Ndzima 31

Mintirho Ya Yehovha I Yikulu Naswona Ya Hlamarisa

Xivono 10—Nhlavutelo 15:1–16:21

Nhloko-mhaka: Yehovha a ri endhawini ya yena yo kwetsima ngopfu; ku chuluriwa minkambana ya nkombo ya vukarhi bya yena emisaveni

Nkarhi wa ku hetiseka: Ku sukela hi 1919 ku ya fika hi nkarhi wa Armagedoni

1, 2. (a) Hi xihi xiviko xa vunharhu lexi Yohane a xi vikeke? (b) Hi wihi ntirho wa tintsumi lowu ku nga khale malandza ya Yehovha ma wu tiva?

WANSATI la velekaka n’wana wa xinuna! Dragona leyikulu leyi lavaka ku mita n’wana yoloye! Swikombiso sweswo swimbirhi swa le tilweni, leswi hlamuseriweke kahle eka Nhlavutelo ndzima 12, swi hi vekele erivaleni leswaku se byi ta hela ku nga ri khale vulala bya khale ka khaleni lebyi nga kona exikarhi ka Mbewu ya nsati wa Xikwembu na Sathana ni mbewu ya yena, ku nga madimona. Loko Yohane a kandziyisa swikombiso leswimbirhi, u te: “Kutani ku vonaka xikombiso lexikulu etilweni . . . Kavaloko ku vonaka xikombiso xin’wana.” (Nhlavutelo 12:1, 3, 7-12) Kutani Yohane u vike xikombiso xa vunharhu a ku: “Kutani ndzi vona xikombiso xin’wana etilweni, lexikulu, xo hlamarisa, xa tintsumi ta nkombo leti tameleke makhombo ya nkombo. Lawa i yo hetelela, hikuva ku hlundzuka ka Xikwembu ku hetisisiwa hi ku tirhisa wona.” (Nhlavutelo 15:1) Xikombiso lexi xa vunharhu na xona i xa nkoka swinene eka malandza ya Yehovha.

² Xiya ntirho wa nkoka lowu tintsumi ti wu endlaka eku hetisiseni ka ku rhandza ka Xikwembu. Mhaka leyi i khale malandza ya Yehovha ma yi tiva. Phela, mupisalema wa khale u huhuteriwe ku vulavula hi tintsumi to tano, hi ku ti khongotela a ku: “Dzunisani Yehovha, N’wina tintsumi takwe leti nga ni matimba lamakulu, leti hetisisaka rito rakwe, hi ku yingisa mpfumawulo wa rito rakwe!” (Pisalema 103:20) Sweswi eka xivono lexi tintsumi ti averiwe ku chulula makhombo ya nkombo yo hetelela.

3. Xana i yini makhombo ya nkombo naswona ku chuluriwa ka wona swi vula yini?

³ Xana i yini makhombo lawa? Ku fana ni ku yimbiwa ka timhalamhala ta nkombo, i vuavanyisi bya ndzoviso lebyi twarisaka langutelo ra Yehovha hi swiyenge swo hambana-hambana swa misava leyi ni ku lemukisa hi ta vuyelo byo hetelela bya swiboho swa yena swa vuavanyisi. (Nhlavutelo 8:1–9:21) Ku chuluriwa ka makhombo lawa swi vula ku humesiwa ka vuavanyisi byebyo loko hi siku ra vukarhi lebyikulu bya Yehovha a lovisa swilo leswi n’wi hlundzukisaka. (Esaya 13:9-13; Nhlavutelo 6:16, 17) Xisweswo, hi makhombo lawa, “ku hlundzuka ka Xikwembu ku [ta] hetisisiwa.” Kambe loko Yohane a nga si hlamusela ndlela leyi makhombo lawa ma nga ta chuluriwa ha yona, u hi byela hi ta vanhu van’wana lava ma nga taka ma nga va khumbi ku ya kwihi. Vanhu lava vo tshembeka va ale ku amukela mfungho wa xivandzana, kutani va yimbelela risimu ro dzunisa Yehovha loko va ri karhi va twarisa siku leri a nga ta tirihiselela ha rona. (Nhlavutelo 13:15-17)

