Ku Nyikela Tinhlamuselo To Twala

LOKO u vula swo karhi, vayingiseri va wena va va va nga hoxanga loko va tivutisa va ku: “Ha yini sweswo swi ri ntiyiso? Hi byihi vumbhoni bya leswaku leswi xivulavuri xi swi vulaka swi fanele swi tshembiwa?” Tanihi mudyondzisi, u na mfanelo yo hlamula swivutiso sweswo kumbe ku pfuna vayingiseri va wena ku swi hlamula. Loko ku ri ni yinhla yo karhi leyi nga ya nkoka, tiyiseka leswaku u nyika vayingiseri va wena swivangelo leswi twalaka leswaku va yi tshemba. Leswi swi ta endla leswaku nkulumo ya wena yi khorwisa.

Muapostola Pawulo a a khorwisa vayingiseri vakwe. Hi ku nyikela tinhlamuselo leti twalaka, swivangelo swo twala ni ku khongotela, a a lwela ku endla leswaku vayingiseri va yena va cinca mianakanyo. U hi vekele xikombiso lexinene. (Mint. 18:4; 19:8) I ntiyiso, swivulavuri swin’wana swi tirhisa vuswikoti bya swona byo khorwisa vanhu leswaku swi va hambukisa. (Mat. 27:20; Mint. 14:19; Kol. 2:4) Swi nga ha sungula hi ku vula rungula leri nga riki na xisekelo, swi honisa mintiyiso leyi nga pfumelelaniki ni langutelo ra swona, swi tsakisa vanhu ku ri ni ku vula ntiyiso wa mhaka. Hi fanele hi lemuka leswaku hi papalata tindlela teto.

Tinhlamuselo Leti Sekeriweke Ntsena eRitweni Ra Xikwembu. A hi fanelanga hi dyondzisa leswi humaka emianakanyweni ya hina. Hi tikarhatela ku byela van’wana leswi hi swi dyondzeke eBibeleni. Entirhweni lowu wo dyondzisa hi pfuniwa swinene hi tibuku ta ntlawa wa hlonga ro tshembeka ni ro tlhariha. Tibuku leti ti hi khutaza ku kambisisa Matsalwa hi vukheta. Hikwalaho, na hina hi kongomisa van’wana eBibeleni, kambe pakani ya hina ku nga ri ku va kombisa leswaku hi tiva ngopfu, ku ri na sweswo hi ku titsongahata hi navela leswaku va tivonela hi voxe leswi yi swi vulaka. Hi pfumelelana na Yesu Kreste, loyi loko a khongela eka Tata wakwe a nga te: “Rito ra wena i ntiyiso.” (Yoh. 17:17) A ku na lonkulu handle ka Yehovha Xikwembu, Muvumbi wa tilo ni misava. Tinhlamuselo ta hina ti ta twala ntsena loko ti sekeriwe eRitweni rakwe.

Minkarhi yin’wana u nga vulavula ni vanhu lava nga yi tolovelangiki Bibele kumbe lava nga tshembiki leswaku i Rito ra Xikwembu. U fanele u va ni vuxiyaxiya leswaku matsalwa ya Bibele u ma tirhisa loko swi te yini naswona njhani. Kambe u fanele u tiyimisela ku hatla u va kongomisa eka xihlovo xexo lexi tshembekaka xa rungula.

Xana u fanele u heta hi leswaku ku tshaha tsalwa leri faneleke swi ta susumetela munhu ku namba a pfumela a nga kaneti? A swi tano. U fanele u tirhisa mongo wa tsalwa rero, leswaku u kombisa leswaku hakunene ra swi seketela leswi u swi vulaka. Loko u lo tsavula ntsena xiga xo karhi etsalweni kambe mongo wu nga vulavuli hi mhaka yoleyo, ku nga ha laveka vumbhoni byin’wana. U nga ha boheka ku tirhisa matsalwa man’wana lama seketelaka mhaka yoleyo, leswaku u ta enerisa vayingiseri va wena leswaku leswi u swi vulaka swi sekeriwe eMatsalweni hakunene.

Papalata ku hundzeleta leswi tsalwa ri vulaka swona. Ri hlaye kahle. Tsalwa ri nga ha vulavula hi mhaka leyi mi bulaka ha yona. Kambe leswaku nhlamuselo ya wena yi khorwisa, muyingiseri wa wena u fanele a kota ku vona loko ri seketela leswi u swi vulaka.

Vumbhoni Byo Seketela Mhaka. Etimhakeni tin’wana, swi nga ha pfuna ku tirhisa vumbhoni lebyi humaka eka xihlovo lexi tshembekaka handle ka Bibele leswaku u pfuna vanhu va twisisa leswi Matsalwa ma swi vulaka.

