Kasi Kumanya Unenesko Wakukhwaskana na Helo Kungamovwirani Wuli?
AWO ŵakusambizga kuti ŵanthu ŵamuyuzgika ku helo ŵakulongora kuti ŵakumumanya makora yayi Yehova Ciuta na mikhaliro yake. Mbunenesko kuti Baibolo likuyowoya kuti Ciuta wazamuparanya ŵaheni. (2 Ŵatesalonika 1:6-9) Kweni ukali kuti ndiwo ni mukhaliro ukuru wa Ciuta yayi.
Ciuta wakukhumbira ŵanthu viheni yayi. Nakuti Ciuta wakufumba kuti: “Kasi nkhukondwera kuti muheni wafwe?” (Ezekiel 18:23) Usange Ciuta wakukondwa yayi na nyifwa ya ŵanthu ŵaheni, wangakondwa wuli kuti ŵanthu ŵanthena ŵayuzgikenge kwamuyirayira?
Mukhaliro ukuru wa Ciuta nchitemwa. (1 Yohane 4:8) Nakuti Baibolo likuti, ‘Fumu njiwemi ku wose, ciwuravi cake cili pa vilengiwa vyake vyose.’ (Salmo 145:9, The Holy Bible—New International Version) Kweni ico Ciuta wakukhumba kuti ise timucitire nkhumutemwa na mtima withu wose.—Mateyu 22:35-38.
Kasi Mukusopa Ciuta Cifukwa ca Kumutemwa Panji Kopa Helo?
Cisambizgo cakuti ŵanthu ŵakuyuzgika mu helo cikupangiska ŵanji kopa Ciuta mwambura kwenelera. Kweni munthu uyo wamanya unenesko wakuyowoya za Ciuta ndipo wamba kumutemwa wakuŵa na wofi wakwenelera. Lemba la Salmo 111:10 likuti: ‘Kopa Fumu ndiko nkhwamba kwa vinjeru; ndipo awo ŵali na kopa kwantheura ndiwo mbavinjeru.’ (The New American Bible) Kopa Ciuta kwantheura nkhwakwenelera, ndipo kukung’anamura kumucindika pakuti ni Mlengi. Kukung’anamuraso kuti tileke kucita vinthu ivyo vingamukwiyiska.
Wonani umo Kathleen wa vilimika 32, uyo wakamwanga comene munkhwala wakuzweteska wongo wakasinthira wati wasambira unenesko wakuyowoya za helo. Wakatemwanga comene viphikiro, nkhaza, wakajitinkhanga, ndiposo wakaŵa na nkharo yiheni. Wakati: “Nyengo zinyake nkhalaŵiskanga mwana wane msungwana, uyo wakaŵa na cilimika cimoza, na kuyowoya ndekha kuti: ‘Wonani ivyo nkhucitira mwana wane. Namuphya ku helo cifukwa ca ivyo nkhumucitira.’” Kathleen wakayezgayezga kuleka kumwa munkhwala wakuzweteska wongo, kweni pakaŵavya ico cikacitika. Iyo wakati: “Nkhakhumbanga kuti niŵe muwemi, kweni cilicose pa umoyo wane cikaŵa cakucitiska citima comene. Nkhawona nga palije cifukwa cakusinthira.”
Zuŵa linyake Kathleen wakakumana na Ŵakaboni ŵa Yehova. Iyo wakati: “Nkhasambira kuti ŵanthu ŵamuphya ku helo yayi. Malemba agho ŵakanijulira ghakanovwira kupulikiska nkhani iyi. Nkhati namanya kuti namuphya yayi mu helo, mtima wane ukakhala pasi.” Kweni wakasambiraso kuti Ciuta wali kulayizga kuti ŵanthu ŵazamukhala pa caru kwamuyirayira, ndipo viheni kuzamuŵavya. (Salmo 37:10, 11, 29; Luka 23:43) Wakayowoya mwakukondwa wakati: “Sono nili na cilindizga ciwemi comene ca kuzakakhala mu Paradiso kwamuyirayira.”
Wakati wamanya kuti kulije helo wa moto, kasi wakalutilira nthena kumwa munkhwala wakuzweteska wongo? Kathleen wakati: “Para kusingo kwati lyokolyoko kuti nimwepo munkhwala uwu, nkhalombanga, kuŵeyelera Yehova Ciuta kuti wanovwire. Nkhaghanaghaniranga umo iyo wakuwonera nkharo yaukazuzi iyi, nkhakhumba yayi kumukwiyiska. Wakazgora malurombo ghane.” (2 Ŵakorinte 7:1) Cifukwa ca kopa kukwiyiska Ciuta, Kathleen wakalekerathu kumwa munkhwala uwu.
Tikutemwa Ciuta ndiposo kumopa mwakwenelera cifukwa cakuti tikopa kukayuzgika mu helo yayi kweni tikucita khumbo lake mwakuti tilutilire kuŵa ŵacimwemwe. Wamasalmo wakalemba kuti: “Ngwakutumbikika yose uyo wakopa Yehova na kwenda mu nthowa zake!”—Salmo 128:1.
[Bokosi/Vithuzithuzi pa peji 9]
MBANJANI AWO ŴAZAMUFUMA MU HELO?
Mabaibolo ghanyake ghakupambaniska yayi mazgu ghaŵiri gha Cigiriki ghakuti Geʹen·na na Haiʹdes. Mazgu agha ŵakughang’anamura kuti “helo.” Mu Baibolo, lizgu lakuti Gehena likung’anamura kuparanyikirathu. Ndipo awo ŵakuyowoyeka kuti ŵali mu Gehena ŵazamuwuka yayi. Kweni awo ŵali mu Hadesi ŵazamuwuka.
Yesu wakati wawuka ku ŵakufwa, mpositole Petrosi wakati Yesu ‘kuti wakasidika mu helo cara.’ (Milimo 2:27, 31, 32, King James Version) Lizgu lakuti helo ilo lalembeka pa vesi ili mu Cigiriki ni Hadesi. Yesu wakaluta ku malo ghakuyuzgikirako yayi. Lizgu lakuti Hadesi panji “helo” likung’anamura dindi. Ndipouli ni Yesu pera yayi uyo Ciuta wakamuwuska mu Hadesi.
Pakuyowoya za awo ŵazamuwuka, Baibolo likuti: ‘Nyifwa na helo vikapeleka ŵakufwa awo ŵakaŵa mwenemumo.’ (Civumbuzi 20:13, 14, King James Version) Mazgu agha ghakung’anamura kuti ŵakufwa awo Ciuta wakuwona kuti mbakwenelera, ŵazamuwuka. (Yohane 5:28, 29; Milimo 24:15) Cizamuŵa cakukondweska comene kuwona ŵakutemweka ŵithu awo ŵali kufwa ŵakufuma ku malaro. Yehova, uyo ni Ciuta wacitemwa ndiyo wazamucita ici.