Swifaniso Swa Swilo Leswi Tolovelekeke

I SWA nkoka leswaku xikombiso xin’wana ni xin’wana lexi u xi tirhisaka xi fambisana ni mhaka leyi u vulavulaka ha yona. Hambiswiritano, leswaku xi pfuna i swinene leswaku xi fambisana ni vayingiseri va wena.

Xana muxaka wa vayingiseri wu nga ku pfuna njhani leswaku u tirhisa swikombiso leswinene loko u vulavula ni ntlawa wa vanhu? Xana Yesu Kreste u endle yini? Loko a vulavula ni ntlawa kumbe ni vadyondzisiwa va yena, Yesu a a nga tirhisi swikombiso swa swilo leswi tiviwaka ntsena hi vanhu va le matikweni lama nga ehandle ka Israyele. Swikombiso swo tano a va nga ta swi tiva vayingiseri va yena. Hi xikombiso, Yesu a nga vulavulanga hi vutomi bya le vuhosini bya Egipta kumbe vukhongeri bya le Indiya. Hambiswiritano, swikombiso swa yena a swi khumba swiendlo swa vanhu va le misaveni hinkwayo. U vulavule hi ku rhunga swiambalo, ku endla timhaka ta mabindzu, ku lahlekeriwa hi nchumu wa nkoka ni ku ya eminkhubyeni ya micato. A a twisisa ndlela leyi vanhu a va titwa ha yona eka swiyimo swo hambana-hambana, kutani a tirhisa vutivi byebyo. (Mar. 2:21; Luka 14:7-11; 15:8, 9; 19:15-23) Tanihi leswi Yesu a a dyondzisa ngopfu Vaisrayele, swikombiso swa yena hakanyingi a swi talele eka swilo ni swiendlo leswi a va swi endla siku na siku. Xisweswo u endle swikombiso swo tanihi swa vurimi, ndlela leyi tinyimpfu ti yingisaka murisi wa tona ha yona, ni ku tirhisiwa ka madzovo ya swiharhi ku hlayisa vhinya. (Mar. 2:22; 4:2-9; Yoh. 10:1-5) U tlhele a vulavula hi swikombiso leswi tolovelekeke swa matimu—ku tumbuluxiwa ka mpatswa wo sungula wa vanhu, Ndhambi ya siku ra Nowa, ku lovisiwa ka Sodoma na Gomora, ni hi ta rifu ra nsati wa Lota, ni swin’wana. (Mat. 10:15; 19:4-6; 24:37-39; Luka 17:32) Xana na wena wa ehleketa hi swiendlo leswi tolovelekeke eka vayingiseri va wena ni ndhavuko wa vona loko u hlawula swikombiso?

Xana ku vuriwa yini loko u nga vulavuli ni ntlawa lowukulu kambe u vulavula ni munhu un’we kumbe ni vanhu va nga ri vangani? Ringeta ku hlawula xifaniso lexi wu fanelaka kahle ntlawanyana wolowo. Loko Yesu a chumayela wansati wa Musamariya exihlobyeni lexi nga ekusuhi ni le Sikari, u vulavule hi “mati lama hanyaka,” ‘ku nga ha tlheli u twa torha,’ ni “nseledyana wa mati lama pfelelaka ma nyika vutomi lebyi nga heriki”—leswi hinkwaswo a swi ri swiga-ririmi leswi fambisanaka ni ntirho wa wansati yoloye. (Yoh. 4:7-15) Naswona loko a vulavula ni vavanuna lava a va hlantswa tinkoka ta vona to phasa tinhlampfi, xiga-ririmi lexi a xi hlawuleke a xi khumba ntirho wo phasa tinhlampfi. (Luka 5:2-11) Eka swiendlakalo leswi, a a ta va a vulavule hi vurimi tanihi leswi a va tshama endhawini leyi ku hanyiwaka hi ku rima, kambe u nga vona ndlela leyi swi pfuneke ha yona ku vulavula hi ntirho lowu a va wu endla, hi ku tirhisa xifaniso! Xana wa tinyiketela ku endla sweswo?

Hambileswi Yesu a vulavuleke hi “tinyimpfu leti lahlekeke ta yindlu ya Israyele,” muapostola Pawulo a nga rhumiwanga eka Vaisrayele ntsena, kambe a a rhumiwe ni le ka Vamatiko. (Mat. 15:24; Mint. 9:15) Xana leswi swi khumbe ndlela leyi Pawulo a vulavuleke ha yona? Ina. Loko a tsalela Vakreste va le Korinto, u vulavule hi vatsutsumi lava phikizanaka, mukhuva wo dyela etitempeleni ta swifaniso ni nxaxamelo wa vahluri, ku nga swilo leswi Vamatiko volavo a va tolovelane na swona.—1 Kor. 8:1-10; 9:24, 25; 2 Kor. 2:14-16.

Xana u ni vuxiya-xiya ku fana na Yesu na Pawulo loko swi ta emhakeni yo hlawula swifaniso ni swikombiso leswi u nga ta swi tirhisa loko u dyondzisa? Xana wa ehleketa hi xiyimo xa ndhawu ni mintirho ya siku ni siku ya vayingiseri va wena? Ina, ku ve ni ku cinca emisaveni ku sukela eka lembe-xidzana ro sungula. Vanhu vo tala va swi kota ku vona mahungu ya misava eka thelevhixini. Hakanyingi swiyimo swa le matikweni man’wana swi tolovelekile eka vona. Loko swi ri tano endhawini ya ka n’wina, a swi hoxanga nikatsongo ku tirhisa mahungu wolawo tanihi swifaniso swa wena. Hambiswiritano, hakanyingi leswi khumbaka vanhu ngopfu i swilo leswi khumbaka vutomi bya vona—makaya ya vona, ndyangu, ntirho, swakudya leswi va swi dyaka ni maxelo ya ndhawu ya ka vona.

Loko xifaniso xa wena xi lava ku hlamuseriwa, u ta va u vulavula hi nchumu lowu nga tolovelekangiki eka vayingiseri va wena. Xifaniso xo tano xi nga mphimphela xikongomelo xa dyondzo ya wena. Hikwalaho, vayingiseri va nga tsundzuka xifaniso xa wena ku nga ri ntiyiso wa Matsalwa lowu a wu lava ku va byela wona.

Ematshan’weni yo endla swifaniso leswi rharhanganeke, Yesu u tirhise swifaniso swo olova leswi khumbaka timhaka ta siku ni siku. U tirhise swilo leswitsongo ku hlamusela swilo leswikulu, ni swilo swo olova ku hlamusela swilo leswi tikaka ku swi twisisa. Hi ku twananisa swilo leswi endlekaka siku ni siku ni ntiyiso wa swa moya, Yesu u pfune vanhu ku twisisa ni ku wu tsundzuka hi ku olova ntiyiso wa timhaka ta moya lowu a a wu dyondzisa. Mayana xikombiso lexinene xo xi landzela!