Loko U Vona Swi Antswa Ku Tisunga

LEMBE ni lembe vanhu va magidi ya timiliyoni va le United States va ringeta ku tisunga. Bibele yi nyika xivangelo xa leswaku ha yini vanhu vo tala va ri ni gome. Yi hlamusela leswaku hi hanya eka “minkarhi ya mangava leyi swi nonon’hwaka ku langutana na yona.” Vutomi byi ya byi va tshikilela swinene vanhu. (2 Timotiya 3:1; Eklesiasta 7:7) Loko munhu a tshikileriwa hi maxangu ya vutomi, a nga ha vona swi antswa ku tisunga leswaku a hambana na wona. I yini leswi u nga swi endlaka loko u tshame u ehleketa ku tisunga?

A Wu Wexe!

Hambiloko swiphiqo swa wena swi tikomba onge a swi nge lulami, tsundzuka leswaku a wu wexe naswona lexi twisaka ku vava hileswaku swi nga ha endleka leswaku ku ni vanhu lava langutaneke ni swiphiqo namuntlha. Bibele yi ri: “Ntumbuluko hinkwawo wu hambeta wu konya ni ku vaviseka swin’we.” (Varhoma 8:22) Loko u ri emaxangwini swi nga ha vonaka onge swiphiqo swa wena a swi nge pfuki swi lulamile, kambe swilo swa antswa hi ku famba ka nkarhi. Kambe sweswi, i yini lexi nga ku pfunaka?

Vulavula ni munghana wa wena la wupfeke loyi u n’wi tshembaka hi ndlela leyi u titwaka ha yona. Bibele yi ri: “Nakulorhi wa ntiyiso u ni rirhandzu nkarhi hinkwawo, naswona i makwerhu la velekiweke loko ku ri ni maxangu.” (Swivuriso 17:17) Wanuna wo lulama loyi ku vulavuriweke ha yena eBibeleni u phofulele van’wana ndlela leyi a a titwa ha yona loko a ri emaxangwini. Hi nkarhi lowu a a titwa a “nyenya vutomi [byakwe],” u te: “Ndzi ta humesa mhaka leyi yi ndzi karhataka. Ndzi ta vulavula moya-xiviri wa mina wu ri ni mbitsi!” (Yobo 10:1) Ku phofulela van’wana ta le mbilwini swi nga vohlisa ndlela leyi u titwaka ha yona naswona swi nga ku pfuna leswaku u cinca ndlela leyi u swi langutaka ha yona swiphiqo leswi u nga na swona.a

Chulula mbilu ya wena eka Xikwembu hi xikhongelo. Vanhu van’wana va teka xikhongelo ku ri nchumu wo hungasa ha wona, kambe Bibele yi vula leswi hambaneke. Pisalema 65:2 yi vula leswaku Yehovha Xikwembu i “Mutwi wa xikhongelo,” nakambe 1 Petro 5:7 yi ri: “Xa mi khathalela.” Bibele yi kandziyisa nkoka wo tshemba Xikwembu. Hi xikombiso:

“Tshemba Yehovha hi mbilu ya wena hinkwayo naswona u nga titshegi hi ku twisisa ka wena n’wini. N’wi tivise tindlela ta wena hinkwato, kutani yena u ta lulamisa tindlela ta wena.”—SWIVURISO 3:5, 6.

“U ta enerisa ku navela ka lava va n’wi chavaka, naswona u ta ku twa ku rila ka vona va kombela ku pfuniwa, u ta va ponisa.”—PISALEMA 145:19.

“Ku tiyiseka loku hi nga na kona ha xona, i ka leswaku, ku nga khathariseki leswaku i yini lexi hi xi kombelaka hi ku ya hi ku rhandza ka xona, xa hi twa.”—1 YOHANE 5:14.

“Yehovha u le kule swinene ni lavo homboloka, kambe xikhongelo xa lavo lulama wa xi yingisa.”—SWIVURISO 15:29.

Loko u byela Xikwembu swiphiqo leswi u langutanaka na swona, xi ta ku pfuna. Ku ni xivangelo lexinene lexi endlaka leswaku Bibele yi hi khutaza ku ‘xi tshemba minkarhi hinkwayo. Hi chulula timbilu ta hina emahlweni ka xona.’—Pisalema 62:8.

