlisa ku hi rivalela swidyoho swa hina. Swa tsakisa hakunene ku va ekusuhi ni munhu wo tano. Hambiswiritano, sweswo a swi vuli swona leswaku wa byi khutaza vubihi. U vurile a ku: “Mina, Yehova, nḍi ranḍa ku lulama, nḍi v̌enga ku phanga lo’ku endliwaka hi ku šisa.” (Esaya 61:8) Tanihi Xikwembu xa vululami, a xi nge va tshiki vadyohi lava nga riki na xichavo, lava phikelelaka evubihini bya vona, leswaku va hambeta va dyoha hi laha ku nga heriki. Kutani hi nga tiyiseka leswaku hi nkarhi wa yena lowu faneleke, Yehovha u ta byi susa vuhomboloki emisaveni. A nga ka a nga va fularheli lava xanisekaka.

A swi olovi ku tirhisa rirhandzu ni vululami hi ndlela leyi ringanaka kahle. Loko u ri mutswari, xana swa ku nonon’hwela ku vona leswaku hi rini laha u nga ololoxaka vana va wena loko va onhile? Ku tirhisa vululami ni rirhandzu leri nga ni ntwela-vusiwana hi ndlela leyi ringanaka, swi lava vutlharhi lebyikulu. Mfanelo yoleyo Yehovha u yi kombisa hi vutalo loko a tirhisana ni vanhu. (Varhoma 11:33-36) Ina, vutlhari bya Muvumbi byi nga voniwa kun’wana ni kun’wana, hi xikombiso, eka ntumbuluko lowu hlamarisaka lowu hi rhendzeleke.—Pisalema 104:24; Swivuriso 3:19.

Hambiswiritano, ku va ni vutlhari ntsena a swi enelanga. Leswaku a hetisisa ku rhandza ka yena, Muvumbi u fanele a tlhela a va ni matimba, naswona Bibele yi paluxa leswaku u ni matimba swinene loko yi ku: “Tlakusani mahlo ya ṅwina, mi languta! I mani l’a tumbulušeke ŝilo ŝeso, l’a fambiseke hi ku ri šašameta e v̌andla ra ŝona šana? Wa ŝi v̌itana hikwaŝo hi mav̌ito ya ŝona; hi ntamu lo’wukulu wa yena, ni matimba la’makulu ya yena, ku hav̌a šiṅwe le’ši pfumalekaka.” (Esaya 40:26) Yehovha u endla swilo, “hi ntamu lo’wukulu wa yena.” Xana mfanelo yo tano yi nga ka yi nga ku tshuneti eka yena?

I Xikwembu Xa Matiko Hikwawo

U nga ha tivutisa, ‘xana Yehovha a hi Xikwembu xa “Testamente ya Khale,” Xikwembu xa Israyele wa khale?’ I ntiyiso leswaku Yehovha u ti hlamuserile eka Vaisrayele. Kambe, hi mhaka ya leswi a vumbeke mpatswa wo sungula wa vanhu, Yehovha i Xikwembu “loyi vito ra ndyangu wun’wana ni wun’wana . . . [e]misaveni ri humaka ka yena.” (Vaefesa 3:15) Loko u pfumela leswaku swi lulamile ku xixima vakokwana va wena, xana a ku nga ta va leswinene ku gandzela Loyi a nyikeke munhu wo sungula vutomi, kokwana wa hina hinkwerhu, loyi a nga rimitsu ra tinxaka hikwato leti nga kona namuntlha emisaveni?

Muvumbi wa vanhu a nga yi hi nghohe. I ntiyiso leswaku u tshame a va ni vuxaka byo hlawuleka ni tiko ra Israyele. Kambe, ni le nkarhini wolowo u pfule mavoko ya yena ku amukela hikwavo lava vitanaka vito ra yena. Hosi ya vutlhari ya Israyele exikhongelweni lexi yaka eka Yehovha yi te: “Ni loko a ri muluv̌eri l’a nga riki wa tiko ra wena ra Israel, kambe a ta a sukile tikweni le’ri nge kule hikwalaho ka v̌ito ra wena . . . , Wena, yingisa u ri matilweni, . . . u tira, u nyika muluv̌eri loyi hikwaŝo leŝi a nga ta ŝi kombela eka wena, leŝaku matiko hikwawo ya misav̌a ma tiv̌a v̌ito ra wena.” (1 Tihosi 8:41-43) Ku ta fika namutlha, vanhu va matiko hikwawo va nga n’wi tiva Yehovha va tlhela va va ni vuxaka lebyinene na yena. Kambe, xana leswi swi ku khumba njhani wena?

