Va Gonza Yini Vanwani Loku Va Ku Cuwukisela?
1. Xana a vapizani va Jesu va gonzile yini hi ku mu cuwukisela?
1 Jesu i te ngalo: “Rwalani a pingu wa mina, mu gonza ka mina.” (Mat. 11:29) Zi la su dlunya lezaku yena i gonzisile hi ku nyika xikombiso xi nene, ku ngahi hi magezu yakwe ntsena. Ehleketa lezi a vapizani va zi gonzileko hi ku cuwukela Jesu. I wa hi munhu wo rula, wa mu nene, ni wa liranzo. (Mat. 8:1-3; Mar. 6:30-34) I wa hi wo ti koramisa hi kumbhelela. (Joh. 13:2-5) A xikhati lexi va nga hi zinwe na Jesu wutirelini, a vapizani va zi wonile lezaku i wa hi mutiri wa ku nga karali loyi a nga gonzisa vanwani a zinene hi kuhumelela. (Luka 8:1; 21:37, 38) Xana va khumbekisa kuyini vanwani hi ku hi wona na hi hi wutirelini?
2. Xana a kucuwukeka ka hina ni kutikhoma hi ndlela yi nene loku hi hi wutirelini zi nga khumbisa kuyini a venyi va muti?
2 Venyi Va Muti: A tinguwo ta hina ti kombisako xichawo, ku mahela vanwani a za zi nene, ni kukhatala ka lisine hi vanhu za zi kota ku khumba nguvu a venyi va muti. (2 Kor. 6:3; Fil. 1:27) Va zi wona a ku ha tirisa a Biblia hi kukhanzakanya. A vanwani va hlamala hi lezi hi ingiselako hi xichawo a xikhati lexi va wulawulako. U nga tshuki u kanyisa a mhaka leyi yaku a ku nyika xikombiso xi nene zipanzeni lezi za zi kota a ku kokela vanhu ka mahungu ya Mufumo.
3. I kucetelo muni wa wu nene lowu hi nga ha vako nawo ka vamakabye va hina?
3 Vamakabye Va Hina: Ehleketa kambe hi lezi hi zi kotisako zona a ku khumba a vamakabye va hina hi ndlela yi nene. A kuhisekela ka hina a wutireli ka thapela vanwani. Khwatsi hi xiketse xi lotako a xiketse, a zingheniso za hina zi longiselweko khwatsi zi susumeta vanwani lezaku va chukwatisa a wuzikoti gabye ga ku xumayela. (Mav. 27:17) A kupinyama ka hina kutsaleni ka mavito ni makhero ya lava va kombisako kutsakela ni ku tekela ku va tlhelela zi kuca vanwani lezaku va maha zalezo. Hi tava kucetelo wu nene ka vatiri-kulori hi ku tatisa a wutireli ga hina hi kumbhelela. — 2 Tim. 4:5.
4. Hikuyini a xikhati ni xikhati hi faneleko a ku hlolisisa a xikombiso lexi hi xi nyikako?
4 Hikuyini u nga ti nyikiko xikhati hi kukhanzakanya kasi u hlolisisa lezi u zi mahako ni lezi u zi wulako zinwe ni lezi a xikombiso xa wena xi khumbisako zona vanwani? A xikombiso xa hina xa xi nene xi ta tsakisa Jehova ni ku hi vumelela lezaku hi zwata a magezu ya mupostoli Paule a xikhati lexi a nga kombisa a kutizwa kakwe hi ku wula lezi: “Mahani vapimanyisi va mina, kotisa mina nzi nga mupimanyisi wa Kristu.” — 1 Kor. 11:1.