Risimu Ra Muxe Ni Ra Xinyimpfana

4. I yini swin’wana leswi Yohane a swi voneke?

⁴ Yohane u vone xivono lexi hlamarisaka, u te: “Kutani ndzi vona leswi fanaka ni lwandle ra xinghilazi leri pfanganeke ni ndzilo, naswona lava koteke ku hlula eka xivandzana ni le xifanisweni xa xona ni le ka nhlayo ya vito ra xona a va yime ekusuhi ni lwandle ra xinghilazi, va tamele tiharipa ta Xikwembu.”—Nhlavutelo 15:2.

5. Xana “lwandle ra xinghilazi leri pfanganeke ni ndzilo” ri fanekisela yini?

⁵ “Lwandle [leri] ra xinghilazi” ra fana ni leri Yohane a ri voneke enkarhini lowu hundzeke, leri nga emahlweni ka xiluvelo xa Xikwembu. (Nhlavutelo 4:6) Ri fana ni “lwandle leri endliweke hi ku n’okisiwa” (ro hlayisa mati) etempeleni ya Solomoni, laha vaprista a va kuma mati yo tibasisa ha wona. (1 Tihosi 7:23) Xisweswo ri ma fanela kahle ‘mati yo hlantswa,’ ku nga Rito ra Xikwembu, leri Yesu a ri basisaka ha rona vandlha ra vaprista lava nga Vakreste lava totiweke. (Vaefesa 5:25, 26; Vaheveru 10:22) Lwandle leri ra xinghilazi ri ‘pfangane ni ndzilo,’ leswi vulaka leswaku vatotiwa lava va ringiwile kutani va basisiwa loko va ri karhi va yingisa milawu ya xiyimo xa le henhla leyi va vekeriweke yona. Ku tlula kwalaho, ri hi tsundzuxa ni leswaku Rito ra Xikwembu ri tamele marito ya vuavanyisi lama fanaka ni ndzilo eka valala va xona. (Deteronoma 9:3; Sofaniya 3:8) Byin’wana bya vuavanyisi lebyi fanaka ni ndzilo byi ta vonaka eka makhombo yo hetelela lama nga ta chuluriwa ku nga ri khale.

6. (a) I vamani vayimbeleri lava yimeke emahlweni ka lwandle ra xinghilazi ra le tilweni naswona hi swi tivisa ku yini? (b) Xana va ‘hlurile’ hi ndlela yihi?

⁶ Mhaka ya leswaku lwandle leri n’okisiweke etempeleni ya Solomoni a ri tirhisiwa hi vaprista, yi kombisa leswaku vayimbeleri lava yimeke emahlweni ka lwandle ra xinghilazi ra le tilweni na vona i vaprista. Va tamele “tiharipa ta Xikwembu,” kutani hi va fanisa ni vakulu va 24 ni lava 144 000, hikuva mintlawa leyi yi yimbelela yi tamele tiharipa. (Nhlavutelo 5:8; 14:2) Vayimbeleri lava Yohane a va voneke va ‘hlule xivandzana ni xifaniso xa xona ni nhlayo ya vito ra xona.’ Kutani va fanele va ri van’wana va lava 144 000 lava ha hanyaka emisaveni emasikwini lawa ya makumu. Va hlula tanihi ntlawa. Kwalomu ka malembe ya 90 ku sukela hi 1919, va ale ku amukela mfungho wa xivandzana kumbe ku tshemba leswaku xifaniso xa xona xi nga tisela vanhu ku rhula. Vo tala va vona se va tiyisele kukondza va fa kutani a swi kanakanisi leswaku leswi se va nga etilweni, va tsakela ku yimbelela swin’we ni vamakwavo lava ha riki emisaveni.—Nhlavutelo 14:11-13.

7. Xana haripa a yi tirhisiwa njhani enkarhini wa Vaisrayele va khale naswona ku va kona ka tiharipa ta Xikwembu exivonweni xa Yohane ku fanele ku hi khumba njhani?

