‘A Kuranza Ka Nungungulu A Ku Mahiwe’
1. Hi yihi a hloko ya mhaka ya longoloko wa siku ga mutlhangano wo hlawuleka wa lembe ga ntiro ga 2012, niku hikuyini zi nga ni fanelo a ku wulawula hi mhaka leyi?
1 Hina hi vangilwe hi kota ya kuranza ka Jehova. (Kuv. 4:11) Hikwalaho, zi wa nga ta koteka a ku tatisa a kungo ga kuvakona ka hina loku hi wa nga gonzi hi tlhela hi maha a kuranza ka Nungungulu. Lezo a zi hehuki hakuva hi fanele kulwa ni ku byekelela ku maha “a kuranza ka nyama ni ka maalakanyo” kutani ku maha “a kuranza ka vamatiko.” (Efe. 2:3; 1 Ped. 4:3; 2 Ped 2:10) Loku hi wa nga vuniwi hi Nungungulu, hi wa ta tlhela hiva mhangweni ya ku ‘phasiwa hi Diabolus lezaku hi maha kuranza kakwe.’ (2 Tim. 2:26) A longoloko wa hina wa siku ga mutlhangano wo hlawuleka wa lembe ga ntiro ga 2012 wu ta vuna a munwe ni munwani wa hina lezaku a hanya hi kuyelana ni xikombelo-tshinya xa wunharu xa mukhongelo wa xikombiso. A hloko ya kona ya mhaka i “A Kuranza Ka Nungungulu A Ku Mahiwe.” — Mat. 6:9, 10.
2. Hi zihi a ziwutiso lezi zi to hlamuliwa nzeni ka longoloko?
2 Ziwutiso Zi To Hlamuliwa: A xikhati lexi u ingiselako a longoloko, lava a mihlamulo ya ziwutiso lezi: Zini zinwani za lisima hi faneleko ku maha ahandle ka kuzwa a Mhaka ya Nungungulu? Xana hi nga simamisa kuyini a ku pima lezaku xini a kuranza ka Nungungulu? Hikuyini hi faneleko ku ti yimisela a ku vuna vanhu va tixaka tontlhe? Hi nga gi kumisa kuyini a wutomi go nyawula ni gi xalalisako? Vanhu vaswa, zini mu faneleko ku zi tiyisa ka Jehova? Mabhinzu muni hi ma kumako hi ku maha a kuranza ka Nungungulu? Hikuyini zi nga za xihatla a ku aka ni ku tiyisa vanwani?
3. Xana hi nga vunekisa kuyini hi kumbheleleko hi longoloko lowu wa siku ga mutlhangano wo hlawuleka?
3 Maha zontlhe zi kotekako kasi uva kona u tlhela u demba khwatsi a ndleve ka longoloko. Za koteka a ku a mukaneli loyi a to enzela a mutlhangano wa nwina a hi xiro xa Beteli kutani muwoneleli a fambafambako. Mahlweni ni nzhako ka longoloko, tlhatlheka lezaku u bhula naye zinwe ni sati wakwe, loku a tekile. A xikhati u tlhelako kaya u nga ti mahi “muzwi a rivalako,” kanilezi vuxeta a longoloko zinwe ni ngango wa wena mu tlhela mu bhulisana hi lezi mu zi kotako ku hanyisa zona hi kuyelana ni kuranza ka Nungungulu hi kumbheleleko. — Jak. 1:25.
4. Hikuyini zi nga za lisima a kuva hi rangisa a ku maha a kuranza ka Nungungulu?
4 Zezanyana, lava va mahako a kuranza kabye wutsumbu va tlhela va ala ku maha a kuranza ka Jehova va ta loviswa. (1 Joh. 2:17) Hikwalaho, ha bonga hi lezi Jehova a longiseleko a mahungu lawa ma tako hi xikhati xi faneleko lezaku ma hi vuna ku rangisa a ku maha a kuranza ka Nungungulu!