Madota, ma tangalisa “a muhefemulo wu kareleko” ke?

Ângela,a a makabye wa xisati a nga kwalomo ka 30 wa malembe i karatekilenyana. I rinzela madota. Ma lava ku mu byela yini? Lisine lezaku ku hunza masiku yo kari na a ngayi mitlhanganweni, kanilezi i karele hi lezi a nga tira siku gontlhe na a vunetela vanhu va khosaheleko. Ahandle ka ku karateka hi kota ya zilo zakwe za siku ni siku, Ângela i karateka nguvu hi kota ya mamani wakwe a babyako.

Loku ku wa hi wena u nga wa ta enzela Ângela, u wa ta wu tangalisisa kuyini ‘a muhefemulo lowu wu kareleko’ ke? (Jer. 31:25) Kona u nga ti longiselisa kuyini lezaku u maha lienzo la wurisi lo tangalisa ke?

ALAKANYELA A ZIYIMO LEZI A VAMAKABYE VA WENA VA NGA KA ZONA

Ka zikhati zinwani, hontlheni ha karala hi kota ya mitiro ya hina ya kutihanyisa kutani mitiro ya bandla. Hi xikombiso, muprofeti Danieli i lo “mbhela ntamu” a xikhati lexi a nga kombiwa muwoniso lowu a nga kala a nga wu zwisisi. (Dan. 8:27) I lo vuniwa hi ngelosi Gabrieli a xikhati lexi yi nga woneka kakwe. A ngelosi leyi yi nga rumilwe hi Nungungulu yi lo vuna Danieli a ku zwisisa, yi mu tiyisekisa lezaku a mikhongelo yakwe yi zwilwe hi Jehova, yi tlhela yi mu byela lezaku i wa ha hi munhu wo “ranzeka nguvu.” (Dan. 9:21-23) Ka khati ginwani, a magezu ya ma nene ma wulilweko hi ngelosi yinwani ma lo tiyisa a muprofeti loyi a nga mbhelile ntamu. — Dan. 10:19.

Hi ku fanana, na u nga se enzela mukholwa-kuloni loyi kuzilava a kareleko kutani a mbhelileko ntamu, ti nyike xikhati xa ku alakanyela a ziyimo lezi a nga ka zona. Zikarato muni a kumanako nazo? Xana a zikarato lezi zi nga ngha zi mu mbhetisa kuyini ntamu? Matshamela muni ya ma nene lawa a ma kombisako? Ricardo, a nga dota hi xipimo xa 20 wa malembe, i ngalo: “A kupima ka mina nzi ku yisa ka matshamela ma nene ya vamakabye va mina.” I engeta aku: “Hi ku alakanyela khwatsi hi ziyimo zabye na nzi nga se va enzela, za nzi olovela a ku tiva tindlela ta ku va tiyisa ka ziyimo lezi va nga ka zona.” Loku ku hi lezaku u ta famba ni dota ginwani ka lienzo lelo, hikuyini mu nga tshamiko zinwe hasi mu alakanyela hi xiyimo xa makabye loye ke?

MAHA VAMAKABYE VA WENA VA TIZWA NA VA TLHATLHEKILE

Handle ko kanakana, wa zi tiva lezaku a ku va byela lezi wena wutsumbu u ti zwisako zona zi nga maha vanwani va tizwa na va nga tlhatlhekangi. Kasi ku kombisa: A makabye zi nga ha mu karatela a ku ti vulula xifuva ka madota lawa ma mu enzeleko. Makunu, u nga xi tlhatlhisa kuyini a xirami lexi? A kunwayitela ka lisine, ku ngahi ka kufarisa, ni magezu yo tiyisa hlana zi nga vuna nguvu! Miguel, a nga dota hi xipimo xa 40 wa malembe, i sangula maenzo yakwe hi magezu yo kota lawa: “Makabye, a nchumu wo tsakisa nguvu lowu a madota ma ti buzako hi wona ku enzela vamakabye mitini yabye kasi va va tiva khwatsi. Hikwalaho, nzi wa gi rinzela hi mahlo yo pswhuka a siku legi ga nyamutlha.”

Kuzilava u nga zi wona na zi hi chukwana a ku sangula mabhulo ya nwina hi ku maha mukhongelo hi mbilu yontlhe. Mikhongelweni yakwe, mupostoli Paule i wa khanyisa a kukholwa, liranzo, ni kutimisela ka vamakabye vakwe. (1 Tes. 1:2, 3) Hi ku wula lezi u ti zwisako zona xungetano hi matshamela ya ma nene ya makabye wa wena, wo longisela a mbilu ya wena ni ya yenawu lezaku muva ni mabhulo ma akako. A magezu ya wena ma nga mu tangalisa kambe. Rui, a dota gi buvileko, i ngalo: “Ka zikhati zo kari, hontlheni ha tshuka hi rivala a zilo za zi nene lezi hi zi mahako. Hikwalaho, a xikhati lexi a wokari a hi alakanyisako, a muhefemulo wa hina wa tangala.”