⁷ Vahluri lava vo tshembeka va tamele tiharipa ta Xikwembu. Hi ndlela yoleyo va fana ni Valevhi va le tempeleni ya khale, lava a va gandzela Yehovha hi risimu leri fambisanaka ni ku chayiwa ka tiharipa. Kasi van’wana va profete va ri karhi va chaya tiharipa. (1 Tikronika 15:16; 25:1-3) Miloti yo nandziha leyi humaka eka tiharipa a yi endla leswaku loko Vaisrayele va yimbelelela Yehovha tinsimu ni swikhongelo swo dzunisa swin’we ni swinkhenso, swi va leswi tsakisaka swinene. (1 Tikronika 13:8; Pisalema 33:2; 43:4; 57:7, 8) Tiharipa a ti nga chayiwi loko va tshikileriwile kumbe va ri evuhlongeni. (Pisalema 137:2) Ku va kona ka tiharipa ta Xikwembu exivonweni lexi ku fanele ku endla leswaku hi langutela ku twa risimu ra ku hlula loku tsakisaka, leri dzunisaka ni ku nkhensa Xikwembu xa hina.a

8. Hi rihi risimu leri yimbeleriwaka naswona ma ri yini marito ya rona?

⁸ Yohane u ye emahlweni a ku: “Kutani va yimbelela risimu ra Muxe hlonga ra Xikwembu ni risimu ra Xinyimpfana, va ku: ‘Yikulu naswona ya hlamarisa mintirho ya wena, Yehovha Xikwembu, xa Matimba Hinkwawo. Tindlela ta wena ti lulamile naswona i ta ntiyiso, wena Hosi leyi nga riki na makumu. Kunene, i mani la nga ta ka a nga ku chavi, Yehovha, a vangamisa vito ra wena, hikuva hi wena ntsena u tshembekeke? Hikuva matiko hinkwawo ma ta ta ma ta gandzela emahlweni ka wena, hikuva swileriso swa wena swo lulama swi kombisiwile.’”—Nhlavutelo 15:3, 4.

9. Ha yini risimu leri ri vuriwa “risimu ra Muxe”?

⁹ Vahluri lava va yimbelela “risimu ra Muxe,” ku nga risimu leri fanaka ni leri Muxe a ri yimbeleleke eka xiyimo lexi fanaka ni lexi. Endzhaku ka loko Vaisrayele va vone makhombo ya khume lama hlaseleke Vaegipta ni ku lovisiwa ka mavuthu ya Vaegipta eLwandle ro Tshwuka, Muxe u sume risimu ra ku hlula leri dzunisaka Yehovha kutani Vaisrayele va yimbelela na yena, va ku: “Yehovha u ta va hosi hilaha ku nga riki na makumu, hi masiku.” (Eksoda 15:1-19) Swi fanerile leswaku vayimbeleri va le xivonweni xa Yohane, lava hluleke xivandzana naswona va katsekaka eku twariseni ka makhombo yo hetelela ya nkombo, na vona va hlanganyela eka risimu leri yimbeleleriwaka “Hosi leyi nga riki na makumu”!—1 Timotiya 1:17.

10. Hi rihi risimu rin’wana leri qambhiweke hi Muxe naswona ndzimana ya rona yo hetelela yi va khumba njhani lava ntshungu lowukulu namuntlha?

¹⁰ Eka risimu rin’wana leri qambhiweke hi Vaisrayele loko va lunghekela ku hlula tiko ra Kanana, Muxe la dyuhaleke u byele tiko a ku: “Ndzi ta vula vito ra Yehovha. Nyikani vukulu eka Xikwembu xa hina!” Ndzimana yo hetelela ya risimu leri yi tlhela yi khutaza lava nga riki Vaisrayele, naswona marito ya Muxe lama huhuteriweke ninamuntlha ma tirha ni le ka lava ntshungu lowukulu, u te: “Tsakani n’wina matiko, swin’we ni vanhu vakwe.” Ha yini va fanele va tsaka? Hikuva sweswi Yehovha u ta “rihisela ngati ya malandza yakwe, u ta tirihisela eka swirha swakwe.” Ku humesiwa loku ka vuavanyisi lebyi byo lulama ku ta tisa ntsako lowukulu eka hinkwavo lava tshembaka Yehovha.—Deteronoma 32:3, 43; Varhoma 15:10-13; Nhlavutelo 7:9.