Mimpfuno Ya Ku Tiva Yehovha

Loko hi tlhelela eka xifaniso lexi nga eka xihloko lexi nga hundza, loko u amukele phasela leri phutseriweke hi ndlela leyi navetisaka, hi ntolovelo u ta lava ku tiva leswaku a ku ri nyiko ya yini. Xana a yi tirhisiwa njhani naswona yi hlayisiwa hi ndlela yihi? Hi laha ku fanaka, hi lava ku tiva leswaku a yi ri yihi mianakanyo ya Xikwembu loko xi hi endlela misava. Bibele yi vula leswaku “a nga yi endlanga mananga, kambe o yi endlile leŝaku yi akiwa,” leswi vulaka leswaku, yi akiwa hi vanhu.—Esaya 45:18.

Hambiswiritano, vanhu vo tala a va khathali hi nyiko ya Muvumbi. Va le ku onheni ka misava, swi nga leswi swi nga n’wi tsakisiki Yehovha nikatsongo. Kambe, hi ku ya hi leswi vito ra yena ri vulaka swona, Yehovha u tiyimiserile ku hetisisa xikongomelo xa yena xo sungula hi vanhu ni misava. (Pisalema 115:16; Nhlavutelo 11:18) U ta pfuxeta misava a tlhela a yi nyiketa yi va ndzhaka eka hinkwavo lava rhandzaka ku hanya tanihi vana va yena lava n’wi yingisaka.—Matewu 5:5.

Buku yo hetelela ya Bibele yi hlamusela ndlela leyi swilo swi nga ta va ha yona loko sweswo swi ta humelela, yi ri: “Waswivo! Ntsonga wa Xikwembu wu le vanhwini, xi ta tshama na vona, naswona vona va ta va vanhu va xona. . . . Kutani xi ta sula mihloti hinkwayo ematihlweni ya vona, rifu a ri nge he vi kona, hambi ku ri ku kolola, ni xirilo ni xitlhavi a swi nge he vi kona. Swilo swo sungula swi hundzile.” (Nhlavutelo 21:3, 4) Ku hava loyi a nga ta rila mihloti ya mbitsi kumbe ku kolola hikokwalaho ko lahlekeriwa hi loyi a n’wi rhandzaka. A nga kona la nga ta kalakala a rilela mpfuno kumbe la nga ta xanisiwa hi vuvabyi lebyi dlayaka. Hambi ku ri “rifu ri ta endliwa ri nga ha vi nchumu.” (1 Vakorinto 15:26; Esaya 25:8; 33:24) Leswi swi kombisa muxaka wa vutomi lebyi eku sunguleni Yehovha a lavile leswaku hi byi tsakela, loko a vumbe vakokwana wa hina vo sungula.

I ntiyiso, u nga swi kota ku vona ndlela leyi paradeyisi yi nga ta va ha yona sweswi, exikarhi ka vagandzeri va Yehovha. Wa va byela, a ku: “Hi mina Yehovha, Šikwembu ša wena l’a ku dyonḍisaka, a ku pfuna, a ku fambisa e ndleleni leyi u faneleke ku famba ha yona.” (Esaya 48:17) Yehovha i Tatana wa musa, loyi a hi dyondzisaka ndlela leyinene leyi hi faneleke ku famba ha yona tanihi vana va yena. Switsundzuxo swa yena leswi a swi nyikaka vanhu, a swi tikiseli vanhu vutomi, kambe swi nyikela nsirhelelo wa rirhandzu. Ku swi landzela, swi ta tisa ntshunxeko ni ntsako wa ntiyiso, tanihi leswi ku tsariweke leswaku: “Kutani Yehovha i Moya; naswona laha moya wa Yehovha wu nga kona, ku ni ntshunxeko.” (2 Vakorinto 3:17) Hi ku landzelela switsundzuxo leswi andlariweke eBibeleni, hinkwavo lava amukelaka mfumo wa yena sweswi, va kuma ku rhula ka mianakanyo loku siku rin’wana ku nga ta tata misava hinkwayo ya vanhu.—Vafilipiya 4:7.

Yehovha i Tatana wo hleleka hakunene! Xana wa swi rhandza ku dyondza swo tala hi Loyi a endleke swihlamariso hinkwaswo swa ntumbuluko? Lava va dyondzaka, va kuma vuyelo bya risima hambi ku ri sweswi. Naswona enkarhini lowu taka, va ta kuma mikateko leyi nga heriki.

[Xifaniso lexi nga eka tluka 5]

Vito ra Xikwembu leri tsariweke hi mapeletwana ya mune ya Xiheveru, ri kona emakhumbini yo tala ya tikereke ta khale