Okitobba

Obwire obumu kikugumira kuba muhulizi? Omukama Daudi nauwe kyamugumiraga, nahabweki akasaba Ruhanga ati: “Ompe omutima ogurukugonza kukworobera.” (Zab. 51:12) Daudi yagonzaaga Yahwe. Baitu nabwo, obwire obumu kyamugumiraga kuba muhulizi, kandi naitwe nikyo kimu. Habwaki? Eky’okubanza, tukagwetwa ekibi kuruga hali Adamu. Ekyakabiri, Sitaani aikara nalengaho kutwohya kujeemera Yahwe nk’oku yakozere. (2 Kol. 11:3) Ekyakasatu, twetoroirwe abantu abaine omwoyo ogw’obujeemu, “omwoyo [oguli] hati bunu omu bana abatarukuhurra.” (Bef. 2:2) Tusemeriire kuteekamu amaani kurwanisa ekibi kandi tutaikiriza Sitaani n’ensi enu kutuleetera kujeemera Yahwe. Tusemeriire kuteekamu amaani kworobera Yahwe hamu naabo abaahaire obusobozi. w23.10 6 ¶1

Ekyamahano kya Yesu eky’okufoora amaizi amaarwa nikitwegesa ki? Nikitwegesa kuba bantu abebundaazi. Yesu atehaisanize habw’ekyamahano kinu hamu n’ebindi byona ebiyakozere. Baitu n’obwebundaazi, yagarurraga Ise ekitiinisa. (Yoh. 5:​19, 30; 8:28) Obuturahondera ekyokurorraho kya Yesu eky’obwebundaazi, titurukwija kwehaisaniza habw’ebintu byona turakora. Tuleke kwenyumiza itwenka baitu twenyumize habw’omugisa ogw’okuheereza Yahwe. (Yer. 9:​23, 24) Naitwe leka tuhe Yahwe ekitiinisa ekimusemeriire, habwokuba titusobora kukora kintu kyona ekirungi tutaine obukonyezi bwe. (1 Kol. 1:​26-31) Obutuba bebundaazi, titwehaisaniza habw’ebirungi tukoliire abandi. Tutunga okumarwa kukimanya ngu Yahwe arora kandi asiima ebitukora. (Lengesaniza Matayo 6:​2-4; Baheb. 13:16) Mali tusemeza Yahwe obutwegera ha kyokurorraho kya Yesu eky’obwebundaazi.—1 Pet. 5:6. w23.04 4 ¶9; 5 ¶11-12

Naterekerezebwa omwoyo ogurukwera, Paulo akekambisa Abakristaayo kutekerezaaho ebyetaago by’abandi. Nitusobora tuta kuteeka omu nkora obuhabuzi bunu obuturukuba tuli omu nsorrokano? Tusemeriire kwijuka ngu abandi nabo nibagonza kuhayo eky’okugarukamu. Tekerezaaho kinu. Kakuba oba oliyo n’obaza n’abanywani baawe, wakugondeze kubaza muno otabahaire omugisa ogw’okubaza? Amananu gali nangwa! N’ogonza nabo bagire ekibaabaza. Nikyo kimu n’omu nsorrokano, nitugonza abantu baingi bagarukemu. Gumu ha miringo ey’okugarramu ab’oruganda na banyaanya itwe amaani nugwo ogw’okubaha omugisa ogw’okubazaaho okwikiriza kwabo. (1 Kol. 10:24) Nahabweki, tusemeriire kuha eby’okugarukamu ebigufu, nukwo n’abandi batunge omugisa ogw’okugarukamu. N’obworaaba n’ohayo eky’okugarukamu ekigufu, wetantale kubazaaho ensonga nyingi. Kakuba obazaaho ensonga zoona eziri omu kacweka, abandi tibarukwija kutunga eky’okubazaaho. w23.04 22-23 ¶11-13

Tusemeriire kwijuka ngu kikuru kwikara nitukonyera abandi kukira muno kuraba omu kutebeza. Omu buheereza bwaitu tusemeriire kuhindahinduramu. Tutangatangana abantu abaine enyikiriza ezitarukusisana kandi abarukuruga omu biikaro ebirukwahukana. Omukwenda Paulo yahindahinduramuga kandi nitusobora kumwegeraho. Yesu akakoma Paulo kuba “omukwenda hali abamahanga.” (Bar. 11:13) Paulo akatebeza Abayudaaya, Abayonaani, abasomere muno, abatasomere, abalemi hamu n’abakama. Kusobora kuhika ha mitima y’abantu banu abarukwahukana, “hali bona” akafooka “byona.” (1 Kol. 9:​19-22) Yatekerezaahoga muno enyetwaza, enyikiriza hamu n’endugirro y’abantu abayatebezaaga kandi nahinduramu nambere kirukwetaagisa. Naitwe nitusobora kweyongera kuhika ha mitima y’abantu turukutebeza kakuba tutekerezaaho muno enyikara yabo kandi tukahinduramu kusigikirra ha byetaago byabo. w23.07 23 ¶11-12