Hi xikombiso, u nga ha kombetela eka vuako lebyi hi byi vonaka tanihi vumbhoni bya leswaku ku ni Muvumbi. U nga ha yisa nyingiso eka milawu ya ntumbuluko, yo tanihi nkoka-misava, kutani u hlamusela leswaku vukona bya milawu yoleyo byi komba leswaku u kona Muveki wa Nawu. Nhlamuselo ya wena yi ta twala loko yi pfumelelana ni leswi swi tsariweke eRitweni ra Xikwembu. (Yobo 38:31-33; Ps. 19:1; 104:24; Rhom. 1:20) Vumbhoni byo tano bya pfuna hikuva byi kombisa leswaku leswi vuriwaka hi Bibele swi pfumelelana ni mintiyiso leyi vonakaka.

Xana u ringeta ku pfuna un’wana leswaku a xiya leswaku hakunene Bibele i Rito ra Xikwembu? U nga ha tshaha swidyondzeki leswi vulaka leswaku mhaka leyi yi tano, kambe xana yi tano hakunene? Mintshaho yoleyo yi ngo pfuna ntsena vanhu lava va xiximaka swidyondzeki swoleswo. Xana u nga tirhisa sayense ku kombisa leswaku Bibele yi tiyisile? Loko u tirhisa malangutelo ya van’wasayense lava nga hetisekangiki, u ta va u aka ehenhla ka masungulo lama nga tiyangiki. Hi hala tlhelo, loko u sungula hi Rito ra Xikwembu kutani endzhaku u kombisa leswi sayense yi swi tshubuleke leswi kombisaka ku pakanisa ka Bibele, tinhlamuselo ta wena ti ta va ti sekeriwe eka masungulo lama tiyeke.

Hambi ku ri yini lexi u tiyimiselaka ku xi kombisa, nyikela vumbhoni lebyi faneleke. Vumbhoni lebyi lavekaka byi ta titshega hi leswaku vayingiseri va wena i vamani. Hi xikombiso, loko u bula hi masiku ya makumu hilaha ma hlamuseriweke hakona eka 2 Timotiya 3:1-5, u nga ha kokela nyingiso wa vayingiseri va wena eka swiviko swa mahungu leswi va swi tivaka leswi kombisaka leswaku vanhu a va na “xinakulobye xa ntumbuluko.” Xikombiso xexo xin’we xi nga ha va xi enerile ku tiyisekisa leswaku mhaka leyi ya xikombiso xa masiku ya makumu ya hetiseka sweswi.

Xifananisi—ku nga ku fananisa swilo swimbirhi leswi swi nga ni xivumbeko lexi fanaka xa nkoka—hakanyingi xi nga pfuna. Xifananisi xi ri xoxe a xi humesi vumbhoni; xi fanele xi tiyisekisiwa hi leswi Bibele yi swi vulaka. Kambe xifananisi xi nga pfuna munhu leswaku a vona mongo wa mhaka. Xifananisi xolexo xi nga ha tirhisiwa, hi xikombiso, loko u hlamusela leswaku Mfumo wa Xikwembu i hulumendhe. U nga ha kombisa leswaku ku fana ni tihulumendhe ta vanhu, Mfumo wa Xikwembu na wona wu na vafumi, vafumiwa, milawu, fambiselo ra vuavanyisi ni ra dyondzo.

Timhaka ta vutomi bya van’wana hakanyingi ti nga tirhisiwa ku kombisa vutlharhi bya ku tirhisa ndzayo ya Bibele. Ni mintokoto ya wena n’wini yi nga ha tirhisiwa ku seketela mhaka leyi vuriwaka. Hi xikombiso, loko u hlamusela munhu nkoka wa ku hlaya ni ku dyondza Bibele, u nga ha n’wi hlamusela ndlela leyi ku yi hlaya swi antswiseke vutomi bya wena ha yona. Muapostola Petro loko a khutaza vamakwavo u hlamusele hi ta ku hundzuriwa ka Yesu, loku a ku voneke hi mahlo. (2 Pet. 1:16-18) Na Pawulo u tshahe mintokoto ya yena n’wini. (2 Kor. 1:8-10; 12:7-9) Kambe, u nga yi tati ngopfu mintokoto ya wena n’wini, leswaku u nga kokeli nyingiso lowu nga fanelangiki eka wena n’wini.

Leswi vanhu va kuleke hi ndlela leyi nga faniki naswona va anakanyaka hi tindlela to hambana, vumbhoni lebyi khorwisaka munhu un’wana a byi nge n’wi khorwisi un’wanyana. Hikwalaho, xiya mavonelo ya vayingiseri va wena loko u anakanya hi tinhlamuselo leti u nga ta ti tirhisa ni ndlela leyi u nga ta ti veka ha yona. Swivuriso 16:23 yi ri: “Mbilu ya lowo tlhariha yi endla leswaku nomu wakwe wu kombisa ku twisisa, naswona yi engetela ku khorwiseka emilon’wini yakwe.”