Swin’wana Leswi U Faneleke U Swi Endla

Minkambisiso yi vula leswaku vanhu vo tala lava tisungaka va va va ri ni nkarhi wo leha va ri ni ntshikilelo.b Leswi swi lava leswaku munhu a kuma nkongomiso wa dokodela. Dokodela a nga ha bumabumela leswaku munhu wo tano a nwa mirhi yo karhi kumbe a tshika ku dya swakudya swo karhi. Minkarhi yin’wana ku endla vutiolori swi nga pfuna. Madokodela ma pfune vanhu vo tala swinene.c

Bibele yi ni rungula ro tala leri nga ku pfunaka ni ku ku nyika ntshembo. Hi xikombiso, loko Bibele yi vulavula hi Yehovha Xikwembu eka Nhlavutelo 21:4 yi ri: “Kutani xi ta sula mihloti hinkwayo ematihlweni ya vona, rifu a ri nge he vi kona, hambi ku ri ku kolola, ni xirilo ni xitlhavi a swi nge he vi kona. Swilo swo sungula swi hundzile.” Lexi i xitshembiso lexi humaka eka Yehovha naswona ku anakanyisisa ha xona swi nga ku chavelela.

Emisaveni hinkwayo Timbhoni ta Yehovha ti avelana ni vanhu va timiliyoni hi ta ntshembo lowu, lowu humaka eBibeleni. Hikwalaho ka sweswo, vanhu vo tala va ni ntshembo wa xiviri eminkarhini leyi, leyi tshikilelaka. Leswaku u kuma rungula leri engetelekeke, tihlanganise ni Timbhoni ta Yehovha ta laha u tshamaka kona, leswi u nga swi endla hi ku va u ti endzela eHolweni ya tona ya Mfumo kumbe hi ku ti tsalela eka adirese leyi faneleke eka leti nga eka tluka 5 ra magazini lowu. U nga ha tlhela u endzela Web site ya hina ya www.watchtower.org.

[Tinhlamuselo ta le hansi]

[Bokisi leri nga eka tluka 16]

MPFUNO LOWU HUMAKA EBIBELENI

● “Mi nga vileli ha nchumu, kambe eka hinkwaswo tivisani Xikwembu swikombelo swa n’wina hi xikhongelo ni xikombelo swin’we ni ku nkhensa swikombelo swa n’wina; kutani ku rhula ka Xikwembu loku tlulaka miehleketo hinkwayo ku ta rindza timbilu ta n’wina ni matimba ya n’wina ya mianakanyo ha Kreste Yesu.”—Vafilipiya 4:6, 7.

● “Ndzi vutise Yehovha, kutani a ndzi hlamula, u ndzi kutsurile eku chaveni ka mina hinkwako.”—Pisalema 34:4.

● “Yehovha u le kusuhi ni lava va tshovekeke mbilu; ni lava va pfotlokeke emoyeni wa va ponisa.”—Pisalema 34:18.

● “U horisa vanhu lava timbilu ta vona ti vavisekeke, naswona u boha timbanga ta vona leti vavaka.”—Pisalema 147:3.

[Bokisi leri nga eka matluka 17, 18]

LOKO U EHLEKETA KU TISUNGA ENDLA LESWI LANDZELAKA . . . 

Vulavula ni munghana wa wena loyi u n’wi tshembaka hi ndlela leyi u titwaka ha yona

Chulula mbilu ya wena eka Xikwembu hi xikhongelo

Kuma mpfuno eka madokodela

[Bokisi/Xifaniso lexi nga eka tluka 18]

EKA VANGHANA NI VANDYANGU

Hakanyingi swirho swa ndyangu ni vanghana va le kusuhi hi vona lava rhangaka va swi vona loko xirho xa ndyangu kumbe munghana la nga ni ntshikilelo a lava ku tisunga. Ku teka magoza yo karhi swi nga ponisa vutomi bya munhu yoloye! N’wi yingiseleni hi vurhon’wana loko a vulavula. Xiyani ku nonon’hweriwa loku a langutanaka na kona. Bibele yi ri: “Vulavulani hi ku chavelela eka mimoya-xiviri leyi karhatekeke.” (1 Vatesalonika 5:14) N’wi khutazeni ku kuma mpfuno naswona loko swi fanerile tiyisekani leswaku wa wu kuma mpfuno wo tano.