KU HLAKULELA KUTSAKELA
CIGONDZO 7
Timisela
Tshinya ga nayo: “Va no simama va nga tsiki ku gondzisa ni ku kanela mahungu ya manene”. — Miti. 5:42.
Zvini lezvi Pawule a nga maha?
1. Sixtira VHIDHIO, kutani lera Mitiro 19:8-10. Andzhako ka lezvo, ehleketa hi zviwutiso zvi landzelako:
Wutshan’wini ga ku mbhela ntamu a cikhati leci a vokari va nga mu xanisa, Pawule i simamisile kuyini a timisela a vhuna lava va nga kombisa kutsakela?
Pawule i tlhelile makhati mangani ka lava va nga kombisile kutsakela niku i zvi mahile hi cikhati co kota kwihi?
Hi gondza yini ka cikombiso ca Pawule?
2. Zvi lava ku hi ti nyika cikhati hi tlhela hi ti karata kasi hi maha marevhizita ma bhindzulako ni ku sangula zvigondzo zva Bhibhiliya.
Pimanyisa Pawule
3. Ti yimisele ku endzela munhu hi cikhati ca cinene kakwe. Ti wutise lezvi: ‘Hi rini zvi nga vako zvinene a ku mu endzela? Hi rini a nga vako ni cikhati ca ku bhula na mina?’ Ti yimisele a ku mu endzela hambu loku a cikhati leci a nga ci hlawula ci nga hi cinene ka wena.
4. Mu wutise a ku hi rini mu nga bhulako kambe. Khati ni khati u mu endzelako, kugumeseni ka mabhulo, zama ku tiva ku hi rini mu nga tlhelako mu bhula. Ti karatele a ku tlhangana naye ka wutshamu ni cikhati leci mu nga bhula ku tlhangana hi cona.
5. U nga mbhelelwi hi kutsumba. U nga tsutsumeli ku alakanya ku a munhu wo kari a nga ma tsakeli a mahungu ya wena hi kota ya lezvi u talako ku mu vhumala laha kaya kutani hi lezvi a tshamako na a khomekile. (1 Kor. 13:4, 7) Simama ku zama ku kuma a munhu loye kanilezvi na u tirisa a cikhati ca wena hi wutlhari. — 1 Kor. 9:26.