Xana u nga huma simu ni wusikwanyana?
1. Kota kuwula ka tlhari yo kari, xana mupostoli Paule i wa xumayela hi muti ni muti hi xikhati muni?
1 Kota kuwula ka bhuku Daily Life in Bible Times (Wutomi ga siku ni siku masikwini ya kutsaliwa ka Biblia), mupostoli Paule i wa tala ku xumayela hi muti ni muti “kusukela 16 hora kala gi phuma nguvu.” A hi zi tivi hi kutiya lezaku hakunene lowo hi wona a longoloko wu nga lanzelwa hi Paule, kanilezi ha zi tiva lezaku yena i wa ti yimisele ku “maha zontlhe lezo hi kota ya ivangeli.” (1 Kor. 9:19-23) Kuzilava lezo zi wa patsa kuva a xaxameta a mitiro yakwe lezaku a xumayela hi muti ni muti loku a xikhati lexo xi bhinzula nguvu.
2. Hikuyini a xikhati xa ni wusikwanyana xi nga xi nene nguvu a ku xumayela hi xona?
2 Ka matshamu yo tala, a vahuweleli va tolovela ku xumayela hi muti ni muti ni mixo xikari ka viki. Ahati xipanzeni xa nwina, ina a xikhati lexo xa ha hi xona xa chukwana? A phayona go kari gi hlawutela lezi xungetano hi xipanze xa gona: “Za kala ku kuma munhu mitini ni mumu. Kanilezi va tala ku kumeka ni wusikwanyana.” A ku nyika wukustumunyu ni wusikwanyana zi nga hi nyika lungelo ga ku xumayela nguvunguvu vavanuna. A venyi va miti va tala ku ngha va tlhatlhekile ku bhula na hina hi xikhati lexo. Loku ma zi wona na zi vuna, a madota ma fanele ku maha malulamiselo ya kuva ni mitlhangano ya ntiro wa simu ni wusikwanyana.
3. Xana hi nga kombisisa kuyini wutlhari loku hi kari hi nyika wukustumunyu ni wusikwanyana?
3 Tirisa wutlhari: Za lisima a ku tirisa wutlhari loku u xumayela ni wusikwanyana. Hi xikombiso, loku u pola lezaku a wu chikelangi hi xikhati xi nene ka muti lowo, kuzilava na va hi kulaleleni, i chukwana ku va byela lezaku u ta wuya hi xinwani xikhati. Loku gi phumile, yima ka wutshamu legi zi to olovela a nwinyi wa muti a ku ku wona, u tlhela u tekela ku wula a vito ga wena ni xigelo xa kuta ka wena laho. Ahandle ka lezo, zi nene a ku tira hi vambiri-vambiri kutani hi mitlawa mu tlhela mu fambafamba ka maruwa yo wonekela ni ya ku fambafamba vanhu. U nga xumayeli na gi phumile nguvu lezaku u nga karati vanhu na va lava ku etlela. (2 Kor. 6:3) Loku zi hi mhango ku fambafamba ka wutshamu go kari na gi phumile, xumayela kona na ga ha wonekela. — Mav. 22:3.
4. Makatekwa muni ma kumiwako hi ku xumayela ni wusikwanyana?
4 Makatekwa: A ntiro wa simu wu nanziha nguvu loku hi zi kota ku nyika wukustumunyu. Niku laha hi yako hi nyika wukustumunyu a vanhu vo tala, hi ya hi kuma malungelo yo tala ya ku vuna vanwani a ku “hanyiswa, vava ni kutiva ka zinene.” (1 Tim. 2:3, 4) Xana wa zi kota ku maha malulamiselo ya ku xumayela ni wusikwanyana?