Kwoleka obuculeezi tikimanyisa ngu oli muceke, baitu kyoleka ngu oli w’amaani. Kyetaagisa kuteekamu amaani kusobora kwikara tutekaine obuturukuba nituraba omu nyikara egumire. Obuculeezi guli gumu ha miringo ey’eretwa omwoyo ogurukwera. (Bag. 5:​22, 23) Ekigambo eky’Oruyonaani ekikozesebwa kumanyisa “obuculeezi,” obwire obumu kyakozesebwaga kumanyisa embaraasi ey’omu kisaka eyatendekwaga n’efooka nk’ey’omuka. N’obukiraaba ngu eba etekaine neeba ekyaine amaani. Hati nitusobora tuta kukurakuraniza obuculeezi baitu tukaikara tutarukutiina? Eki titusobora kukikora habwaitu. Tusemeriire kusaba Yahwe omwoyo ogurukwera, nukwo gutukonyere kukurakuraniza omulingo gunu omurungi. Haroho ebyokurorraho bingi ebirukwoleka ngu kinu nikisoboka. Abakaiso ba Yahwe baingi boolekere obuculeezi obubahikirweho okuhiiganizibwa, kandi kiretiire baingi kuhindura entekereza yabo hali Yahwe.—2 Tim. 2:​24, 25. w23.09 15 ¶3

Omu kwolekwa okurukuhuniiriza, omukwenda Yohana akarora abakuru 24 bali omu iguru nibaramya Yahwe. Bakakugiza Yahwe nibagamba ngu asemeriire kuheebwa “ekitinisa nokutinwa nobusobozi.” (Kus. 4:​10, 11) Bamalaika abesigwa nabo baine ensonga nyingi ez’okukugiza n’okuha Yahwe ekitiinisa. Baikara nauwe omu iguru kandi bamumanyire kurungi. Barora emiringo ye enungi kuraba omu bintu eby’akora. Obubarora Yahwe nakora ebintu ebyo kibaleetera kumukugiza. (Yob. 38:​4-7) Naitwe nitugonza kukugiza Yahwe omu saara zaitu kuraba omu kubazaaho ebintu ebiturukumugonzaaho. Obworaaba noyesomesa Baibuli, lengaho kuserra emiringo ya Yahwe ey’orukukirayo kugonza. (Yob. 37:23; Bar. 11:33) Hanyuma omugambire omulingo orukwehurra ha miringo egi. Nitusobora n’okukugiza Yahwe habw’okutukonyera n’okukonyera ab’oruganda na banyaanya itwe.—1 Sam. 2:​1, 2. w23.05 3-4 ¶6-7

Omu 1919, abantu ba Ruhanga bakarugira kimu omu Baburoni orukuru. Omu mwaka ogu, omwiru omwesigwa kandi ow’amagezi akatandika kukonyera abo abarukugonza Ruhanga kurubatira omu ‘Muhanda Ogurukwera.’ (Mat. 24:​45-47; Is. 35:8) Omulimo ogwakozerwe kara gukakonyera abo abaatandikire kurubatira omu muhanda kweyongera kumanya Ruhanga n’ebigendererwa bye. (Nfu. 4:18) Abo nabo kyali nikibetaagisa kukora empindahinduka omu bwomeezi bwabo nukwo basemeze Yahwe. Yahwe tanihirramu abantu be kukora empindahinduka zoona ahonaaho baitu mporampora aikaire nabakonyera kusemezaamu okuramya kwabo. Mali tulisemererwa muno obutulisobora kusemeza Ruhanga omu byona ebitukora! Enguudo zoona zetaaga kwikara nizidabiirizibwa. Kuruga 1919, omulimo ogw’okusemeza “Omuhanda Ogurukwera” gwikaire nigugumizaamu kusobozesa abantu baingi kuruga omu madiini ag’ebisuba. w23.05 17 ¶15; 19 ¶16

Ab’oruganda abali h’Akatebe Akalemi batendeka ab’oruganda abakonyezi omu butebe bw’Akatebe Akalemi oburukwahukana. Abakonyezi banu bahikiiriza obujunanizibwa bwingi. Kandi betekaniize kurolerra entaama za Kristo hanyuma y’abaseserweho amagita kugenda omu iguru. Abaseserweho amagita ab’okumalirra obubalitwarwa omu iguru omuhito omwingi obuguliba guli haihi kuhwaho, okuramya okw’amananu kandi okurukwera nikwija kugumizaamu hanu omu nsi. Habw’obwebembezi bwa Kristo, abantu ba Ruhanga nibaija kwikara baine obukonyezi obubarukwetaaga. Ky’amananu ngu, nibaija kutaahirirwa Gogi wa Magogi kandi ago nugo amahanga ageteraniize hamu. (Ez. 38:​18-20) Baitu tigalisobora kuhikyaho abantu ba Ruhanga akabi rundi kubalemesa kugumizaamu nibamuramya. Yahwe naija kubajuna! Omu kwolekwa, omukwenda Yohana akarora “ekitebe kingi” eky’abahondezi ba Kristo ab’entaama ezindi. Yohana akahurra iraka nirimugambira ngu “ekitebe kingi,” nubo “barugire omu muhito omwingi.” (Kus. 7:​9, 14) Nahabweki, nitukigumiza kimu ngu Yahwe naija kubalinda! w24.02 5-6 ¶13-14

