Gotsovanyano Wa Muganga Wa Timboni Ta Jehova Wa 2008
1. (a) Hikuyini a wusungukati ga Paule ka maKristu ya maHeberu gi nga ga xihatla nguvu inyamutlha? (Gonza Maheberu 10:24, 25.) (b) Xikhati muni xa ha tako lexi hi tova naxo kasi ku tirisa a wusungukati ga Paule?
1 Mupostoli Paule i kucile a maKristu ya maHeberu lezaku mava ni tinkhozo, ku nga ku tsombana, ni ku khongotelana “nguvunguvu” kota lezi ma nga wona lezaku a siku gi wa tshinela kusuhani. (Maheb. 10:24, 25) Ku na ni zikombiso zo tala zi dlunyatisako lezaku “a siku” legi Paule a nga wulawula hi gona gi laha kusuhani nguvu! Hikwalaho, hi tshama na hi langutela zikhati za kuva hi tsombana ni vamakabye va hina kasi hi kuma gonziselelo ya moya leyi yi zi kotako ku hi rangela ‘masikwini lawa yo gumesa’ ma yako ma biha nguvu. (2 Tim. 3:1) A xikhati lexo xi ta kumeka ka migotsovanyano ya muganga ya 2008 leyi ya ha tako.
2. (a) Hikuyini zi nga za lisima a kuva kona gotsovanyweni ka masiku wontlhe ya manharu? (b) Xana hi fanele ku sangulisa kuyini a ku ti longisela lezaku hiva kona?
2 Ngha Uva Kona Ka Masiku Wontlhe Ya Manharu: Ha ku kuca lezaku uva kona ka masiku wontlhe ya manharu. Hi ku “nga tsiki a tinkhozo ta hina,” hi nga ta luza zakuga za moya za lisima nguvu. (Maheb. 10:25) Sangula a ku ti longisela na ka ha hi mahlweni hi laha zi kotekako hi kona. U tava ni xilaveko xa ku byela mutholi wa wena na ka ha hi mahlweni kasi a zi kota ku maha malulamiselo wahi ni wahi ma lavekako. Loku ku hi lezaku a vana va wena va ta ngha va hi xikoleni xikhatini lexo, bikela vagonzisi vabye hi mixuvo ya nwina. Va tivise lezaku a gotsovanyano xipanze xa lisima xa wukhozeli ga nwina. Tiyiseka lezaku u ta kuma makatekwa ya Jehova hi kota ya mizamo ya wena ya ku rangisa a zilaveko za Mufumo. — Mat. 6:33.
3. Xana hi nga ku kombisa kuyini a kukhatala hi vanwani?
3 Vuna Vanwani Lezaku Vava Kona: Paule i khongotele kambe a vamakabye vakwe lezaku va “khatalelana.” (Maheb. 10:24) Xana a vamakabye lava mu nga zinwe ka Xigonzo xa Bhuku xa Bandla va lava xivuno lezaku vava kona gotsovanyweni? Xana u nga vuna a zigonzani za wena za Biblia lezaku mu ti buza zinwe hi gotsovanyano, hambu loku zo kota kuva kona a siku ginwe ntsena? Loku u tivisa a ziro za ngango lezi zi nga hiko zineneni xungetano hi longoloko wa wena wa gotsovanyano, va rambe lezaku va famba zinwe na wena. A mizamo ya wena ya liranzo ya zi kota ku neha mabhinzu u nga ma rinzeliko.
4. Xana hi nga ma kumisa kuyini a mahungu xungetano hi masiku ni matshamu ya migotsovanyano ya muganga?
4 Ndlela Yo Kuma Mahungu: A hofisa ya ravi yi amukela a mazanazana ya tifoni lembe ni lembe ta vanhu va wutisako a masiku ni matshamu lawa a migotsovanyano yi ta nga mahelwa kona. Kusuhani ka tontlhe tifoni leto ti mahiwa hi vamakabye lava va sinako va amukele a mahungu lawo. Na mu nga se fonela a hofisa ya ravi, hi mu tivisa lezaku mu sangula hi ku cuwuka lomu ka A Sentinela ga 1 ka Março wa 2008.
5. Malulamiselo muni ma mahiwako kasi ku vuna wo kari a lavako ku vuniwa ku kuma wutshamu loku hiya gotsovanyweni?
5 Loku ku hi lezaku a wo kari lomu bandleni i lava ku vuniwa lezaku a kuma wutshamu, a Kometi ya Ntiro yi fanele ku boha lezaku a muhuweleli loye wa ringanelwa hi ku maha xikombelo lexo ke. Lava va nga ringanelwiko, a ku patsa ni lava va susilweko bandleni, va fanele ku ti mahela ha voce a malulamiselo ya wutshamu. — 1 Kor. 5:11.