11. Risimu leri Yohane a ri tweke ri hambeta ri yimbeleriwa hi ndlela yihi?

¹¹ Muxe a a ta swi tsakela swinene ku hlanganyela ni vayimbeleri va le tilweni esikwini ra Hosi, va yimbelela swin’we va ku: “Matiko hinkwawo ma ta ta ma ta gandzela emahlweni ka wena”! Risimu rero, lera ha yimbeleriwaka ninamuntlha, ri hambeta ri hetiseka hi ndlela leyi hlamarisaka hilaha hi swi vonaka hakona, ku nga ri exivonweni kambe hi ndlela ya xiviri, timiliyoni ta vanhu va “matiko” ti ri karhi ti khitikanela enhlengeletanweni ya Yehovha ya laha misaveni hi ntsako.

12. Ha yini risimu ra vahluri ri vuriwa “risimu ra Xinyimpfana”?

¹² Nilokoswiritano, risimu leri a hi ra Muxe ntsena kambe i ra “Xinyimpfana.” Njhani? Muxe a a ri muprofeta wa Yehovha eka Vaisrayele, kambe yena Muxe hi byakwe u profete leswaku Yehovha a a ta yimisa muprofeta la fanaka na yena. Muprofeta yoloye u tikombise a ri Xinyimpfana, ku nga Yesu Kreste. Muxe a a ri “hlonga ra Xikwembu” kasi Yesu a a ri N’wana wa Xikwembu, entiyisweni i Muxe Lonkulu. (Deteronoma 18:15-19; Mintirho 3:22, 23; Vaheveru 3:5, 6) Hikwalaho vayimbeleri lava va tlhela va yimbelela ni “risimu ra Xinyimpfana.”

13. (a) Swi tisa ku yini leswaku Yesu a fana na Muxe kasi u nkulu eka yena? (b) Xana hi nga hlanganyela njhani ni vayimbeleri eka risimu leri va ri yimbelelaka?

¹³ Ku fana na Muxe, Yesu u dzunise Xikwembu erivaleni a tlhela a profeta hi ndlela leyi xi nga ta hlula valala va xona ha yona. (Matewu 24:21, 22; 26:30; Luka 19:41-44) Yesu na yena a a langutele nkarhi lowu ha wona matiko ma nga ta ta ma ta dzunisa Yehovha, kutani leswaku sweswo swi koteka, u nyikele hi vutomi bya yena tanihi “Xinyimpfana xa Xikwembu” lexi tinyiketeleke. (Yohane 1:29; Nhlavutelo 7:9; ringanisa na Esaya 2:2-4; Zakariya 8:23.) Nakambe, tanihi leswi Muxe a a tlangela vito ra Xikwembu leri nge Yehovha, a tlhela a ri tlakusa, Yesu na yena u endle leswaku vito ra Xikwembu ri twarisiwa. (Eksoda 6:2, 3; Pisalema 90:1, 17; Yohane 17:6) Tanihi leswi Yehovha a tshembekaka, switshembiso swa yena leswi vangamaka swi ta hetiseka hakunene. A swi kanakanisi leswaku na hina hi hlanganyela ni vayimbeleri lava tshembekaka, swin’we ni Xinyimpfana na Muxe, eka marito ya risimu rero lama nge: “I mani la nga ta ka a nga ku chavi, Yehovha, a vangamisa vito ra wena?”

Tintsumi Leti Tameleke Minkambana

14. I vamani lava Yohane a va voneke va ri karhi va huma hi le vukwetsimelweni [ndhawu yo kwetsima ngopfu] naswona va nyikiwe yini?

