WA HA ZI ALAKANYA KE?

U gonzile zi buva a marevista A Murinzeli ma ha hi ku hunzako? Loku zi hi tano, zama ku hlamula a ziwutiso lezi zi lanzelako:

Xana a ku hisa zirumbi za amukeleka ka maKristu?

A ku hisa kutani ku nga hisi a xirumbi xiboho xa munhu wutsumbu. A Biblia a gi wuli nchumu wo kongoma xungetano hi mukhuwo lowo, hambulezo a miri wa Hosi Saule ni wa n’wana wakwe Jonatani yi hisilwe yi guma yi kelelwa. (1 Sam. 31:2, 8-13) — 15/6, phajina 7.

Hi nga tiyisekisa kuyini lezaku Nungungulu a nga vangi zilo zo biha ke?

Jehova i lulamile tindleleni takwe tontlhe. I tsumbekile niku mu nene. Jehova i tele kambe hi ku zwela wusiwana ni wuxinji. (Deut. 32:4; Tis. 145:17; Jak. 5:11) — 1/7, phajina 4.

Zikarato muni lezi munhu a nga kumanako nazo loku a boha ku rura aya ka tiko ginwani kasi ku ya tira lomu ku nga ni xilaveko xa hombe?

Ku na ni zikarato zinharu, zi nga lezi: (1) ku tolovela mahanyela ma hambeneko, (2) kuxuva kaya, ni (3) ku maha wunghana ni vamakabye va leyo. A kutala ka lava va tiyako kulwa ni zikarato lezi va kuma makatekwa yo tala. — 15/7, maphajina 4-5.

Hikuyini a vamakabye va Josefa va nga mu vukela?

Jakobe i lo kombisa liranzo la hombe nguvu hi Josefa, a mu nyika nguwo yo hlawuleka. A vamakabye va Josefa va lo mu lusela, va mu xavisa kota khumbi. — 1/8, maphajina 11-13.

Hikuyini a ziphephana za hina za ziswa zi bhinzulako nguvu ni ku olova ku zi tirisa?

Zontlhe zi na ni matshamela manwe. A xiphephana xinwe ni xinwani xi hi kuca ku gonza mutsalo wa Biblia ni ku mu maha xiwutiso nwinyi wa muti. Kani hi wihi hlamulo a nyikako, hi nga vulula lomu nzeni hi mu komba lezi a Biblia gi zi wulako. Hi nga tlhela hi mu komba xiwutiso xo ta bhula hi xona ka lienzo lo wuyela. — 15/8, maphajina 13-14.

Xini a Pesito ga xiSiria?

A xiSiria, gi nga ginwe ga maravi ya xiAramaiko, xi sangulile ku tirisiwa nguvu ka zana ga malembe ga wumbiri kutani ga wunharu Nguveni ya Hina. Zi wonekisa ku khwatsi a xiSiria xi vile lirimi lo sangula leli a zipanze zo kari za Mitsalo ya xiGreki ya wuKristu zi nga hunzuluselwa ha lona. A Biblia ga xiSiria gi lo tiviwa kota Pesito. — 1/9, maphajina 13-14.

Zini lezi a vapswali va maKristu va nga mahako kasi ku risa vana vabye?

Za lisima ku demba ndleve u ingisela vana va wena kasi ku va tiva khwatsi. Ti karatele ku va gisa hi tlhelo ga moya. Va kongomise hi liranzo loku, hi xikombiso, va sangula ku kanakanela lezi va zi kholwako. — 15/9, maphajina 18-21.

Zilo muni zi tova hava Mufunweni wa Nungungulu?

Ku nga ta hava ni mababyi, kufa, kuvumaleka ka mitiro, tiyimpi, tindlala, ni wusiwana. — 1/10, maphajina 6-7.

Xivumelwano muni xi nga ka Biblia xi vumelelako vanwani a ku fuma zinwe na Kristu?

Anzhako ka kuga Pasika go gumesa ni vapostoli vakwe, Jesu i lo maha xivumelwano ni vapizani vakwe vo tsumbeka, lexi xi nga wuliwako lezaku xivumelwano xa Mufumo. (Luka 22:28 - 30) Lezo zi lo va tiyisa lezaku va wa ta fuma zinwe na Jesu le tilweni. — 15/10, maphajina 16-17.

Nyika zikombiso zimbiri za Biblia zi tiyisako lezaku Satani i kona hakunene.

A mitsalo yi wula lezaku Satani i wulawulile na Jesu kasi ku mu ringa. Masikwini ya Joba kambe, Satani i wulawulile na Nungungulu. A matimu lawa ma tiyisa lezaku Satani i kona hakunene. — 1/11, maphajina 4-5.

Hi vamani a “vanhu va ta nga vitanwa hi vito gakwe” lava Jakobe a nga wulawula hi vona ka Mitiro 15:14?

Ku wa hi vaJuda ni makholwa ma nga hiko vaJuda lava Nungungulu a va hlawulileko kota lixaka lo hlawuleka kasi va “fela a kuba hungu hi mitiro yi rewukisako” ya Loyi a va vitanileko. (1 Ped. 2:9, 10) — 15/11, maphajina 24-25.

Ku wa hi kwihi Timgad, niku a vokari va kwaseyo va wa gi wonisa kuyini wutomi?

Timgad ku wa hi doropa ga hombe ga Nwalungu wa Afrika (laha nyamutlha ku nga Argélia). Na wu komba lezi a vokari va nga zi kholwa leyo, a mutsalo wo kari wu vevulilweko wu ngalo: “Kuhlota, kuhlamba, kuhlakana, kuhleka — loko hi kona ku nga ku hanya!” A mawonela lawa ma fana ni lawa ma kumbukiwako ka 1 Va Le Korinte 15:32. — 1/12, maphajina 8-10.