Munghana Wo Biha

U ni munghana loyi u hlanganeke na yena loko wa ha ri muntshwa. U ku endle u titwa u kurile naswona swi tikomba a ku pfuna leswaku u fana ni tintangha ta wena. Loko u tshikilelekile, a wu ya eka yena minkarhi hinkwayo leswaku a ku pfuna u susa ku tshikileleka koloko. Hakunene se a wu titshega hi yena eswiyin’weni swo tala.

Kambe hi ku famba ka nkarhi u vone vubihi byakwe. Minkarhi hinkwayo u lava leswaku u va na yena, hambiloko sweswo swi ku endla u nga amukeleki etindhawini tin’wana. Hambileswi a nga ha vaka a ku endle u tivona u kurile, kambe u veke rihanyo ra wena ekhombyeni. Lexi vavisaka ku tlula mpimo hileswi a ku dyelaka mali ya wena ya muholo.

Eminkarhini ya sweswinyana, u ringetile ku herisa vunghana bya n’wina, kambe a nga ku pfumeleli. Hi ndlela yo karhi, se wa ku lawula. Wa tisola hileswi u hlanganeke na yena.

LEBYI i vunghana lebyi vadzahi vo tala va nga na byona ni fole. Earline, wansati la heteke malembe ya 50 a ri karhi a dzaha u te: “Fole a ri ndzi pfuna swinene ku tlula ku pfuniwa hi munhu un’wana. A ku ngo va munghana wa mina wa khale ntsena, minkarhi yin’wana a ku ri yena ntsena munghana wa mina.” Kambe hilaha Earline a swi xiyeke hakona, entiyisweni fole i munghana wo biha ni la nga ni nsele. Marito lama nga eku sunguleni ka xihloko lexi ma xi hlamusela kahle xiyimo xa yena, handle ka nchumu wun’we ntsena. Loko a dyondze leswaku ku dzaha swi bihile emahlweni ka Xikwembu hileswi swi thyakisaka mimiri leyi Xikwembu xi hi nyikeke yona, u nambe a ku ri thya!—2 Vakorinto 7:1.

Wanuna un’wana la vuriwaka Frank na yena u teke xiboho lexi fanaka leswaku a tsakisa Xikwembu. Kambe endzhakunyana ko tshika ku dzaha, u sungule ku kasa-kasa endlwini yakwe a lavana ni switompi swa khale swa fole leswi a swi wele ehansi. Frank u te: “Hi siku rero ndzi endle xiboho. Swi ndzi nyenyetse ngopfu ku va ndzi kasa-kasa ndzi ri karhi ndzi handza-handza thyaka ndzi lavana ni switompi swa khale. Ndzi nambe ndzi ku ri thya!”

Ha yini swi tika ku tshika ku dzaha? Vakambisisi va kume swivangelo swo hlayanyana: (1) Swilo leswi nga eka fole swi nga godzombela swinene ku fana ni swidzidziharisi leswi nga riki enawini. (2) Nikhothini leyi nghenaka emirini yi nga ha teka tisekoni ta nkombo ntsena leswaku yi fika ebyongweni. (3) Hakanyingi ku dzaha i nchumu wa nkoka evuton’wini bya munhu hileswi swi fambisanaka ni ku dya, ku nwa, ku bula, ku hunguta ntshikilelo ni swilo swin’wana.

Kambe hilaha Earline na Frank va swi kombiseke hakona, swa koteka ku tshika ku dzaha. Loko u lava ku tshika ku dzaha, ku hlaya swihloko leswi landzelaka swi nga ha ku pfuna leswaku u hanya vutomi lebyinene.