Nitusobora kukora ki kutunga omwoyo ogurukwera? Tusemeriire kusaba Yahwe kugutuha, twesomese Ekigambo kye Baibuli, kandi twikale omu kitebe kye ekirukwebemberwa omwoyo gwe. Obutukora eki kitukonyera kukurakuraniza emiringo ey’eretwa omwoyo ogurukwera. (Bag. 5:​22, 23) Ruhanga aha omwoyo gwe ogurukwera abo bonka abaikara baine ebitekerezo ebisemiire n’engeso enungi. Tarukwija kugumizaamu natuha omwoyo ogurukwera obuturaikara nitutekerezaaho ebintu ebibi n’okubikora. (1 Bas. 4:​7, 8) Kusobora kugutunga, tusemeriire kwetantara kugaya ebyabanabbi. (1 Bas. 5:20) Ebyabanabbi nibimanyisa obutumwa Yahwe obw’atuha nakozesa omwoyo ogurukwera, otwaliiremu n’ebirukukwata ha kiro kye, n’akasumi akaturumu. Titutekereza ngu ekiro eki tikikabaire kuhika, rundi ngu Haramagedoni terukwija kutusanga tuli bomeezi. Twoleka ngu ekiro eki kiri haihi obutwikara omu ngeso zoona ezirukwera n’okutiina Ruhanga.—2 Pet. 3:​11, 12. w23.06 12 ¶13-14

Nk’Abakristaayo, kiki ekitusemeriire kukora kakuba ebisisani eby’orwanju byeyoleka ha kyoma kyaitu ekya kalimagezi tutakigenderiire? Ahonaaho tuleke kurorayo kandi tukiiheho. Nikiija kutwanguhira kukora eki, obuturaijuka ngu enkoragana yaitu na Yahwe y’omuhendo kukira ebintu ebindi byona. N’ebisisani ebindi ebitarukuzooka nk’eby’orwanju nabyo nibisobora kutuleetera kuba n’ebitekerezo eby’obusiihani. Habwaki nabyo tusemeriire kubyetantara? Habwokuba titurukugonza kusiihana omu mitima yaitu. (Mat. 5:​28, 29) Omugurusi w’ekitebe arukwetwa David kuruga Thailand n’agamba ati: “Nyekaguza nti: ‘N’obukiraaba ngu ebisisani ebindukurora tibiri by’orwanju, kirasemeza Yahwe obundaikara nimbirora?’ Kwekaguza ekikaguzo kinu kinkonyera kukora encwamu ey’amagezi.” Kutiina kubiihiza Yahwe kitukonyera kukora encwamu ez’amagezi. Omu kutiina Ruhanga “numwo amagezi garukubandiza.” w23.06 23 ¶12-13

‘Ebisiika’ binu nibisobora kuba nibimanyisa ebitebe byaitu. Yahwe naturaganiza ngu naija kutulinda omu kasumi ak’omuhito omwingi, obuturagumizaamu tuli omu bumu n’ab’oruganda na banyaanya itwe. Nahabweki, tutagarukira ha kubagumiisiriza kwonka, baitu tubooleke okugonza. Nikyo tusemeriire kukora kusobora kukiraho. “Ekiro ekikuru ekya [Yahwe]” kaliba kasumi akagumangaine hali abantu boona. (Zef. 1:​14, 15) Abantu ba Yahwe nabo balitunga ebizibu. Baitu kakuba twetekaniza hati, nitwija kusobora kwikara tutekaine kandi tukonyere abandi. Nitwija kugumiisiriza ebizibu byona ebituratunga. Ab’oruganda na banyaanya itwe obubaratunga ebizibu, nitwija kukora ekiturukosobora kubakonyera, kubooleka embabazi kandi tubahe ebibarukwetaaga. Obuturagumizaamu nitugonza ab’oruganda na banyaanya itwe, nikiija kutwanguhira kubooleka okugonza omu kasumi ak’omumaiso. Kandi Yahwe naija kutuha empeera ey’obwomeezi obutahwaho omu nsi etarumu ebigwererezi n’emihito.—Is. 65:17. w23.07 7 ¶16-17

Ekigambo kya Ruhanga kikira kubazaaho abasaija abesigwa nk’abamanzi. Baitu tinukwo baayehurraga obwire bwona. Ekyokurorraho, haroho Omukama Daudi obuyayehurraga agumire ‘nk’orusozi,’ baitu obwire obundi yayehurraga ‘ayetuntwire.’ (Zab. 30:7) N’obukiraaba ngu Samusoni akaba aine amaani maingi habw’omwoyo gwa Ruhanga, akakyetegereza ngu obuyabaga ataine amaani ganu ‘yafookaga muceke, nasisana nk’abantu abandi.’ (Bac. 14:​5, 6; 16:17) Yahwe nuwe yahaga abasaija banu abesigwa amaani. Omukwenda Paulo akagamba ngu nauwe yayetaagaga amaani kuruga hali Yahwe. (2 Kol. 12:​9, 10) Yatalibanizibwaga endwaire. (Bag. 4:​13, 14) Ekindi, obwire obumu, kyamugumiraga kukora ekihikire. (Bar. 7:​18, 19) Kandi obundi, yayeralikirraga ekyakumuhikireho. (2 Kol. 1:​8, 9) Baitu obuyabaga ahoirwemu amaani, nubwo yafookaga w’amaani. Omu mulingo ki? Yahwe yahaga Paulo amaani agamukonyeraga kugumira ebizibu. w23.10 12 ¶1-2