¹⁴ Swi fanerile leswaku hi twa risimu ra vatotiwa lava nga vahluri. Ha yini? Hikuva va byi twarise emisaveni vuavanyisi lebyi nga eminkambaneni leyi a yi tele hi vukarhi bya Xikwembu. Kambe ku chuluriwa ka minkambana leyi a ku endliwi hi vanhu va nyama ntsena, hikuva Yohane u ye emahlweni a ku: “Kutani endzhaku ka swilo leswi ndzi languta, kavaloko ku pfuriwa vukwetsimelo [ndhawu yo kwetsima ngopfu] bya ntsonga wa vumbhoni etilweni, kutani tintsumi ta nkombo leti tameleke makhombo ya nkombo ti humelela hi le vukwetsimelweni, ti ambale ntsembyana wo basa, lowu vangamaka, naswona ti tikhame swifuva swa tona hi mavamba ya nsuku. Xin’wana xa swivumbiwa leswi hanyaka swa mune xi nyika tintsumi leta nkombo minkambana ya nkombo ya nsuku leyi teleke ku hlundzuka ka Xikwembu, lexi hanyaka hi masiku ni masiku.”—Nhlavutelo 15:5-7.

15. Ha yini swi nga hlamarisi leswi tintsumi ta nkombo ti humaka hi le ndhawini yo kwetsima ngopfu?

¹⁵ Le tempeleni ya Vaisrayele, leyi a yi fanekisela swilo swa le tilweni, a ku nghena muprista lonkulu ntsena eNdhawini yo Kwetsima Ngopfu, leyi exivonweni xa Yohane yi vuriwaka “vukwetsimisiso.” (Vaheveru 9:3, 7) Yi fanekisela ndhawu leyi Yehovha a tshamaka eka yona etilweni. Hambiswiritano, etilweni hi koxe, lunghelo leri ro nghena emahlweni ka Yehovha a hi ra Yesu Kreste Muprista Lonkulu ntsena kambe ni tintsumi ti na rona. (Matewu 18:10; Vaheveru 9:24-26) Kutani a swi hlamarisi ku vona tintsumi leta nkombo ti huma hi le ndhawini yo kwetsima ngopfu etilweni. Ti rhumiwe hi Yehovha Xikwembu hi byakwe, a ku: Fambani mi ya chulula minkambana ya nkombo ya ku hlundzuka ka Xikwembu.—Nhlavutelo 16:1.

16. (a) I yini lexi kombisaka leswaku tintsumi leta nkombo ti swi fanelekela kahle ku endla ntirho lowu ti averiweke wona? (b) I yini lexi kombisaka leswaku ku ni van’wana lava khumbekaka entirhweni lowu lowukulu wo chulula minkambana yo fanekisela?

¹⁶ Tintsumi leti ti swi fanelekela kahle ku endla ntirho lowu. Ti ambale ntsembyana wo basa, lowu vangamaka, ku kombisa leswaku ti basile hi tlhelo ra moya naswona ta kwetsima, naswona ti lulamile emahlweni ka Yehovha. Nakambe ti tikhame hi mavamba ya nsuku. Hakanyingi munhu u tikhama hi vamba loko a fanele a endla ntirho wo karhi. (Levhitika 8:7, 13; 1 Samuwele 2:18; Luka 12:37; Yohane 13:4, 5) Hikwalaho tintsumi ti tikhamile leswaku ti ya endla ntirho wo karhi. Tlhandlakambirhi, mavamba ya tona i ya nsuku. Etabernakeleni ya khale, nsuku a wu fanekisela swilo swa le tilweni. (Vaheveru 9:4, 11, 12) Leswi vulaka leswaku Xikwembu xi lerise tintsumi leti leswaku ti ya xi endlela ntirho wo karhi. Ku ni swivumbiwa swin’wana leswi katsekaka entirhweni lowu lowukulu. Xin’wana xa swivumbiwa leswi hanyaka swa mune xi ti nyika minkambana. A swi kanakanisi leswaku lexi a ku ri xivumbiwa lexi hanyaka xo sungula, lexi fanekiseriwaka hi nghala, leyi kombisaka xivindzi ni ku tiyimisela hi mbilu hinkwayo ku twarisa vuavanyisi bya Yehovha.—Nhlavutelo 4:7.

