Ku Tirhisa Rungula Leri U Averiweke Rona

BIBELE yi fanisa vandlha ra Vukreste ni miri wa munhu. Xirho ha xin’we i xa nkoka, kambe “hinkwaswo a swi na ntirho lowu fanaka.” Hi ku pfumelelana ni sweswo hi fanele hi tirhisa lunghelo leri nga ta hetisisa sweswo leri hi byarhisiweke rona. Leswi swi lava leswaku hi twisisa ni ku xi lunghiselela kahle xiavelo xin’wana ni xin’wana xa nkulumo, ematshan’wini yo teka tinhloko-mhaka tin’wana ti nga ri ta nkoka, hi anakanya leswaku tin’wana ti tsakisa ku ti tlula. (Rhom. 12:4-8) Hlonga ro tshembaka ni ro tlhariha ri ni vutihlamuleri byo lunghiselela swakudya swa moya hi “nkarhi lowu faneleke.” (Mat. 24:45) Loko hi tirhisa vuswikoti bya hina ku lunghiselela tinkulumo hi ku ya hi swileriso leswi hi nyikiweke swona, hi va hi kombisa ku tlangela lunghiselelo rero. Leswi swi pfuna leswaku evandlheni hinkwaro swilo swi famba kahle.

Leswi U Nga Swi Katsaka. Loko u averiwe nhloko-mhaka yo karhi exikolweni, tiyiseka leswaku u lunghiselela yona ku nga ri yin’wana. Minkarhi yo tala u ta byeriwa laha rungula ra kona u nga ta ri kuma kona. Loko u nga byeriwanga rungula leri u nga ta ri tirhisa tanihi xisekelo xa nkulumo ya wena, u nga ha tikumela rungula laha u lavaka kona. Hambiswiritano, loko u ri karhi u lunghiselela nkulumo ya wena, tiyiseka leswaku hinkwayo ka yona yi fambisana ni nhloko-mhaka leyi u averiweke yona. Loko u ehleketa hi leswi u nga swi katsaka, u fanele u tlhela u ehleketa hi vayingiseri va wena.

Hlaya rungula leri nkulumo ya wena yi sekeriweke eka rona hi vukheta, anakanyisisa hi matsalwa ya kona. Lava tindlela leti u nga ma tirhisaka ha tona leswaku vayingiseri va vuyeriwa. Hlawula tinhla timbirhi kumbe tinharhu eka rungula leri u nga na rona leswaku u ti tirhisa tanihi tinhla-nkulu enkulumeni ya wena. Hilaha ku fanaka, enkulumeni ya wena hlawula matsalwa lawa u nga ta ma hlaya ni ku ma hlamusela.

Xana u ta tirhisa rungula ro tanihi kwihi? Leri u nga ta kota ku ri hlamusela hi ndlela leyi twalaka. U nga honisi madyondziselo lamanene, hikwalaho ko lava ku nghenisa rungula ro tala. Loko ku ri ni rungula leri nga hetisisiki xikongomelo xa nkulumo ya wena, lunghiselela swiyenge leswi nga ta ku pfumelela u fikelela pakani ya wena. Eka rungula leri u averiweke rona, tirhisa leri nga ta dyondzisa swinene ni leri nga ta pfuna vayingiseri va wena. Xikongomelo xa wena loko u tirhela eka yinhla leyi a hi ku lava ku vona leswaku i rungula ro tanihi kwihi leri u nga ri hlanganisaka, kambe i ku tirhisa rungula leri u averiweke rona tanihi xisekelo xa nkulumo ya wena.

Xikongomelo xa nkulumo ya wena a hi ku katsakanya rungula leri u averiweke rona. U fanele u hlela ku hlamusela tinhla to karhi, u ti ndlandlamuxa, u tirhisa swifaniso ni ku kombisa leswaku ti tirha njhani. Tindlela tin’wana ti nga tirhisiwa ku ndlandlamuxa tinhla ta nkoka eka rungula leri u averiweke rona ematshan’weni yo ri siva hi rungula rin’wana.

Vamakwerhu lava nga ni timfanelo leti lavekaka tanihi vadyondzisi, hi ku famba ka nkarhi va nga averiwa tinkulumo to dyondzisa eka Nhlangano wa Ntirho. Va xi twisisa xilaveko xo tirhisa rungula leri u averiweke rona hi ndlela leyi dyondzisaka ematshan’wini yo tirhisa rungula rin’wana ra le tlhelo. Hilaha ku fanaka vamakwerhu lava nyikelaka tinkulumo ta le rivaleni va nyikiwa phepha ra nkulumo leri va nga ta ri landzela. Ri ku pfumelela ku fambisana ni swiyimo, kambe ri kombisa tinhla-nkulu leti faneleke ti ndlandlamuxiwa, ni rungula leri ti seketelaka ni matsalwa lama vumbaka mongo wa nkulumo. Ku tiva ndlela yo dyondzisa hi ku tirhisa rungula leri u averiweke rona swi ta ku pfuna swinene leswaku u kota ku lunghiselela ni swiavelo swin’wana swa tinkulumo leswi u nga averiwaka swona.

Dyondzo leyi yi nga tlhela yi ku pfuna ku va ni tidyondzo ta Bibele ta le kaya leti endlaka nhluvuko. U ta dyondza ku namarhela erungulweni leri dyondziwaka ematshan’wini yo huma emhakeni u kandziyisa swilo leswi tsakisaka kambe swi nga ri swa nkoka leswaku munhu a twisisa mhaka leyi ku vulavuriwaka ha yona. Kambe loko u kume mongo wa dyondzo leyi, u nga ka u nga khomeleli eka rungula leri tsariweke ntsena lerova u tsandzeka ku nyikela tinhlamuselo leti engetelekeke leti xichudeni xi nga ha ti lavaka.