Obwire obumu obu turaaba twehurra nk’abataine mugaso, tusemeriire kukiijuka ngu Yahwe akatucunda nambere ali. (Yoh. 6:44) Aturoramu ebirungi itwe ebi tutasobora kweroramu kandi amanyire kyonyini ekiri omu mutima gwaitu. (2 Byom. 6:30) Nahabweki, nitusobora kukigumya ngu aba naakimanyisa obu atugambira ngu tuli b’omuhendo. (1 Yoh. 3:​19, 20) Abamu hali itwe, obu twali tutakegere amananu, nitusobora kuba twakozere ebintu ebi tukyayeyijukya na hati. (1 Pet. 4:3) N’abantu abandi abaheeriize Yahwe n’obwesiga kumara akasumi nibasobora kuba nibakyarwanisa obuceke obumu. Omutima gwawe nigukyakurumiiriza? Obu kiraaba nukwo kiri, nikisobora kukuhuumuza kukimanya ngu n’abaheereza ba Yahwe abaakara kandi abesigwa na bo haroho obu baayehurraga nka iwe. Ekyokurorraho, omukwenda Paulo akahwamu amaani, obu yatekeriizeeho obutahikirra bwe. (Bar. 7:24) Ky’amananu ngu, Paulo akaba ayegarukiremu ebibi bye kandi yabatizibwa. Baitu nabwo, akeyeta “omuto owabakwenda” kandi “owokubanza” omu basiisi.—1 Kol. 15:9; 1 Tim. 1:15. w24.03 27 ¶5-6

Isomo limu erutukwegera ha ncwamu y’Omukama Yoasi, niryo ngu tusemeriire kutunga abanywani abarungi abarukugonza Yahwe kandi abarukugonza kumusemeza. Titusemeriire kunywana ab’emyaka yaitu bonka. Ijuka ngu Yoasi akaba ali muto muno hali munywani we Yehoyada. Obworukuba n’okomamu abanywani wekaguze: ‘Bankonyera kugumya okwikiriza kwange omuli Yahwe? Banyekambisa kuhondera endengo za Ruhanga? Bagambiraho abandi hali Yahwe n’amananu ag’omuhendo? Booleka ngu nibateekamu ekitiinisa endengo za Ruhanga? Bangambira ebindukugonza kuhurra, rundi batunga obumanzi obwokumpabura obundukuba ningenda kukora ekintu ekitahikire?’ (Nfu. 27:​5, 6, 17) Amananu gali, banywani baawe obubaraaba batarukugonza Yahwe, tibarukwija kukukonyera. Baitu kakuba baba nibagonza Yahwe, nibaija kukukonyera.—Nfu. 13:20. w23.09 9-10 ¶6-7

Enyuguta erukumanywa nka alufa niyo y’okubanza omu nyuguta ez’Oruyonaani kandi enyuguta erukumanywa nka Omega niyo y’okumalirra. Yahwe obuyagambire ngu nuwe “Alufa na Omega,” akaba namanyisa ngu obwatandika ekintu, akimalirra. Hanyuma ya Yahwe kuhanga Adamu na Hawa akabagambira ati: “Muzalege, mukanye, muijuze ensi, mugirye.” (Kub. 1:28) Obuyagambiire Adamu na Hawa ebigambo binu akaba nasisana nk’ow’arukugamba ngu “Alufa.” Akasumi kaakuhikire abaijukuru ba Adamu abahikiriire kandi abarukworobera Ruhanga baijuze ensi kandi bagifoole orugonjo orurungi. Nitusobora kugamba ngu akasumi ekigendererwa kya Yahwe kinu obukirihikirra, nubwo alisisana nk’ow’arukugamba ngu “Omega.” Yahwe obuyamazire kuhanga “iguru nensi . . . nihe lyabyo lyona,” akabaza ebigambo ebirukwoleka ngu ekigendererwa kye kyakuhikiriire. Akaba nakigumiza kimu ngu akaba naija kuhikiiriza ekigendererwa kye hali abantu n’ensi. Kandi eki kyakuhikiriire ha kumalirra kw’ekiro eki ekyamusanju.—Kub. 2:​1-3. w23.11 5 ¶13-14

