A kuxaniseka ku laha kusuhani ni ku mbhela!

MUFUMO WA WU NENE

“Nungungulu wa le tilweni i ta vuxa a mufumo wu to kala wu nga lobyiswi, ni wuhosi ga wona cima gi nga ta nyikelwa ka ginwani tiko. Wu ta panza wu lovisa yontlhe mifumo leyi, wona wu ku tsonzoma kala kupinzuka.” — Danieli 2:44.

A Mufumo wa Nungungulu wukosi ga le tilweni. Jesu Kristu, loyi a hlawulilweko kota Hosi ya wona, i ta valeta a mifumo yontlhe ya vanhu a tlhela a maha lezaku a kuranza ka Nungungulu ku nga mahiwi le tilweni koce, kanilezi ku mahiwa ni laha misaveni. (Mateu 6:9, 10) A mufumo lowu wu nga ta tshuka wu valetiwa hi mufumo wa vanhu hakuva wona ‘mufumo wu nga mbheliko wa Hosi ya hina ni Muhanyisi Jesu Kristu.’ Xikhatini lexo, laha misaveni ku tava ni kurula kala kupinzuka. — 2 Pedro 1:11.

KU NGA TA HAVA NI WUKHONGELI GA MAWUNWA

“Satani wa ti hunzula a ku khwatsi i ngelosi ya kuwonekela. Hikwalaho ngha hi nga hlamali loku a malanza yakwe ma ti hunzula maku khwatsi malanza ya kululama. A magumeso yabye ma ta ringana ni mitiro yabye.” — 2 Va Le Korinte 11:14, 15.

A wukhongeli ga mawunwa gi ta kombiswa kubaseni lezaku mitiro ya Satani gi tlhela gi fuvisiwa laha misaveni. Ku nga ta hava ni livengo ge hambu kuhalatiwa ka nkhata lezi zi vangiwako hi wukhongeli. Hi ndlela leyo, vontlhe lava va ranzako ‘Nungungulu a hanyako ni wa lisine’ va ta zi kota ku mu khozela hi “kukholwa kunwe,” na va mu khozela ‘hi moya ni lisine.’ Lezo zi ta neha kurula ni kuzwanana! — 1 Va Le Tesalonika 1:9; Va Le Efesusi 4:5; Johani 4:23.

A VANHU VA TAVA VO MBHELELA

“Nungungulu wutsumbu i tava navo, ava Nungungulu wabye. I ta kulula mihloti yontlhe mahlweni yabye. Ku nga ha ta va kona kufa, hambu ni hlomulo, kutani kurila ni kubayisa; hakuva a zilo zo sangula zi hunzile.” — Kuvululelwa 21:3, 4.

Jehova Nungungulu i ta maha lezo hi ku tirisa N’wana wakwe Jesu, loyi a nga nyikela a wutomi gakwe hi kota ya vanhu. (Johani 3:16) Hi ku rangelwa hi Jesu, a vanhu vontlhe va tava vo mbhelela. Ku nga ta hava ni kuxaniseka hakuva “Nungungulu wutsumbu i tava navo” niku i ta “kulula mihloti yontlhe mahlweni yabye.” A kungambheleli ka vanhu ni kuxaniseka zi ta mbhela; “a valulamileko va taga tshomba ya tiko, va aka ka gona kala kupinzuka.” — Tisimu 37:29.

A MIMOYA YA KUBIHA YI NGA TA HAVA KONA

‘Jesu Kristu i lo khoma drako, a nyoka leyi ya kale, yi nga Muhlevi na Satani, a mu boha a 1000 wa malembe. I lo mu hoxa nkeleni wa lieswila, a wu vala, a wu tiyisa hi xifungo hehla kakwe, kasi a nga khohlisi matiko.’ — Kuvululelwa 20:2, 3.

Wontlhe a kucetelo wa Satani wu ta fuva a xikhati lexi yena ni madimoni yakwe va to bohiwa va hoxiwa “nkeleni wa lieswila,” ku nga ku vekiwa ka xiyimo xa ku va nga ha zi koti ku maha nchumu. A kucetelo wabye wo biha hehla ka vanhu wu nga ta hava kona. Hakunene ku tava kutlhatlheka ka hombe a ku hanya misaveni yi nga hiko ni kucetelo wa Satani zinwe ni madimoni yakwe!

