“Mzimu na Mwali Ŵakulutilira Kuyowoya Kuti: ‘Zanga!’”
“Mzimu na mwali ŵakulutilira kuyowoya kuti: ‘Zanga!’ . . . Waliyose uyo wali na nyota wize; waliyose uyo wakukhumba watore maji gha umoyo kwawanangwa.”—UVU. 22:17.
1, 2. Kasi vinthu vya Ufumu vikwenera kuŵa pa malo wuli mu umoyo withu, ndipo cifukwa wuli?
KASI vinthu vya Ufumu vikwenera kuŵa pa malo wuli mu umoyo withu? Yesu wakaciska ŵalondezgi ŵake kuti ‘ŵalutilire kupenja dankha ufumu.’ Wakaŵaphalira kuti para ŵalutilirenge kupenja ufumu, Ciuta waŵapenge ivyo ŵakasoŵerwanga. (Mat. 6:25-33) Wakayaniska Ufumu wa Ciuta na ngale yakuzirwa comene, iyo wamalonda wakwendakwenda wakati wayisanga, “wakaguliska vinthu vyose ivyo wakaŵa navyo na kuyigura.” (Mat. 13:45, 46) Asi nase tikwenera kuzirwiska comene mulimo wa kupharazga Ufumu na kuzgora ŵanthu kuŵa ŵasambiri?
2 Nga umo tikawonera mu nkhani ziŵiri izo zajumpha, para tikuyowoya mwacikanga na kugwiliskira nchito mwaluso Mazgu gha Ciuta mu uteŵeti, tikulongora kuti tikulongozgeka na mzimu wa Ciuta. Mzimu uwu ukovwiraso comene para tikucita mulimo wa kupharazga Ufumu nyengo zose. Tiyeni tiwone umo ukovwilira.
Waliyose Wakucemeka!
3. Kasi ŵanthu ŵakucemeka kuti ‘ŵize’ kuzakamwa maji gha mtundu wuli?
3 Nchemo yikupelekeka ku ŵanthu wose kwizira mu mzimu utuŵa. (Ŵazgani Uvumbuzi 22:17.) Nchemo iyi njakuti munthu ‘wize’ na kumazga nyota yake na maji ghapadera comene. Agha ni maji agho tose tikughamanya yayi. Nangauli maji ngakukhumbikwa kuti pa caru capasi paŵe umoyo, Yesu wakaghanaghananga za maji ghanyake apo wakaphalira mwanakazi Musamariya pa cisimi kuti: “Waliyose uyo wakumwako maji agho nimupenge waŵengeso na nyota cara nanga mphacoko, kweni maji agho nimupenge, mwa iyo ghaŵenge cisimi ca maji ghakubwibwituka kupeleka umoyo wamuyirayira.” (Yoh. 4:14) Maji ghapadera agho ŵanthu ŵakucemeka kuti ŵamwenge ghakupeleka umoyo wamuyirayira.
4. Kasi vikenda wuli kuti maji gha umoyo ghambe kukhumbikwa, ndipo maji agha ghakwimira vici?
4 Maji gha umoyo ghakamba kukhumbikwa apo munthu wakwamba, Adamu, wakakolerana na muwoli wake, Eva, kugalukira Yehova Ciuta, uyo wakaŵalenga. (Gen. 2:16, 17; 3:1-6) Ŵanthu ŵakwamba ŵakacimbizgika mu munda “mzire [Adamu] wanyoroske woko lake na kutora vya khuni la umoyo wuwo, na kurya, na kughuma kwa muyirayira.” (Gen. 3:22) Pakuŵa mupapi wa ŵanthu, Adamu wakanjizga nyifwa ku ŵanthu wose. (Rom. 5:12) Maji gha umoyo ghakwimira vyose ivyo Ciuta wapeleka kuti wawombore ŵanthu ŵakupulikira ku kwananga na nyifwa na kuŵapa umoyo wamuyirayira mu Paradiso pa caru capasi. Kuti vyose ivi vicitike nchifukwa ca sembe yakuwombora ya Yesu Khristu.—Mat. 20:28; Yoh. 3:16; 1 Yoh. 4:9, 10.