Orugendo oru orugumire kuruga Baburoni kuhika Isaleri rwatwaraga nk’emyezi ena. Baitu Yahwe akaba araganiize ngu ekintu kyona ekyakubalemeseze kugarukayo yakukiihireho. Hali Abayudaaya abesigwa, ebirungi ebyakurugire omu kugaruka Isaleri, bikaba nibikira ebintu ebibaakweferiize. Omugisa ogurukukirayo gukaba nigutwarramu okuramya kwabo. Omu Baburoni hakaba hatarumu yekaru ya Yahwe. Hakaba hataliyo ekyoto nambere Abaisaleri baakugenzere kuhayo ebihongwa byabo nk’oku kyaragirwaga omu Biragiro bya Musa. Kandi hakaba hataliyo banyakatagara abatekaniziibwe kurungi kuhayo ebihongwa ebi. Ekindi, bakaba betoroirwe abantu baingi abatarukuheereza Yahwe kandi abatarukuhondera endengo ze. Nahabweki enkumi n’enkumi z’Abayudaaya abarukutiina Ruhanga baali baine ekihika eky’okugaruka omu nsi y’owabu nukwo bagarreho okuramya okw’amananu. w23.05 14-15 ¶3-4

Nitwetaaga obukonyezi obw’omwoyo ogurukwera nukwo tusobole kwikara nitwetwaza nk’abaana ab’omusana. Habwaki? Habwokuba tikyanguhire kwikara tutaine kamogo omu nsi enu enyakwijwiremu obusiihani. (1 Bas. 4:​3-5, 7, 8) Omwoyo ogurukwera nigusobora kutukonyera kwetantara entekereza y’ensi ey’erukutwarramu enyegesa z’abantu ezirukuhakaniza entekereza ya Ruhanga. Nigusobora n’okutukonyera kukurakuraniza oburungi n’okuhikirra. (Bef. 5:9) Gumu ha mulingo tusobora kutungamu omwoyo ogurukwera nukwo kugusaba Yahwe. Yesu akagamba ngu Yahwe naija “okubaha omwoyo ogurukwera abanyakumusaba.” (Luk. 11:13) Ekindi, tutunga omwoyo ogurukwera obu tukugiza hamu Yahwe omu nsorrokano. (Bef. 5:​19, 20) Omwoyo ogurukwera nigwija kutwekambisa kukora Ruhanga ebi agonza omu bwomeezi bwaitu. w24.03 23-24 ¶13-15

Wakugondeze kweyongera kuba muntu arukugumiisiriza? Obukiraaba nukwo kiri, Saba Yahwe. Okugumiisiriza guli gumu ha miringo eretwa omwoyo ogurukwera. (Bag. 5:​22, 23) Nahabweki nitusobora kusaba Yahwe atuhe omwoyo ogurukwera nukwo gutukonyere kukurakuraniza okugumiisiriza. Kakuba tuhikwaho enyikara erukutwetaagisa kwoleka okugumiisiriza, tweyongere kusaba Yahwe atuhe omwoyo ogurukwera. (Luk. 11:13) Ekindi, nitusobora kusaba Yahwe kutukonyera kurora ebintu nk’oku abirora. Kandi hanyuma y’okusaba, tusemeriire kwikara nitwekamba kugumiisiriza buli kiro. Obuturayeyongera kusaba Yahwe, kandi tukekamba kwoleka okugumiisiriza nitwija kweyongera kuba bantu abarukugumiisiriza, n’obukiraaba ngu kyatugumiraga kara. Nikiija kutukonyera obuturayecumiitirizaaho ebyokurorraho eby’omu Baibuli. Baibuli erumu ebyokurorraho by’abantu baingi abaayolekere okugumiisiriza. Kakuba tubyecumiitirizaaho, nitusobora kwega omulingo tusobora kukwoleka. w23.08 22-23 ¶10-11

Yesu akagumya omukwenda Petero ngu Yahwe yakumusagikire. Hanyuma ya Yesu kuhumbuuka, omu mulingo ogw’ekyamahano akakonyera Petero n’abakwenda abandi kukwata encu nyingi. (Yoh. 21:​4-6) Hataroho kugurukyagurukya, ekyamahano kinu kikakonyera Petero kukigumya ngu Yahwe akaba naija kumurolerra. Obundi omukwenda onu akaijuka ebigambo bya Yesu ebirukwoleka ngu Yahwe akaba naija kurolerra abo boona ‘ababanza kuserra Obukama.’ (Mat. 6:33) Eki kikakonyera Petero kwebembeza obuheereza bwe hatali omulimo gwe ogw’okusoha. N’obumanzi, akaha obwakaiso ha kiro kya Pentekote 33 Y.A.K., ekyakonyiire abantu baingi kwikiriza amakuru amarungi. (Ebik. 2:​14, 37-41) Kandi hanyuma akakonyera Abasamaliya n’Abanyamahanga kwikiriza Kristo. (Ebik. 8:​14-17; 10:​44-48) Yahwe akakozesa Petero kukonyera abantu baingi kufooka Abakristaayo. w23.09 20 ¶1; 23 ¶11

