Engetela wutlhari ga wena wutirelini — Hi ku tsala mahungu xungetano hi mutsakeli

“Ti wonele wutsumbu ga wena, ni kugonziseni ka wena.” (1 Tim. 4:16) A wusungukati legi ga mupostoli Paule ka Timote gi komba lezaku kani hi vaswa kani hi vakale, hi fanele ku ti karatela ku kula. Kasi ku hi vuna ku maha lezo, a Wutireli ga hina ga Mufumo gi ta sangula kuta ni nzima yiswa yi nga ni hloko ya mhaka: “Engetela wutlhari ga wena wutirelini.” A nzima yinwe ni yinwani yi ta wulawula hi nchumu wunwe wa lisima yi tlhela yi nyika mawonela yo kari ya mamahela ya kona. Nzeni ka hweti leyo, hontlheni hi kuciwa a kuva hi ti karatela ku tirisa a mawonela lawo. Kumbheleni ka hweti, a Mutlhangano wa Ntiro wu tava ni xipanze xi to hi nyika lungelo ga ku wula lezi hi vunekisileko zona hi ku veka kupima ka nchumu lowo. A hweti leyi hi kuciwa ku tsala mahungu yo kari xungetano hi vatsakeli.

Hikuyini zi nga za lisima? Kasi ku tatisa ntiro lowu hi rumilweko, hi fanele ku maha zo hunza ku xumayela. Hi fanele ku tlhelela lava va kombisileko kutsakela, hi ya va gonzisa, hi cheletela mati a timbewu ta lisine leti hi byalileko. (Mat. 28:19, 20; 1 Kor. 3:6-9) Lezo zi lava ku tlhela hi kumana ni munhu loye, hi bhula hi lezi zi mu karatako, ni ku tlhavinyeta a bhulo ga hina go sangula. Hikwalaho, loku hi kuma munhu wo tsakela, hi fanele ku tsala mahungu yo kari hi yena.

Mamahela ya kona:

• Alakanya ku teka a xo tsala ni xo tsalela ka xona lomu paxteni ya wena. Tsala zo woneka, u zi xaxameta khwatsi, u tlhela u tsala za ziswa khati ni khati u mu enzelako. Tekela ku tsala zalezo mu gumesako.

• Tsala mahungu ya nwinyi wa muti — a vito gakwe ni lezi u nga mu kumisako zona, ku ngava laha a tshamako kona, numero ya telefone, kutani e-mail. Zini u zi wonileko xungetano hi yena ni ngango wakwe zi nga vako za lisima?

• Tsala mahungu ya lezi a bhulo gi fambisileko zona. Mitsalo muni mu gonzileko? Zini a zi wulileko xungetano hi kukholwa kakwe? Mabhuku muni u mu siyeleko? Tsala a xikhati, siku ga viki, ni siku ga hweti u mu enzeleko hi gona.

• Tsala lezi u lavako ku maha ka lienzo li tako. Zini u tsumbisileko ku ya bhula hi zona? U te u ta wuya rini?

• Tsala mahungu ya maswa khati ni khati u mu enzelako. A ku onheki nchumu hambu loku u tsala zotala ku hunza lezi zi lavekako.

Ringisa lezi ka hweti leyi:

• A xikhati lexi u tsalako zo kari, byela lava u tirako navo a ku zini u tsalako.