Hi Vamani Va Mahako Kuranza Ka Jehova Inyamutlha?
1. Hi ta sangula rini ku gonza a broxura Hi Vamani Va Mahako Kuranza Ka Jehova Inyamutlha? niku hi ta vunekisa kuyini?
1 Kusukela ka viki ga 28 ka Outubro, ku ta gonziwa a broxura Hi Vamani Va Mahako Kuranza Ka Jehova Inyamutlha? ka Xigonzo xa Biblia xa Bandla. A broxura legi ga giswa, gi humesilweko ka Gotsovanyano wa Muganga “Hlayisa Mbilu ya wena!,” gi mahelwe ku vuna zigonzani za Biblia lezaku zi tiva a hlengeletano ya Jehova. A ku gonza a broxura legi zi nga ta hi maha hi xalala nguvu hi kuva hlengeletanweni ya Jehova ntsena, kanilezi zi ta tlhela zi hi vuna ku tiva khwatsi a xibya lexi xa lisima nguvu wutirelini. — Tis. 48:13.
2. Xana a broxura legi gi ta gonziswa kuyini laha bandleni?
2 Lezi gi to gonziswa zona: A mufambisi i fanele ku avela xikhati xakwe hi ndlela ya ku tinzima tontlhe ti gonziwa khwatsi. I ta sangula xigonzo xinwe ni xinwani hi ku lera a xiwutiso lexi xi nga hloko ya mhaka. Anzhako ka lezo, i ta kombela a mugonzi wa tinzimana lezaku a gonza a nzimana yo sangula. Hi kulanzela, a mufambisi i ta maha xiwutiso lexi a xi longiseleko na ka ha hi mahlweni kasi ku vulula xigonzo. A xipanze xinwe ni xinwani xi sangulako hi magezu yo timisiwa xi fanele ku leriwa xoce mu tlhela mu bhulisana ha xona. Anzhako ka loku a xipanze lexo xi lerilwe, a mufambisi wa xigonzo i ta kombela vaingiseli lezaku va wula lezi xi hlamulisako zona a xiwutiso xa hloko ya mhaka. A broxura legi kambe gi na ni zithombe zo tala lezi va nga nyikako mitlhamuselo. Loku a xikhati xi vumela, a mitsalo-tshinya yi fanele ku leriwa. Na a nga se hunza aya ka xigonzo xi lanzelako, a mufambisi wa xigonzo i ta vuxeta hi ku maha ziwutiso zi nga magumo ka phajina. Loku ku hi ni kwadru “Tiva zinwani,” i ta kombela lezaku gi leriwa, a gumesa a kombela vaingiseli lezaku va wula lezi a xigonzani xi nga vunekisako zona hi ku lanzela wusugukati lego. Loku a xikhati xi vumela, a mufambisi a nga ha tirisa tihloko ta mhaka kota ziwutiso za kuvuxeta. Lezi a zi wuli ku hi zalezi hi to fambisisa zona xigonzo xa Biblia loku hi gonza ni munhu.
3. Zini hi faneleko ku maha kasi ku vuneka khwatsi hi ku gonza a broxura legi?
3 Kasi u vuneka khwatsi, tana mutlhanganweni na u vuxetile khwatsi. Ti karatele ku nyikela mihlamulo. Laha a xigonzo xi fambako, alakanyela lezi a xigonzani xa Biblia xi nga vunekisako zona hi mahungu lawo. Ngha a ku gonza a broxura legi zi hi longisela ku vuna vanwani lezaku va ti patsa na hina hi maha kuranza ka Nungungulu kasi vonawu va rinzela ku hanya kala kupinzuka. — 1 Joh 2:17.