Gotsovanyano Wa Muganga Wa Timboni Ta Jehova Wa 2009
1. (a) Makatekwa muni lawa hi to ti buza hi wona hi kuva kona gotsovanyweni wa muganga ka masiku wontlhe ya manharu? (b) Kutilongisela muni loku hi faneleko ku ku maha zalezi?
1 Hina hontlhe hi langutela a gotsovanyano wa muganga wa 2009 ni lungelo giswa ga ku tlhangana zinwe ni vadumisi-kulori va Jehova, lava va ‘khatalako hi xilaveko xabye xa moya.’ (Mat. 5:3, NM) Kota lezi a siku ga Jehova gi tshinelako hi kuhatlisa, hi kuca a munwe ni munwani lezaku ava kona ka masiku wontlhe ya manharu kasi ku vuneka khwatsi hi wumakabye go kufumela ga wuKristu zinwe ni ku tiyiswa hi tlhelo ga moya lezaku a yima a tiya kukholweni. (Zef. 1:14) Byelani vagonzisi ni vatholi lezaku a gotsovanyano xipanze xa lisima nguvu wukhozelini ga nwina. Ti longiseleni hi kutiya-hlana na ka ha hi ni xikhati mu tlhela mu cuwukela a makatekwa ya Jehova; tiyisekani lezaku yena i ta mu vuna. — Isa. 50:10.
2. Hi wahi a matshamela lawa hi zi kotako a ku ma langutela hambu loku hi nga rambiwangi ka gotsovanyano wa matiko wontlhe?
2 Migotsovanyano Ya Matiko Wontlhe: Kota lezi a migotsovanyano leyi yi to mahiwa ka matiko ni madoropa ma tsongwani, ntsena lava va vumelelweko hi vona va faneleko kuya. A kutirisana ka hina ni lulamiselo legi zi ta vikela lezaku ku ngavi ni kutlimbana ka vanhu. (1 Kor. 14:40; Maheb. 13:17) Hambulezo, a migotsovanyano yo tala ya miganga yi tava ni matshamela ya ku khwatsi nja matiko wontlhe hakuva a varumiwa vo tala ni ziro za Beteli zi tirelako matiko-wundle, ni malanza ma tirako matikweni wontlhe va taya ka gotsovanyano wu to mahelwa tikweni gabye ga mabeleko.
3. Hi nga li kombisisa kuyini a liranzo la wuKristu ka vo kari lomu bandleni ga hina?
3 Vuna Vanwani Lezaku Vava Kona: Xana ku na ni vo kari bandleni ga wena va lavako ku vuniwa lezaku vaya gotsovanyweni? Loku u vuna vanwani a ku maha lezo, ‘a wu khataleli a za wena ntsena, kanilezi u khatalela ni za vanwani.’ — Fil. 2:4.
4. Xana hi nga ma kumisa kuyini a mahungu xungetano hi masiku ni matshamu ya migotsovanyano ya muganga?
4 Ndlela Yo Kuma Mahungu: Kasi ku nga tshameli ku fonela a ravi xungetano hi masiku ni lomu a migotsovanyano yi to mahelwa kona, maha wuxinji u ranga hi ku cuwuka ka A Sentinela ga 1 ka Março wa 2009, kutani ku wutisa a matsalani wa bandla ga wena a mahungu lawa u ma lavako.
5. Malulamiselo muni ma mahiwako kasi ku vuna a wo kari a lavako ku rurelwa?
5 Loku ku hi lezaku a wo kari lomu bandleni i lava ku rurelwa, a Kometi ya Ntiro yi fanele ku boha lezaku a muhuweleli loye wa ringanelwa hi ku maha xikombelo lexo ke. Lava va nga ringanelwiko, a ku patsa ni lava va susilweko bandleni, va fanele a ku ti mahela ha voce a malulamiselo ya lomu va ta nga rurelwa kona. — 1 Kor. 5:11.
6. Zini hi nga zi mahako kasi hiva kona gotsovanyweni?
6 Kani u maha malulamiselo wece, hi ngango, kutani hi bandla, u fanele ku sangula ku ti longisela lezaku uva kona ka gotsovanyano na ka ha hi ni xikhati. Hi kuyelana ni xiyimo xa lomu xipanzeni, a bandla ni bandla, ngango, kutani muhuweleli i fanele ku ehleketa hi mukhongelo xungetano hi lezi zi nga mahiwako kasi a nga luzi a gotsovanyano. A vamakabye vo kari va nga ha sangula ku veka mali yo kari hweti ni hweti kasi va zi kota ku hakhela a mova wo famba hi wona. A mabandla wonawu ma nga ha maha malulamiselo ya ku lugara xibhomba kutani mova kasi ku khileta vamakabye vaya gotsovanyweni. A vanwani va zi kota ku maha malulamiselo ya ku famba zinwe hi milenge, hi mitlawa ya mingango, hi kulanzela xikombiso xa malanza ya Jehova ya kale. — Luka 2:41-44.
7. Xini hi faneleko ku xi khatalela nguvu a xikhati lexi hi ti longiselako ni xikhati lexi hi nga kona ka gotsovanyano wa muganga wa 2009?
7 Mitiro Yi Dumisako Nungungulu: Loku hi kombisa a matshamela ma pswaliwako hi moya wa Nungungulu zilweni za hina zontlhe, hi khatalela nguvu a mawulawulela ni mahanyela ya hina a xikhati lexi hi nga ni lava va hi rurelako ni vanwani lomu wutshanwini legi a gotsovanyano wu mahiwako kona, hi engetela a wudzunzo ga vanhu va Jehova hi tlhela hi potsa a ku khunguvanyisa vanwani. (1 Kor. 10:31; 2 Kor. 6:3, 4) Ngha a kuvakona ka wena ni mahanyela ya wena zi dumisa Nungungulu hi ndlela leyo ka gotsovanyano wa muganga wa 2009! — 1 Ped. 2:12.
[Magezu yo koka kupima ka phajina 5]
Xikhati Xa Longoloko:
Wa Wuntlhanu ni Mulongiso
8:20 - 15:55
Sonto
8:20 - 15:00