Emyaka nk’ebiri hanyuma y’Abababuroni kuhwerekereza Yerusalemu, Omukama Nebukadeneza owa Baburoni akaroota ekirooto nambere yarozere ekisisani ekirukutiinisa. Akagamba ngu abasaija boona ab’amagezi, otwaliiremu na Danieri baitwe, kakuba balemwa kumugambira ekyarosere n’amakuru gaakyo. (Dan. 2:​3-5) Danieri akaba aine kugira ekiyakoraho omu bwangu, kitali eki, abantu baingi baakufiire. Danieri “yatahamu, yayesengereza omukama amuraganize omwanya, amusoborre . . . amakuru” g’ekirooto. (Dan. 2:16) Kinu kiketaagisa obumanzi n’okwikiriza. Busaho ekirukwoleka ngu Danieri yarotorraga ebirooto. Akagambira banywani be “basabe ebyokuganyirwa hali Ruhanga womu iguru habwekyensita eki.” (Dan. 2:18) Yahwe akagarukamu esaara zaabo. Akakonyera Danieri kurotorra ekirooto eki. Kandi Danieri n’abanywani be bataitwe. w23.08 3 ¶4

Tekerezaaho ebirungi ebiruga omu kugumiisiriza. Obutugumiisiriza, kitukonyera kwikara tusemeriirwe kandi tutekaine. Nahabweki okugumiisiriza kutukonyera kuba n’obwomeezi oburungi omu mubiri n’omu bitekerezo. Obutugumiisiriza abandi, tweyongera kuba n’enkoragana enungi nabo. Ekitebe kyeyongera kuba omu bumu. Kandi kakuba omuntu atubiihiza, okugumiisiriza kutukonyera kwetanga n’okutaikara nitutekerezaaho ensonga egi. (Zab. 37:8; Nfu. 14:29) Kandi ekirukukirayo obukuru, twegera hali Isiitwe ow’omu iguru kandi tweyongera kumwirra haihi. Mali okugumiisiriza mulingo omurungi ogurutugasira itwena! N’obukiraaba ngu obwire obumu nikisobora kutugumira kwoleka okugumiisiriza, Yahwe n’asobora kutukonyera kugumizaamu nitukukurakuraniza. Obutukyalindiriire ensi empyaka, nitusobora kukigumiza kimu ngu ‘eriiso lya Yahwe liikara hali abo abanyakumutiina, hali abo abategereza okuganyira kwe.’ (Zab. 33:18) Leka itwena tucweremu kimu kwikara tujwaire okugumiisiriza. w23.08 22 ¶7; 25 ¶16-17

Yakobo akooleka ngu omuntu n’asobora kugamba ngu aine okwikiriza baitu ebikorwa bye nibyoleka ngu takwine. (Yak. 2:​1-5, 9) Ekindi, Yakobo akabazaaho omuntu ayarozere ‘Omukristaayo mugenzi we ataine engoye rundi ebyokulya’ baitu tiyamukonyera. N’obwaraaba n’agamba ngu aine okwikiriza, atakwoleke omu bikorwa. Nahabweki kukaba kutaine mugaso. (Yak. 2:​14-16) Yakobo akakozesa ekyokurorraho kya Rahabu nk’omuntu ayayolekere okwikiriza kwe omu bikorwa. (Yak. 2:​25, 26) Akahurra ebirukukwata hali Yahwe kandi yakyetegereza ngu asemeriire kusagika Abaisaleri. (Yos. 2:​9-11) Akooleka okwikiriza kwe omu bikorwa kuraba omu kusereka entasi ibiri. Ekyarugiremu, kusisanaho na Iburahimu, omukazi onu ow’atahikiriire kandi ow’akaba atali hansi y’Ebiragiro bya Musa, Yahwe akamurora nk’ow’okuhikirra. Ekyokurorraho kye nikitwoleka obukuru obw’okwoleka okwikiriza kuraba omu bikorwa. w23.12 5-6 ¶12-13

Nk’Abakristaayo, titurukugonza kugarukira ha nyegesa ez’okubandizaaho zonka. Omwoyo gwa Ruhanga nigusobora kutukonyera kwetegereza ebintu “ebitarukumanywa ebya Ruhanga.” (1 Kol. 2:​9, 10) Habwaki otatandika kwesomesaaho ebintu ebirakukonyera kwirra haihi na Yahwe? Ekyokurorraho, n’osobora kwesomesaaho omulingo yayolekere abaheereza be abaakara okugonza, n’omulingo kinu kirukukugumya ngu naiwe nakugonza. Ekindi, n’osobora kwesomesaaho entekaniza ey’okuramya Yahwe eyiyataireho omu Isaleri, kandi wetegereze omulingo erukusisana n’entekaniza ey’okuramya kasumi kanu. Rundi n’osobora kwesomesaaho obunabbi Yesu obuyahikiiriize omu buheereza bwe obwakaba ali omu nsi. N’osobora kwegondeza omu kwesomesaaho ebintu ebi, n’okozesa Watch Tower Publications Index rundi Ekitabu Ekikonyera Abakaiso ba Yahwe Kuseruliiriza. Kwesomesa ha bintu ebihamire nikiija kugumya okwikiriza kwawe kandi kikukonyere ‘kuzoora okumanya Ruhanga.’—Nfu. 2:​4, 5. w23.10 18-19 ¶3-5