5. Kasi nchemo yakuti ŵanthu ŵize na “kutora maji gha umoyo kwawanangwa” yikufuma kwa njani? Longosorani.
5 Kasi nchemo yakuti ŵanthu ŵize na “kutora maji gha umoyo kwawanangwa” yikufuma kwa njani? Mu Muwuso wa Khristu wa Vilimika Cikwi, ŵanthu ŵazamusanga candulo na vyose ivyo vyapelekeka kuti ŵasange umoyo kwizira mwa Yesu. Vinthu ivi vyalongosoreka kuti ni “mlonga wa maji gha umoyo, wakulangara nga ni kurusitalo.” Mlonga uwu ukuwoneka kuti “ukukhira kufuma ku cizumbe ca Ciuta na ca Mwanamberere.” (Uvu. 22:1) Ntheura, maji gha umoyo agha ghakufuma kwa Yehova, uyo nchisimi ca umoyo. (Sal. 36:9) Ndiyo wakupeleka maji agha ku ŵanthu kwizira mwa “Mwanamberere,” Yesu Khristu. (Yoh. 1:29) Mlonga uwu ni nthowa ya Yehova yakumazgira viheni vyose ivyo vikucitikira ŵanthu cifukwa cakuti Adamu wakaleka kupulikira. Enya, nchemo yakuti ŵanthu ‘ŵize’ yikufuma kwa Yehova Ciuta.
6. Kasi “mlonga wa maji gha umoyo” uli kwamba pawuli kwenda?
6 Nangauli “mlonga wa maji gha umoyo” uzamwenda mwakufikapo mu Muwuso wa Khristu wa Vilimika Cikwi, kweni uli kwamba kale kwenda mu “zuŵa la Fumu,” ilo likamba apo “Mwanamberere” wakakhala pa cizumbe kucanya mu 1914. (Uvu. 1:10) Ntheura, vinthu vinyake vyakupeleka umoyo vikamba kusangika “Mwanamberere” wati wakakhala pa cizumbe kucanya. Vinthu ivi vikukhwaskana na uthenga wa mu Baibolo, cifukwa ukuyowoyeka kuti ni “maji.” (Efe. 5:26) Waliyose wakucemeka kuti “watore maji gha umoyo” mwa kupulika na kupokelera makani ghawemi gha Ufumu. Kweni ni njani uyo wakupeleka nchemo iyi mu zuŵa la Fumu?
“Mwali” Wakuti, “Zanga!”
7. Mbanjani awo ŵakaŵa ŵakwamba kucemera ŵanthu ku maji gha umoyo mu “zuŵa la Fumu,” ndipo ŵakacemanga anjani?
7 Ŵakhristu ŵakuphakazgika na mzimu, awo ni gulu la mwali, ndiwo ŵakaŵa ŵakwamba kupeleka nchemo yakuti, “zanga.” Kasi ŵakucema anjani? Mwali kuti wakujicema yekha kuti, “Zanga!” yayi. Wakucema awo ŵali na cigomezgo ca kuzakaŵa ŵamoyo kwamuyirayira pa caru capasi para “nkhondo ya zuŵa likuru la Ciuta Wankhongonozose” yazakamara.—Ŵazgani Uvumbuzi 16:14, 16.
8. Nchivici cikulongora kuti Ŵakhristu ŵakuphakazgika ŵaŵa ŵakupeleka nchemo ya Yehova kwambira mu 1918?
8 Ŵalondezgi ŵakuphakazgika ŵa Khristu ŵaŵa ŵakupeleka nchemo iyi kwambira mu 1918. Mu cilimika cenecici, nkhani yacisanisani ya mutu wakuti, “Millions Now Living May Never Die” (“Ŵanandi awo Mbamoyo Sono Ŵakwenera Kuti Ŵafwenge Yayi”) yikapeleka cigomezgo cakuti ŵanthu ŵanandi ŵazamuŵa ŵamoyo mu paradiso pa caru capasi para nkhondo ya Haramagedoni yajumpha. Nkhani iyo yikayowoyeka pa ungano wa Ŵasambiri ŵa Baibolo ku Cedar Point, Ohio, ku U.S.A., mu 1922 yikaciska awo ŵakapulikizganga kuti ‘ŵapharazge Fumu na ufumu wake.’ Pempho ili likawovwira ŵakukhalira ŵa gulu la mwali kupeleka nchemo ku ŵanthu ŵanandi. Mu 1929, Gongwe la Mulinda la Cingelezi la Malici 15, likaŵa na nkhani ya mutu wakuti, “Gracious Invitation” (Nchemo Yiwemi), ndipo yikafuma pa lemba la Uvumbuzi 22:17. Nkhani iyi yikayowoya kuti: “Ŵa mu gulu la ŵakukhalira ŵakugomezgeka ŵakukolerana na [Wapacanya Nkhanira], kucemera ŵanthu ku maji gha umoyo, ŵakuti, ‘Zanga.’ Awo ŵakukhumba urunji na unenesko ndiwo ŵakucemeka sono.” Nakuti ŵa mu gulu la mwali ŵacali kucemera ŵanthu ku maji gha umoyo.
“Waliyose Uyo Wakupulika Wati: ‘Zanga!’”
9, 10. Kasi awo ŵapulika nchemo yakuti ŵize ŵakupempheka kucitaci?