6. Zini hi nga ha zi mahako kasi hiva kona gotsovanyweni?
6 Kani u maha malulamiselo wece, hi wungango, kutani hi bandla, u fanele ku sangula hi xihatla a ku ti longisela lezaku uva kona gotsovanyweni. Hi kuyelana ni xiyimo xa lomu xipanzeni, a bandla ni bandla, ngango, kutani muhuweleli i fanele ku ehleketa hi mukhongelo xungetano hi lezi zi kotekako ku mahiwa kasi a nga luzi a gotsovanyano. A vamakabye vo kari va nga ha sangula ku veka mali yo kari hweti ni hweti kasi va zi kota ku hakhela a mova wo famba hi wona. A mabandla wonawu ma nga ha maha malulamiselo ya ku lugara xibhomba kutani mova kasi ku khileta vamakabye vaya gotsovanyweni. A vanwani va zi kota ku boha ku famba zinwe ka gotsovanyano hi mitlawa ya mingango, va lanzela xikombiso xa malanza ya Jehova ya kale. — Luka 2:41-44.
7. (a) Xana hi nga mu dumisisa kuyini Jehova a xikhati lexi hi nga lomu migotsovanyweni ya hina? (b) Magezu muni ya kudzunza lawa ma wulilweko hi vatiri va mahotela hi kota ya mahanyela ma nene ya vamakabye va hina?
7 Mitiro Yo Saseka: A ku ingisa a xileletelo xa Jehova xa ku tsombana lezaku hi khozela zi maha lezaku hi ‘vuneka.’ A xa lisima nguvu, ku nyika malungelo ya ku dumisa vito ga Jehova. (Isa. 48:17) A ‘mitiro ya hina yo saseka yi le kubaseni’ ka vo tala lomu ka migotsovanyano ya hina ya muganga, niku yi kucile a vo kari lezaku va wula lezi va ti zwisako zona. (1 Tim. 5:25) Ka doropa go kari laha a migotsovanyano ya hina yi sinako yi mahiwa hi malembe yo tala, a murangeli wa hotela i vumelile lezi: “A vanhu vo tala lomu doropeni va wulawula hi Timboni ta Jehova ni lezi a migotsovanyano ya nwina yi hi vunisako zona. Ha zi tiva lezi nwina mu basisisako zona a salawu ya mihlakano, niku hi mu wona na mu basisa lomu mu nyimisako kona mimova. Za xalalisa a kuva zinwe na nwina xikhatini xa ximumu. Hi rinzela kuva zinwe na nwina ka malembe ma tako.” Anzhako ka ku hlawutela a zikarato lezi a yimiseneko nazo ni mitlawa yinwani, a murangeli wa hotela i wulawulile hi moya wa kutirisana ni lihlaza-mbilu zi kombisilweko hi vamakabye va hina a xikhati lexi va nga hi le hotela. I te ngalo, “Hi wa ta tsaka nguvu loku a vapfhumba va hina vontlhe va wo fana ni Timboni ta Jehova!” A mahanyela ma nene ya vamakabye va hina lawa ma mahileko lezaku kuva ni kudzunzwa loko ni magezu manwani yo tala ya kudzunza ma tsakisa mbilu ya Nungungulu wa hina, Jehova!
8. Xana a bhuku ga Mateu 4:4 gi khanyisisa kuyini a lisima la ku ingisela khwatsi a xipanze xinwe ni xinwani xa longoloko?
8 Jesu i wulile lezaku a wutomi ga hina wutsumbu gi khegela ka “timhaka tontlhelele leti ti humako nonwini wa Nungungulu.” (Mat. 4:4) Ka migotsovanyano ya hina ya lembe ni lembe, Jehova i nyika ‘zakuga za moya hi xikhati xi faneleko,’ lezi zi longiselwako hi “nanza gi tsumbekileko ni go tlhariha.” (Mat. 24:45) Ku mahilwe ntiro wa hombe kasi ku longisela ni ku phamela a mubuzo lowu wa moya. Ngha hi kombisa a kubonga ka hina hi kota ya kuhlayisa ka Jehova ka liranzo hi kuva kona hi tlhela hi ingisela khwatsi a xipanze xinwe ni xinwani xa longoloko.
[Magezu yo koka kupima ka phajina 3]
Xikhati Xa Longoloko:
Wa Wuntlhanu ni Mulongiso
8:20 – 15:55
Sonto
8:20 – 15:00