A ‘MASIKU YO GUMESA’ MA TA NGHA MA MBHELILE

A ‘masiku yo gumesa’ ma ta mbhela a xikhati lexi ku to sangula lezi Jesu a ngaku “kuxaniseka ka hombe.” I te ngalo: “Ku tava kona a kuxaniseka ka hombe, loku ku nga ngha ku nga hi kona hi kusanguleni ka misava kala makunu, cima ku nga ta ku va kona kambe.” — Mateu 24:21.

A kuxaniseka loko ku tava ka hombe hakuva ku ta humelela makhombo yaku cima a ma se humelela. A makhombo lawo ma ta gemeta musi ‘yimpini ya siku lego ga hombe ga Nungungulu wa Ntamu-wontlhe,’ leyi yi tiviwako kota “Har–Magedoni.” — Kuvululelwa 16:14, 16.

Matshanwini wontlhe, a vanhu lava va ranzako kululama va rinzela hi mahlo yo pswhuka a ku wona kugumesa ka tiko legi go biha. Wona makatekwa ma tsongwani lawa va to ma kuma Mufunweni wa Nungungulu.

NUNGUNGULU I TA MAHA ZINWANI KAMBE!

A vanhu va “xidlemo xa tsanza-vahlayi” va ta poniswa va nghena misaveni yiswa yo rula: A Biblia gi wula lezaku ku tava ni vanhu va “xidlemo xa tsanza-vahlayi” va to ‘huma kuxanisekeni ka hombe’ va poniswa lezaku va ya hanya misaveni yiswa laha ku tova ni kululama. (Kuvululelwa 7:9, 10, 14; 2 Pedro 3:13) Va taku ngalo va ponisiwa hi Jesu Kristu, a “Yivana ya Nungungulu, leyi yi susako zionho za tiko!” — Johani 1:29.

A vanhu va ta vuneka hi ku gonzisiwa hi Nungungulu: Misaveni yiswa, a “kutiva Jehova ku tava ku enetile misava.” (Isaya 11:9) A gonziselelo leyi yi ta patsa ku tiva ndlela ya kuhanyisana hi kurula ni vanhu vontlhe ni ku nga onheteli misava. Nungungulu i tsumbisa lezi: “Hi mina Jehova, Nungungulu wa wena, Loyi a ku gonzisako lezi zi ku vunako, Loyi a ku rangelako ndleleni leyi u faneleko ku famba ha yona.” — Isaya 48:17.

A maxaka ni vanghana va hina va nga zilahleni va ta vuxiwa: A xikhati lexi a nga hi laha misaveni, Jesu i vuxile munghana wakwe Lazaru hi ka vafileko. (Johani 11:1, 5, 38-44) Hi ndlela leyo, i lo komba lezi a to maha misaveni yontlhe Mufunweni wa Nungungulu. — Johani 5:28, 29.

A kurula ni kululama zi ta tshama kala kupinzuka: Mufunweni wa Kristu, ku nga tava ni wubihi. Hi zi tivisa kuyini? Hakuva Jesu wa zi kota ku wona lezi zi nga mbilwini ya munhu, niku i ta tirisa a wutlhari lego kasi ku lamula valulamileko ni vakubiha. Lava va to ala ku cica mahanyela yabye yo biha va nga ta hanya misaveni yiswa ya Nungungulu. — Tisimu 37:9, 10; Isaya 11:3, 4; 65:20; Mateu 9:4.

Lezi hi zi wonileko ziprofeto zi tsongwani ntsena xikari ka ziprofeto zo tala za Biblia lezi zi kombako a zilo za zi nene zi to maheka xikhatini xi tako. A xikhati lexi a Mufumo wa Nungungulu wu to fuma laha misaveni, ku tava ni “kurula ka hombe” kala kupinzuka. (Tisimu 37:11, 29) Zontlhe lezi zi vangako kubayisa ni kuxaniseka ka vanhu zi ta fuvisiwa. Lezo a zi kanakanisi hakuva Nungungulu wutsumbu i tsumbisa lezi: “Langutani nzi maha zilo zontlhe ziva ziswa. . . . Leti timhaka ti tsumbekile.” — Kuvululelwa 21:5.