NYIKA A XINYIKIWO XA KA MOYA

A ku fana na Paule, wenawu u nga nyika ‘xinyikiwo xa ka moya’ hi ku bhula hi Mitsalo ni makabye wa wena hambu kova vesi ginwe ntsena. (Rom. 1:11) Hi xikombiso, a makabye loyi a rerekileko a nga tshuka a tizwa na a nga hi wa nchumu a ku fana ni mutsali wa tisimu loyi a ti fananisileko ni ‘nkwama wu womileko lomu ka musi.’ (Tis. 119:83, 176) Anzhako ka ku tlhamusela kutsongwani a magezu lawo, u nga tiyisekisa makabye loye a ku wena wa tsumba lezaku ‘a nga rivalangi’ a milayo ya Nungungulu.

Hi ku fanana, xana a mufananiso wa cheleni gi lahlekileko wu wa nga ta khumba mbilu ya makabye wa xisati loyi a tsikileko bandla kutani a nga ha hisekeliko a zilo za moya ke? (Luka 15:8-10) A cheleni lego gi lahlekileko kuzilava gi wa wumba a kolari ga lisima gi nga mahilwe hi zingerengere zo tala za siliva. Hi ku bhula hi mufananiso lowo, u nga mu vuna ku wona lezaku yenawu xiro xa lisima xa bandla ga wuKristu. Anzhako ka ku bhula hi mhaka leyi, u nga ha mu dlunyatisela lezi Jehova a mu khatalelisako zona kota yinwe ya tiyivu takwe.

Hi tolovelo, a maKristu-kulori ma xalala hi ku wulawula hi mahungu ya Biblia. Hikwalaho, u nga wulawuli wece. Anzhako ka ku lera vesi legi gi yelanako ni xiyimo xabye, u nga hlawula gezu-tshinya kutani mhaka yo kari zonake u va kombela lezaku va wula xokari xungetano hi mhaka leyo. Hi xikombiso, anzhako ka ku lera 2 Va Le Korinte 4:16, a dota gi nga ha wutisa lezi: “Xana wa alakanya a tindlela to kari leti Jehova a ku mahako luswa ha tona wena wutsumbu?” A mahela legi gi nga vulula ndlela ya lezaku muva ni kutiyisana ka lisine. — Rom. 1:12.

U nga tangalisa mukholwa-kuloni kambe hi ku wulawula hi matimu ya munhu a kumbukiwako lomu ka Biblia lawa ma yelanako ni xiyimo xakwe. A xiyimo xa makabye wo kari loyi a karatekileko moyeni xi nga ha yelana ni xa Hana kutani Epafroditusi, lava ka zikhati zo kari va nga karatekile moyeni kanilezi va simamileko kuva va lisima mahlweni ka Nungungulu. (1 Sam. 1:9-11, 20; Fil. 2:25-30) Hikuyini u nga wulawuliko hi zikombiso zo kari za zi nene za lomu ka Biblia loku a xiyimo xi vumela ke?

SIMAMA KU VA KHATALELA

U nga kombisa kukhatala ka lisine hi vamakabye va wena va xinuna ni va xisati hi ku simama u hlota tindlela to tiva lezaku vo yini anzhako ka loku u va enzele khati go ranga. (Miti. 15:36) A xikhati lexi u gumesako lienzo, zi ngava chukwana ku boha siku ga kuya wutirelini ni makabye loye. A xikhati lexi Bernardo, a dota go buva, a kumanako ni makabye wa xinuna kutani wa xisati loyi a nga mu enzele zalezinyana, i kumbuka hi wutlhari a wusungukati go kari a mu nyikileko zonake aku: “Hi nga nzi byela makabye, xana a mhaka liyani yi ku vunile?” Loku u kombisa kukhatala loko, u ta zi tiva lezaku ka ha laveka xivuno xinwani kutani zi enele.

Ka xikhati lexi, a vamakabye va hina va xinuna ni va xisati va lava ku khatalelwa nguvu, ku zwisisiwa, ni ku ranziwa. (1 Tes. 5:11) Hikwalaho, na u nga se maha lienzo la wurisi, ti nyike xikhati xa ku alakanyela hi xiyimo xa makabye loye u lavako ku mu enzela. Khongela hi zona. Hlawula mitsalo yi faneleko. Loku u maha lezo, u ta kuma magezu ma to tangalisa “a muhefemulo wu kareleko”!