Yehovha eNdhawini Ya Yena Yo Kwetsima Ngopfu

17. Xana Yohane u hi byela yini hi ta ndhawu yo kwetsima ngopfu naswona sweswo swi hi tsundzuxa ndhawu yo kwetsima ngopfu ya le nkarhini wa Israyele hi ndlela yihi?

¹⁷ Eku heteleleni, loko Yohane a gimeta xivono lexi, u te: “Kavaloko vukwetsimelo byi tala hi musi hikwalaho ka ku vangama ka Xikwembu ni hikwalaho ka matimba ya xona, naswona a nga kona la koteke ku nghena evukwetsimelweni [ndhawu yo kwetsima ngopfu] ku nga si hela makhombo ya nkombo ya tintsumi ta nkombo.” (Nhlavutelo 15:8) Le Israyele wa khale a ku pfa ku va ni minkarhi leyi papa a ri funengeta ndhawu ya xiviri yo kwetsima ngopfu, kutani xikombiso lexi xa ku vangama ka Yehovha a xi sivela vaprista ku nghena endhawini leyi yo kwetsima ngopfu. (1 Tihosi 8:10, 11; 2 Tikronika 5:13, 14; ringanisa na Esaya 6:4, 5.) Yoleyo a ku ri minkarhi leyi Yehovha a a nghenelele ngopfu eka swiendlakalo swa laha misaveni.

18. Xana tintsumi leta nkombo ti ta tlherisela xiviko eka Yehovha endzhaku ka loko ti endle yini?

¹⁸ Nakambe Yehovha u karhateke ngopfu hi swilo leswi endlekaka laha misaveni sweswi. U lava leswaku tintsumi leta nkombo ti heta xiavelo xa tona. I nkarhi wa leswaku vuavanyisi byi fika emakumu hilaha Pisalema 11:4-6 yi vulaka hakona loko yi ku: “Yehovha u le tempeleni yakwe yo kwetsima. Yehovha—xiluvelo xakwe xi le matilweni. Mahlo yakwe ma vona, mahlo yakwe lama vangamaka ma kambela vana va vanhu. Yehovha u kambela wo lulama ni wo homboloka, kunene moya-xiviri Wakwe wa n’wi venga un’wana ni un’wana la rhandzaka madzolonga. U ta nisela lavo homboloka swirimbana, ndzilo ni xivavula ni mheho leyi vavulaka, leswaku swi va xiphemu xa xinwelo xa vona.” Tintsumi leta nkombo a ti nge tlheleli exivandleni xa Yehovha lexi tlakukeke ti nga si heta ku chulula makhombo lawa ya nkombo eka lavo homboloka.

19. (a) Hi xihi xileriso lexi twalaka naswona xi huma eka mani? (b) Xana ku chuluriwa ka minkambana yo fanekisela ku fanele ku sungule rini?

¹⁹ Kutani ku twale xileriso lexi chavisaka, lexi fanaka ni ku dzindza, xi ku: “Kutani ndzi twa rito lerikulu ri huma evukwetsimelweni ri ku eka tintsumi ta nkombo: ‘Fambani mi ya chulula minkambana ya nkombo ya ku hlundzuka ka Xikwembu emisaveni.’” (Nhlavutelo 16:1) I mani la vuleke xileriso lexi? Ku fanele ku ri Yehovha hi byakwe hikuva ku vangama ni matimba ya yena swi endle leswaku ku nga vi ni loyi a kotaka ku nghena endhawini yo kwetsima ngopfu. Yehovha u te etempeleni ya yena ya moya hi 1918 leswaku a ta avanyisa. (Malakiya 3:1-5) Kutani ku fanele ku ve endzhakunyana ka lembe rero loko a humesa xileriso xa leswaku ku chuluriwa minkambana ya vukarhi bya Xikwembu. Entiyisweni, vuavanyisi lebyi nga eminkambaneni leyi yo fanekisela byi sungule ku twarisiwa hi matimba hi 1922. Kutani ku twarisiwa ka byona ku fika emakumu namuntlha.