Ekigambo “kwingi muno,” Petero ekiyakozeseze nikisobora kumanyisa “kwanjurra.” Akacweka kakabiri ak’orukarra katwoleka okugonza okwingi ekikusobora kukora. Kuswekerra ebibi by’ab’oruganda. Tekerezaaho ekyokurorraho kinu: Kakuba oba oine emeeza eroho ebitonyezi bingi, n’osobora kukwata orugoye orurungi n’orwanjurra haiguru y’emeeza n’osweka ebitonyezi ebi byona. Omulingo nugwo gumu, okugonza kutukonyera kuswekerra hatali ekibi kimu kyonka baitu ebibi bingi. Ekigambo ‘okuswekerra’ nikimanyisa okuganyira. Nk’oku orugoye rusobora kuswekerra ekitonyezi, okugonza nikusobora kuswekerra obuceke n’obutahikirra bw’abandi. Okugonza okutwiniire abandi kusemeriire kuba kw’amaani nukwo kutwekambise kuganyira ab’oruganda na banyaanya itwe n’obukirukuba kigumire kukikora. (Bef. 4:32) Obutuganyira abandi twoleka ngu twine okugonza kwingi muno kandi ngu nitugonza kusemeza Isiitwe ow’omu iguru, Yahwe. w23.11 10-12 ¶13-15

Obuyahikize emyaka 26, Omukama Yosiya akatandika kudabiriza yekaru. Obubakaba nibakora omulimo gunu, “ekitabu ekyebiragiro bya [Yahwe] ebyahairwe habwomukono gwa Musa” kikazoorwa. Omukama obuyahuliire ebigambo binu, ahonaaho akateeka omu nkora ebihandikirwemu. (2 Byom. 34:​14, 19-21) Naiwe wakugondeze kusoma Baibuli buli kiro? Obworaaba n’olengaho, n’okyegondezaamu? Olengaho kuhandiika enkarra ezisobora kukukonyera? Yosiya obwakaba aine emyaka 39, akakora encwamu eyamurugiiremu kufa. Akeyesiga wenka omu kiikaro ky’okuserra obuhabuzi hali Yahwe. (2 Byom. 35:​20-25) Kinu nikitwegesa ki? Katube tuli bato rundi bakuru, rundi tumazire akasumi akaraihire nitwesomesa Baibuli, tusemeriire kugumizaamu nituserra Yahwe. Eki nikitwarramu butoosa kumusaba obuhabuzi, kwesomesa Ekigambo kye, n’okuhuliiriza obuhabuzi obw’Abakristaayo abakuzire omu by’omwoyo. Obu nubwo turukwija kwetantara kukora ensobi ez’amaani kandi nitwija kweyongera kuba n’okusemererwa.—Yak. 1:25. w23.09 12 ¶15-16

Baibuli ebazaaho abakazi baingi abaagondeze Yahwe kandi baamuheereza. Bakaba bali ‘abasemiire’ omu ngeso kandi ‘abesigwa.’ (1 Tim. 3:11) Ekindi, banyaanya itwe nibasobora kwegera ha ebyokurorraho eby’abakazi abakuzire omu by’omwoyo abali omu kitebe. Banyaanya itwe abato, mumanyire banyaanya itwe abandi abataireho ekyokurorraho ekirungi abamusobora kwegeraho? Mwetegereze emiringo yaabo enungi. Kandi murole omulingo musobora kubegeraho. Obwebundaazi guli mulingo omukuru ogwoleka ngu Mukristaayo akuzire omu by’omwoyo. Kakuba omukazi aba mwebundaazi, naija kwegondeza omu kuba n’enkoragana enungi na Yahwe hamu n’abantu abandi. Ekyokurorraho, omukazi ow’agonza Yahwe, n’obwebundaazi ahondera oburagirizi oburukukwata ha ntekaniza ey’obwebembezi Yahwe ey’ataireho. (1 Kol. 11:3) Kandi kinu akikora omu kitebe, n’omu ka. w23.12 18-19 ¶3-5

Yahwe n’agonza nyineeka kugonza mukazi we kandi amurolerre omu by’omubiri, omu nyehurra, n’omu by’omwoyo. Kuba omwekengi, kuteekamu abakazi ekitiinisa, n’okuba muntu arukwesigwa nibiija kukukonyera kuba nyineeka omurungi. Hanyuma y’okutaaha obuswere, nimusobora kuzaara abaana. Kiki eki osobora kwegera hali Yahwe kikakukonyera kuba taata omurungi? (Bef. 6:4) Yahwe akagambira omwana we Yesu ngu namugonza muno kandi namwesiimisa. (Mat. 3:17) Obumurazaara abaana, butoosa bagambire ngu nobagonza. Ikara n’obasiima habw’ebintu ebirungi ebi bakora. Bataata abeegera ha kyokurorraho kya Yahwe, bakonyera abaana baabo kukura omu by’omwoyo. N’osobora kwetekaniriza obujunanizibwa bunu hati kuraba omu kwoleka ab’omu ka yaawe n’ab’omu kitebe ngu n’obagonza kandi n’osiima ebi barukukora.—Yoh. 15:9. w23.12 28-29 ¶17-18

