Xana U Nga Hoxa Xandla Eku Chumayeleni Ni Madyambu?

1. Hi ku ya hi mutsari un’wana, xana Pawulo a a chumayela hi yindlu ni yindlu rini?

¹ Buku leyi nge, Daily Life in Bible Times, yi vula leswaku hi ntolovelo muapostola Pawulo a a chumayela hi yindlu ni yindlu “ku sukela hi awara ya mune ni madyambu ku kondza byi va vusiku.” A hi swi tivi loko lexi a ku ri xiyimiso xa Pawulo, kambe ha swi tiva leswaku Pawulo a a tiyimisele ku “endla swilo hinkwaswo hikwalaho ka mahungu lamanene.” (1 Kor. 9:19-23) Leswi swi nga ha va swi katsa ku va a hlele swiyimo swakwe leswaku a kota ku chumayela hi yindlu ni yindlu loko a ta kuma vanhu emakaya ya vona hi nkarhi wo karhi.

2. Ha yini swi ri swinene ku chumayela ni madyambu?

² Hakanyingi vahuweleri etindhawini to tala va chumayela hi yindlu ni yindlu ni mixo exikarhi vhiki. Hambiswiritano, xana lowu ka ha ri nkarhi wa kahle endhawini ya ka n’wina? Phayona rin’wana ra hlamusela malunghana ni nsimu ya rona: “Swa tika ku kuma vanhu ninhlikanhi. Kambe vanhu vo tala va kumeka emakaya ya vona nimadyambu.” Ku chumayela ni madyambu ku nga va nkarhi lowunene wo chumayela vavanuna malunghana ni mahungu lamanene. Hakanyingi vini va muti va va va wisile naswona va ni nkarhi wo bula. Loko swi vuyerisa ku endla tano, vakulu va fanele va hlela nhlangano wa nsimu ni madyambu.

3. Hi nga va ni vuxiyaxiya hi ndlela yihi loko hi chumayela nimadyambu?

³ Vana Ni Vuxiyaxiya: Loko u chumayela ni madyambu, i swinene ku va ni vuxiyaxiya. Hi xikombiso, loko u xiya leswaku nkarhi lowu u nga endza ha wona a hi wunene eka n’wini wa muti, wo tanihi loko a ri eku laleleni, i swinene ku n’wi byela leswaku u ta tlhela u vuya hi nkarhi wun’wana. Loko ku ri ni xinyami, yima laha n’wini wa muti a nga ta ku vona naswona u hatlisa u titivisa u tlhela u vula xikongomelo xo n’wi endzela. Nakambe hambileswi ku nga vanhu vambirhi lava nghenaka emutini, i swinene leswaku ntlawa wu rindza exitarateni ku kondza va huma naswona i swinene ku yima eswitarateni leswi nga ni mavoni laha ku nga ni vanhu van’wana. Mi nga chumayeli se ri sikurile leswaku mi nga kavanyeti n’wini wa muti loko a ti lunghiselela ku wisa. (2 Kor. 6:3) Loko swi ri ni khombo endhawini ya ka n’wina ku chumayela nimadyambu, i swinene ku chumayela ra ha vona.—Swiv. 22:3.

4. Hi yihi mikateko leyi tisiwaka hi ku chumayela nimadyambu?

⁴ Mikateko: Ku chumayela swa tsakisa swinene ngopfu-ngopfu loko hi bula ni vanhu. Sweswo swi endla leswaku hi va pfuna leswaku va “ponisiwa naswona va fikelela vutivi lebyi kongomeke bya ntiyiso.” (1 Tim. 2:3, 4) Xana u nga swi kota ku hlela xiyimiso xa wena leswaku u ta kota ku chumayela nimadyambu?