WA HA ZI ALAKANYA KE?

Xini “a tiko” legi gi to hunza?

“A tiko” legi gi to hunza vanhu lava a mahanyela yabye ma nga zwananiko ni kuranza ka Nungungulu. (1 Joh. 2:17) A misava ni vanhu vo tsumbeka va ta pona. — 1/1, maphajina 5-7.

Hambu lezi a fileko, xana Abeli wa ha wulawula ka hina hi ndlela muni? (Maheb. 11:4)

I maha lezo hi kukholwa. Hi nga gonza ka kukholwa kakwe hi tlhela hi ti karatela ku ku pimanyisa. A xikombiso xakwe xa ha hanya niku xa ha hi ni ntamu. — 1/1, phajina 12.

Zilo muni lezi hi faneleko ku ti wonela ka zona kasi zi nga hi hambanisi na Nungungulu?

A zo kari hi lezi: ntiro ni lezi hi ti karatelako ku maha wutomini ga hina, kutihungata ni kuhlakana, kuzwanana ni xaka gi susilweko bandleni, ku hlongolisela tekinolojiya, ku karateka hi kota ya lihanyo, kuhlongolisela mali, ni ku nyika lisima lo hunza mpimo a mawonela ya hina kutani xikhundla. — 15/1, maphajina 12-21.

Hi gonza yini ka kutikoramisa ka Mosi?

Wutshanwini ga ku mila tipapa hi kota ya xikhundla xakwe, Mosi i wa tsumba Nungungulu, i wa nga ti tsumbi. Hi nga tshuki hiva ni matshanza hi kota ya xikhundla, wuhosi, kutani wutlhari ga hina ga mabeleko. Wutshanwini ga lezo, ngha hi tsumba Jehova. (Mav. 3:5, 6) — 1/2, phajina 5.

Va ta hanya kwihi lava va to vuxiwa hi ka vafileko?

A 144.000 wa vona va ta ya hanya tilweni. A kutala ka vanhu, va ta vuxiwa kasi va hanya kwalaha misaveni, na va rinzela ku hanya kala kupinzuka. — 1/3, phajina 6.

Xana zi wa wula yini a kuva a vaIsraeli va hi ‘makhuna mbilwini’? (Jer. 9:26)

Va wa nonohile mahanyeleni yabye ya kubiha niku va wa fanele ku susa lexi xi nga nonohisa timbilu tabye — kupima kabye, lezi va nga zi ranza kutani mixuvo yabye yi nga lwisana ni kuranza ka Nungungulu. (Jer. 5:23, 24) — 15/3, maphajina 9-10.

Xana Jesu i’ve xikombiso xa ku kuma litsako wutomini hi ndlela muni?

Jesu i wa xi tiva lexi a nga hanyela xona; ku nga ku maha kuranza ka Nungungulu. I wa mu ranza nguvu a Dadani wakwe niku i wa ranza vanhu. I wa zi tiva kambe lezaku a Dadani wakwe i wa mu ranza niku i wa xalala hi yena. Leyo hi yona ndlela ya ku kuma litsako wutomini. — 1/4, maphajina 4-5.

A xipanze xa laha misaveni xa hlengeletano ya Jehova xi wumbiwa hi vamani?

Hubye yi Fumako, tikometi ta maravi, vawoneleli va fambafambako, tihubye ta madota, mabandla, ni Timboni hi yinwe ni yinwe. — 15/4, phajina 29.

Hikuyini hi nga wulako lezaku a kulamula ka Nungungulu a ku vangi ka tihanyi?

Jehova a nga xalaliswi hi kufa ka wakubiha. (Ezek. 33:11) Lezi a zi mahileko kaleloko zi komba lezaku Nungungulu i ranga hi ku tlharihisa vanhu hi liranzo na a nga se neha kulamula. Lezo zi hi nyika kutsumba ka lezaku hi nga pona a kulamula loku ka ha tako. — 1/5, maphajina 5-6.

Xana a vaIsraeli va wa lamula a zigevenga va zi daya hi ku zi hayeka timhanzeni?

Ahihi. A matiko manwani ya xikhatini lexo ma wa maha, kanilezi a tiko ga Israeli gi wa nga mahi. Hi kutsongwani ka kona, xikhatini xa kutsaliwa ka Mitsalo ya xiHeberu, a zigevenga zi wa ranga hi ku dawa, hi ku gandliwa hi maribye. (Levi. 20:2, 27) Anzhako ka lezo, hi kona va nga hayeka xirumbi lexo laha mhanzeni kota xitlharihiso ka vanwani. — 15/5, phajina 13.

Hikuyini a kurula laha misaveni ku nga ka xikhatanyana?

Hambu lezi a vanhu va zi kotileko ku maha zilo zo tala, a va na ntamu wa ku ti fumela ha voce. (Jer. 10:23) Satani hi yena a fumelako tiko, hikwalaho a vanhu va nga ta tshuka va zi kotile ku neha kurula laha misaveni. (1 Joh. 5:19) — 1/6, phajina 16.