N’obukiraaba ngu nituheereza Yahwe n’obwesigwa, naitwe tuhikwaho ebizibu kandi turwara nk’abantu abandi. Ekindi, abantu abamu nibasobora kutuhiiganiza habwokuba nituheereza Yahwe. N’obukiraaba ngu Yahwe tatanga ebintu binu kutuhikaho, araganiize kutukonyera. (Is. 41:10) N’asobora kutukonyera kwikara twine okusemererwa, kukora encwamu enungi, n’okwikara tuli besigwa haluwe, n’obutuba nituraba omu nyikara ezirukukirrayo kimu kuguma. Yahwe araganiize kutuha Baibuli ekyeyeta ‘obusinge bwa Ruhanga.’ (Baf. 4:​6, 7) Obusinge bunu, nukwo okutekaana n’okuhuumura okututunga omu bitekerezo habwokuba n’enkoragana enungi na Yahwe. Obusinge bunu ‘nibukira okumanywa kwona,’ habwokuba butuleetera kutekaana n’okwehurra kurungi muno kukira nk’okuturukutekereza. Kyakakubahoga kuba oyetuntwire muno baitu hanyuma y’okusaba Yahwe, ahonaaho okahurra watekaana? Enyehurra egi nubwo “obusinge bwa Ruhanga.” w24.01 20 ¶2; 21 ¶4

Okugonza kwa Ruhanga kuleetera abantu abesigwa kukugiza ibara lye n’omutima gwabo gwona. Omukama Daudi akaba akimanyire ngu kukugiza ibara lya Yahwe nikimanyisa kukugiza Yahwe wenyini. Obutuhurra ibara lya Yahwe tutekerezaaho emiringo ye, hamu n’ebintu ebirukuhuniiriza eby’akora. Daudi akaba n’agonza kukugiza ibara lya Ise ow’omu iguru n’okulyeza. Akaba n’agonza kukikora “na byona ebiri omuli” uwe, ekirukumanyisa n’omutima gwe gwona. Omu mulingo nugwo gumu, Abalevi bakebembera omu kukugiza Yahwe. Kandi n’obwebundaazi bakakyoleka ngu ebigambo byabo byali bitasobora kukugiza ibara lya Ruhanga erirukwera omu bwijwire. (Neh. 9:5.) Hataroho kugurukyagurukya, okukugiza oku okurukwoleka obwebundaazi kandi okurukuruga ha mutima kukasemeza Yahwe. w24.02 9 ¶6

Yahwe tarukwija kukurora nk’owalemerwe, kakuba olemwa kuhikiiriza ekigendererwa eky’otarukusobora. (2 Kol. 8:12) Yegera ha bikuletiire kugarukirra. Ikara noijuka eby’osoboire kukora. Baibuli egamba eti: “Ruhanga tali atahikiriire okwebwa emirimo yanyu.” (Baheb. 6:10) Nahabweki naiwe oteebwa eby’osoboire kukora. Ikara noijuka ebigendererwa eby’osoboire kuhikiiriza. N’osobora kuba oyeyongiire kugumya enkoragana yaawe na Yahwe, kutebeza abandi rundi wabatizibwa. Obworaaba osoboire kuhika ha bigendererwa byawe omu kasumi k’enyuma, n’osobora kuhika ha kigendererwa kyawe eky’oyeterireho hati. Yahwe n’asobora kukukonyera kukihikaho. Obworaaba noyekamba kukihikaho, teeka omutima ha migisa Yahwe arukukuha kandi eki nikiija kukukonyera kwikara osemeriirwe. (2 Kol. 4:7) Kakuba otajwaha, noija kutunga emigisa endi nyingi.—Bag. 6:9. w23.05 31 ¶16-18

Yahwe agonza kwoleka abantu ngu naabagonza kandi naabasiima. Baibuli ebazaaho emirundi ebiri Yahwe obu yagambiire Omwana we Yesu ngu naamugonza. (Mat. 3:17; 17:5) Na iwe wakugondeze kuhurra Yahwe naakugambira ebigambo nk’ebi? Yahwe tabaza na itwe kuruga omu iguru, baitu abaza na itwe kuraba omu Baibuli. Nitusobora kuhurra iraka lya Yahwe naatugambira ngu naatugonza obu tusoma ebigambo bya Yesu ebiri omu bitabu by’Enjiri. Yesu akahondera ekyokurorraho kya Ise kikumi ha kikumi. Nahabweki obu tusomaho Yesu naagambira abahondezi be abatahikiriire ngu naabagonza, nitusobora kuteeramu akasisani Yahwe naatugambira ebigambo ebi. (Yoh. 15:​9, 15) Obu tutunga ebizibu, kiba kitarukumanyisa ngu takyatugonza. Oihireho, kituha omugisa ogw’okwoleka ngu nitumugonza kandi nitumwesiga.—Yak. 1:12. w24.03 28 ¶10-11