Minkambana Ni Ku Yimbiwa Ka Timhalamhala

20. Xana minkambana ya vukarhi bya Yehovha yi paluxe yini yi tlhela yi lemukisa hi yini, naswona yi chuluriwa njhani?

²⁰ Minkambana ya vukarhi bya Yehovha yi paluxa swilo leswi Yehovha a swi vonaka emisaveni ni ku lemukisa hi ta vuavanyisi lebyi Yehovha a nga ta byi humesa. Tintsumi ti chulula minkambana ti tirhisa vandlha ra Vakreste lava totiweke emisaveni, lava yimbelelaka risimu ra Muxe ni ra Xinyimpfana. Loko lava ntlawa wa Yohane va ri karhi va twarisa mahungu lamanene ya Mfumo, va kanye xivindzi kutani va paluxa leswi minkambana leyi ya vukarhi yi swi tameleke. (Matewu 24:14; Nhlavutelo 14:6, 7) Xisweswo, rungula ra vona ri twarisa ntshunxeko eka vanhu kambe ri tlhela ri lemukisa hi ta “siku ra ku rihisela ka Xikwembu xa hina.”—Esaya 61:1, 2.

21. Xana swivandla leswi minkambana yo sungula ya mune ya vukarhi bya Xikwembu yi kongomisiweke eka swona swi fana njhani ni swa ku yimbiwa ka timhalamhala ta mune to sungula, kambe swi hambana ha yini?

²¹ Minkambana ya mune yo sungula ya vukarhi bya Xikwembu yi kongomisiwe eswivandleni leswi fanaka ni leswi timhalamhala ta mune to sungula leti yimbiweke a ti kongomisiwe eka swona, ku nga misava, lwandle, milambu ni minseledyana ya mati, ni le ka dyambu ni tinyeleti. (Nhlavutelo 8:1-12) Kambe, ku yimbiwa ka timhalamhala ku twarise makhombo eka “n’we-xa-nharhu” xa swivandla leswi, kasi ku chuluriwa ka minkambana ya vukarhi bya Xikwembu ku swi khumba hilaha ku heleleke swivandla leswi. Xisweswo, hambileswi ku rhangiweke hi xiphemu xa “n’we-xa-nharhu” xa Vujagana esikwini ra Hosi, a xi kona xiphemu xa fambiselo ra Sathana lexi siyiweke xi nga hlaseriwanga hi khombo ra marungula ya vuavanyisi bya Yehovha ni mbitsi lowu ma nga ta wu tisa.

22. Xana ku yimbiwa ka timhalamhala tinharhu to hetelela a ku hambane hi ndlela yihi, naswona ku fambisana njhani ni minkambana yinharhu yo hetelela ya vukarhi bya Yehovha?

²² Timhalamhala to hetelela tinharhu leti yimbiweke a ti nga fani hikuva tona a ti vitaniwa makhombo. (Nhlavutelo 8:13; 9:12) Makhombo mambirhi yo sungula a ku ri tinjiya ni mavuthu ya tihanci, kasi khombo ro hetelela a ri vula ku velekiwa ka Mfumo wa Yehovha. (Nhlavutelo 9:1-21; 11:15-19) Hilaha hi nga ta swi vona hakona, minkambana yinharhu yo hetelela ya vukarhi bya Xikwembu yi tlhela yi khumba swilo leswi fanaka, ntsena swi hambanilenyana ni makhombo lamanharhu. Sweswi a hi rhiyeni ndleve loko ku hlavuteriwa xivono lexi hlamarisaka, lexi nga ta endla leswaku ku chuluriwa minkambana ya vukarhi bya Yehovha.

[Nhlamuselo ya le hansi]