AMBEJTSÏ UAA ÚNI PARAJTSÏ NÓTERU KURHUNHPINIA

2 | Asï no sési útspinta je

Biblia uandasïndi:

“Ka asï jáma je no sési úkuntani imani engaksïni no sési úchiaka [...], ka chaari parti jimbo jánguarhi je eskajtsï xáni uaaka sési pájperani iámindu kʼuiripuechani jingoni enga újka ísï úkuarhini [...]. Jimboka karakata jarhaska: ʻJuchiitisti para maiamukuarhintani ka jísïni maiamuntaakaʼ” ísï uandasïndi Tata Diosï Jeoba (ROMA 12:17-19).

¿Ambe arhikuekasïni?

No no sési jarhasti ikiani engajtsïni nema no sési ambe úchijka, peru Tata Diosï no uékasïndi eskachi no sési útspintaaka. Sánderu sési, arhisïndijtsïni eskachi imeeri jájki jimbo jurajkuaka iámindu ambe jimboka ima aiatspeska eska nóteru ióni jimbo sési péntaaka iámindu no sési jásï ambe (Salmo 37:7, 10).

Uaakajtsï ini ambe úni:

Engachi no sési úkuantajka máteruechani, soluchi úni jarhasïnga eskaksï kʼuiripuecha seguiriuaka kurhunhpini. Ísï jimbo, engaksïni nema no sési kámaaka oksïni no sési ambe úcheni, asï májkueni káma je. Jánguarhinta je pʼíngukuarhini. Ménichani sánderu sési jauati eskajtsï mirikurhiaka ambe enga úkuarhika (Proverbios 19:11). Ka ménichani eskajtsï uaaka ambe ma. Pori ejemplu, engajtsï no sési ambe úminhaaka jamberijtsï eratseaka aianguani polisiechani o máteru nemani enga juramukua jatsiaka.

No sési úkuantani máteruechani, úsïndi eskachi sánderu no sési uéranchaaka

¿Ka engajtsï ísï exeaka enajkijtsï no uaa mirikurhini ambe engajtsï úminhaka? ¿Ojtsï iámindu ambe únia parajtsï sési peentani problemani? Nájkiruka ísïika, asï no sési útspinta je, ísïjtsï uaaka no xáni kʼéri úni problemani. Chájtsï uaaka nóteru kurhunhpinia. Mintsika je eska Tata Diosï sési peentaaka problemani. Salmo 37:3-5 arhisïndi: “Imani mintsika ka ima uaati ambe ma parakeni jarhuatani”.

Eksperiensia: ADRIÁN

Pʼíngukuarhispti para no no sési útspintani

Enga Adrián tumbi sapichuepka, kánikua no sési jámasïreendi ka kánikua kurhunhpisïreendi ka uékasïreendi no sési úkuantani imeechani engaksï no sési kámeenga. Ima uandantasïndi: “Sáno méntkisï, pistola jingoni uarhipesïreenga ka uánikua uelta xanharurhu jándentasïreenga iámu iurhirterakia jimbokajtsïni ísï exesïreenga enajkini uarhipia”.

Enga 16 jatiripkia, Adrián ueenaspti jorhenguarhini Biblieri ambe. Ima miásïndi: “Engani Biblieri ambe jorhenguarhini japka, kuenta íntskukuarhespka eskani jatsispka parani mójtakurhini”. Adrián jatsispti para nóteru kurhunhpinia ka ni uarhipeni jámani. Roma 12:17-19 mintsitarhu niárakuspti jimboka jimini uandasïnga eskachi no jatsiska para no sési útspintani. Ima uandasïndi: “Inde teksturini jarhuataspti kurhanguni eska Tata Diosï Jeobasï sési peentaaka iámindu no sési jásï ambe ka jiáni enga ima sési exeaka. Tiempu jingoni, sánhani arhiska mójtakurhini”.

Chúrikua ma jimbo, ima tumbiicha engaksï uarhipeenga imeecha jingoni enga Adrián kúrhiauenga, atasptiksï. Ima enga orhejtsïkuauenga uinhachakuspti: “¡Kuájpikuarhi!”. Adrían uandasïndi eska uékasïreenga kuájpikuarhini, joperu no ísï úspti. Sánderu sési, kómarhispti Tata Diosï Jeobani ka úspti sïpakuarhini.

Adrián ístu uandasïndi: “Pauandikua, kúperaspka imani jingoni enga orhejtsïkuenga imani grupuni, peru iásï ima jandiajku jámaxaptia. Kánikua ikiaxapka ka uékasïreenga atantani. Ménderuni kómarhispka Tata Diosï Jeobani ka arhispka eskarini jarhuatapiringa pʼíngukuarhini. Ískuni pakaraspka engareni tumbi andarhierapka ka arhindirini: ‘Puáchentarini. Uékapiringa ísïini eska tʼu. Uékasïnga Biblieri ambe jorhenguarhiniʼ. ¡Xáni sési engani úpka pʼíngukuarhini! Indeni ambe jimbo, imajtu ueenaspti Biblieri ambe jorhenguarhini”.