AMBEJTSÏ UAA ÚNI PARAJTSÏ NÓTERU KURHUNHPINIA
3 | Kéndita je chaari mintsitarhu kurhunhperakuani
Biblia uandasïndi:
“Ménderueni jáma je, jimboka chaari eratsekuecha jimbanheranhantaskia, parajtsï ísï úni jánhaskani ambe enga jindeeka enga [Tata] Diosï uékajka eskajtsï uaaka enga ambakitiika ka enga jaiapanhenhantajka ka enga no ma ambe jimbo kueratajka jurhimbikueni” (ROMA 12:2).
¿Ambe arhikuekasïni?
Tata Diosï exesïndi ambe engachi eratsejka (Jeremías 17:10). Ísïisti eskachi jatsiska para jingontku jámani imani ambe jingoni engachi uandajka ka úni, peru no i ambejkusï uétarhijti. Juchaari eratsekuarhu ka mintsitarhuchi ueenasïnga kurhunhini nemani, ísï jimbo jatsiskachi para kénditani indeni ambe juchaari eratsekuarhu ka mintsitarhu. Engachi ísï úska, uaakachi sési jimbo mójtakurhini ka nóteru kurhunhpinia.
Uaakajtsï ini ambe úni:
Jánguarhintsï je exekuarhini ambe engajtsï pʼikuarherajka ka ambe engajtsï eratsejka máteruechani jimbo ka sánderia imeecha jimbo engaksï máteru jásï raseka oksï máteru paisi anapueni. Kurhamarhikuarhi je: “¿Ambe eratsesïni imeecheri ambe? ¿Ísï eratsesïni imeecheri ambe jimbokani míteaska o jindeeski jimbokaksï máteruecha no sési ambe uandasïnga imeecheri ambe?”. Asï jáma je exeni o arhintani internetirhu imani ambe enga uaaka eskajtsï kurhunhiauaka máteruechani ka no sési kaani.
Tata Diosïri Karakatajtsïni úsïndi jarhuatani parachi nóteru kurhunhpinia
No méntkisï fásilisïndi exekuarhini ambe engachi eratsejka ka pʼikuarhenhini. Peru Tata Diosïri Karakatajtsïni jarhuatasïndi jimboka xarhatasïnga ambe enga kʼuiripu ma “eratsejka ka pʼikuarhenhini imeeri mintsitarhu” (Ebreu 4:12). Ísï jimbo, exe je ambe enga Biblia uandajka ka terukutanta je imani ambe jingoni engajtsï chá eratsejka. Tátsekua jánguarhinta je ísï eratseni eska Biblia na jorhentpijka. Tata Diosïri Karakatajtsïni jarhuataati kénditani juchaari mintsitarhu ka eratsekuarhu imani ambe enga kánikua úkua jukajka kénditani komueska kurhunhperakua (2 Korintu 10:4, 5).