Ndlela Yo Vuyeriwa Eka Ntlawa Wa Ntirho Wa Nsimu
1. Hi byihi vuyelo lebyi a byi ri kona eka Dyondzo ya Buku ya Vandlha lebyi na sweswi hi byi kumaka eka ntlawa wa hina wa nsimu?
1 Xana swi kona leswi u swi tsundzuka hi Dyondzo ya Buku ya Vandlha? Mintlawa a yi ri yitsongo naswona a wu ntshunxeka. A swi olova ku endla xinghana lexi a xi hi pfuna ku tshama hi tiyile eripfumelweni. (Swiv. 18:24) Mulanguteri wa dyondzo ya buku a a tiva swiyimo swa hina swo hambana-hambana naswona a a kota ku hi pfuna ha un’we. (Swiv. 27:23; 1 Pet. 5:2, 3) Sweswi hi kuma mpfuno wo tona eka ntlawa wa hina wa nsimu.
2. Hi nga va vo rhanga hi ndlela yihi eka ku seketalana hi tlhelo ra moya loko swi ta emhakeni yo aka xinghana eka ntlawa wa hina wa nsimu?
2 Vana Wo Rhanga: Nhlayo ya vanhu lava vaka kona eka ntlawa wa nsimu ya ringana ni ya lava a va ri eka ntlawa wa dyondzo ya buku. Loko hi tirha swin’we ensin’wini hi “pfunana” ni van’wana, hi nga va ni vuxaka lebyinene. (Filp. 1:27) Xana u tirhe nsimu ni vanhu vangani va le tlaweni wa wena? Xana u nga ‘ndlandlamuka’ hi ku va u tirha ni vanhu vo hambana-hambana? (2 Kor. 6:13) Tlhandlakambirhi, minkarhi yin’wana loko hi va ni Vugandzeri bya Ndyangu bya ni madyambu hi nga ha rhamba makwerhu wo karhi loyi hi nga swin’we na yena entlaweni kumbe hi n’wi rhamba eswakudyeni. Emavandlheni man’wana, mintlawa ya cincana loko swi ta emhakeni yo komba malwandla eka xivulavuri lexi endzeke. Hi vhiki leri ntlawa wo karhi wu averiweke ku khathalela xivulavuri lexi endzeke, ntlawa wolowo wa hlengeletana leswaku wu dya swin’we swakudya ni ku khutazana hambiloko xivulavuri lexi endzeke xi taka xi nga swi koti ku dya na wona.
3. Hi tihi tindlela to kuma riendzo ra vurisi eka mintlawa ya hina ya nsimu?
3 Hambileswi sweswi vandlha ri hlanganaka kambirhi ntsena hi vhiki, leswi a swi vuli swona leswaku vahuweleri va fanele va kuma maendzo ya vurisi matsongo. Ku hlawuriwe valanguteri va mintlawa leswaku va khutaza muhuweleri ha un’we ni ku va letela leswaku va lunghekela nsimu. Loko mulanguteri wa ntlawa wa wena a nga si tshama a tirha na wena ensin’wini, ha yini u nga kombeli ku tirha na yena? Ku engetela kwalaho, mulanguteri wa ntirho u fanele a huma nsimu ni ntlawa wun’wana ni wun’wana hi mahelo vhiki man’we n’hweti ni n’hweti. Eka mavandlha lamatsongo laha ku nga ni mintlawa yi nga ri yingani, a nga ha hlela ku endzela ntlawa ha wun’we kambirhi elembeni. Xana wa xi hlela xiyimiso xa wena leswaku u kota ku va kona ensin’wini loko a endzela ntlawa wa n’wina?
4. (a) Xana minhlangano ya nsimu yi hleriwa njhani? (b) Ha yini hi fanele hi anakanya hi ku pfula makaya ya hina leswaku ku khomiwa nhlangano wa nsimu?
4 Hakanyingi swa pfuna loko ntlawa ha wun’we wu hlengeletana wu ri woxe leswaku wu huma nsimu hi mahelo vhiki. Ku hlengeletana etindhawini to hambana-hambana hi nkarhi wun’we swi nga pfuna vahuweleri leswaku va kota ku ya emihlanganweni ya nsimu kumbexana ni le nsin’wini. Vahuweleri va nga paniwa hi ku hatlisa naswona va kota ku sungula nsimu handle ko dya nkarhi. Nakambe swi ta olovela ni mulanguteri leswaku a kota ku khathalela swirho swa ntlawa wakwe. Hambiswiritano swiyimo swi nga ha endla leswaku mintlawa yimbirhi kumbe ku tlula yi hlangana. Loko vandlha hinkwaro ri hlangana leswaku ri tirha nsimu hi Mugqivela wo sungula wa n’hweti kumbe endzhaku ka Dyondzo ya Xihondzo xo Rindza, hakanyingi i swinene ku va ntlawa wun’wana ni wun’wana wu tshama swin’we ni leswaku mulanguteri wa ntlawa, a nyikiwa timinete ti nga ri tingani leswaku a pana ntlawa wakwe nhlangano wa nsimu wu nga si pfala hi xikhongelo.—Vona bokisi leri nge “Xana U Nga Pfula Kaya Ra Wena?”
5. Hambileswi Dyondzo ya Buku ya Vandlha yi nga ha riki kona, i yini lexi hi nga tiyisekaka ha xona?
5 Hambileswi Dyondzo ya Buku ya Vandlha yi nga ha riki kona, Yehovha u hambeta a hi nyika swilo hinkwaswo leswi hi swi lavaka leswaku hi endla ku rhandza kakwe. (Hev. 13:20, 21) A hi pfumali nchumu hikwalaho ka nkhathalelo wa Yehovha. (Ps. 23:1) Hi kuma mikateko yo tala hikwalaho ka mintlawa hina ya nsimu. Loko hi va vo rhanga naswona hi ‘byala hi xitalo,’ hi ta “tshovela hi xitalo.”—2 Kor. 9:6.
[Bokisi leri nga eka tluka 6]
Xana U Nga Pfula Kaya Ra Wena?
Mavandlha man’wana ma hlanganisa mintlawa leswaku ma khoma nhlangano wa nsimu hi mahelo vhiki hikwalaho ko kayivela ka tindhawu leti ntlawa wu nga hlanganaka eka tona. Ku hlangana leswaku hi khoma nhlangano wa nsimu i lunghiselelo ra vandlha, hikwalaho ku va ku khomiwa nhlangano wa nsimu ekaya ra wena i lunghelo. Xana u nga pfula kaya ra wena? U nga chavi, kaya ra wena ra faneleka. Vakulu va ta languta ndhawu leyi u tshamaka eka yona ni swilo swin’wana swo fana ni leswi a va swi kambisisa loko va hlawula ndhawu leyi faneleke yo khoma dyondzo ya buku. Loko u lava leswaku ku tirhisiwa kaya ra wena, u fanele u tivisa mulanguteri wa ntlawa wa wena.