9 Wuli awo ŵakupulika nchemo yakuti ‘ŵize’? Nawo ŵakupempheka kuzgora kuti, “Zanga!” Mwaciyelezgero, Gongwe la Mulinda la Cingelezi la Ogasiti 1, 1932, likati: “Ŵakuphakazgika ŵakhuŵilizgenge wose awo ŵakukhumba kupharazga makani ghawemi gha ufumu. Ŵanthu aŵa ŵakukhumbikwira kuŵa dankha ŵakuphakazgika ŵa Fumu yayi kuti ŵapharazgenge uthenga wa Fumu. Nchakukhozga comene ku Ŵakaboni ŵa Yehova kumanya kuti sono mbakuzomerezgeka kutora maji gha umoyo na kupako ŵanthu awo ŵangazakapona pa Haramagedoni na kuzakakhala pa caru capasi kwamuyirayira.”
10 Pakuyowoya za mulimo wa kucemerako ŵanji, uwo awo ŵapulika nchemo iyi ŵali nawo, Gongwe la Mulinda la Cingelezi la Ogasiti 15, 1934, peji 249, likati: “Ŵa gulu la Jonadabu ŵakwenera kukolerana na ŵa gulu la Yehu panji kuti ŵakuphakazgika na kupharazgira lumoza uthenga wa ufumu nangauli mbakaboni ŵa Yehova ŵambura kuphakazgika.” Mu cilimika ca 1935, “mzinda ukuru” uwo ukuzunurika pa Uvumbuzi 7:9-17 ukamanyikwa makora. Mulimo wa kucemera ŵanthu ku maji gha umoyo ukamba kwenda makora cifukwa cakuti mzinda ukuru ukamanyikwa. Kufuma pa nyengo iyo, wumba ukuru wa ŵasopi ŵaunenesko wazomera nchemo iyi, ndipo pasono ukujumpha 7 miliyoni. Pamasinda pa kupulika nchemo, ŵajipatulira kwa Ciuta, ŵabapatizika na kukolerana na gulu la mwali pakucita mulimo wa kucemera ŵanji kuti ‘ŵize kuzakamwa maji gha umoyo kwawanangwa.’
“Mzimu” Ukuti, “Zanga!”
11. Kasi mzimu utuŵa ukawovwira wuli pa mulimo wa kupharazga mu nyengo ya ŵapositole?
11 Apo wakapharazganga mu sunagoge ku Nazarete, Yesu wakajura mpukutu wa Yesaya na kuŵazga apo pakalembeka kuti: “Mzimu wa Yehova uli pa ine, cifukwa wali kuniphakazga kuti nipharazge makani ghawemi ku ŵakavu, wali kunituma kupharazga kufwatuka kwa ŵamikoli na kuwonaso kwa ŵacibulumutira, kufwatura ŵakuyuzgika, kupharazga cilimika cakuzomerezgeka ca Yehova.” Wati wamara kuŵazga, wakalongora kuti mazgu agha ghakafiskika pa iyo, wakati: “Muhanya uno lemba ilo mwapulika lafiskika.” (Luka 4:17-21) Pambere wandakwelere kucanya, Yesu wakaphalira ŵasambiri ŵake kuti: “Muzamupokera nkhongono para mzimu utuŵa wiza pa imwe, ndipo muzamuŵa ŵakaboni ŵane . . . ku vigaŵa vyakutali comene vya caru capasi.” (Mil. 1:8) Mu nyengo ya ŵapositole, mzimu utuŵa ukawovwira comene pa mulimo wa kupharazga.
12. Kasi mzimu wa Ciuta ukovwira wuli mazuŵa ghano pa mulimo wa kucemera ŵanthu ku maji gha umoyo?
12 Kasi mzimu utuŵa ukovwira wuli pa mulimo wa kucemera ŵanthu ku maji gha umoyo mazuŵa ghano? Yehova ndiyo ni Jando la mzimu utuŵa. Kwizira mwa mzimu wake, wakovwira gulu la mwali kupulikiska Mazgu ghake, agho ni Baibolo. Mzimu uwu, ukuŵaciska kuti ŵacemereko ŵanji ku maji gha umoyo na kulongosora Malemba ku awo ŵakulindilira kuzakakhala kwamuyirayira mu Paradiso pa caru capasi. Wuli awo ŵazomera nchemo, kuŵa ŵasambiri ŵa Yesu Khristu na kucemerako ŵanyawo? Nawo mzimu ukuŵawovwira. Pakuti ŵali kubapatizika ‘mu zina la mzimu utuŵa,’ ŵakukolerana nawo ndipo ŵakuthemba mzimu uwu kuti uŵawovwirenge. (Mat. 28:19) Ghanaghaniraniso uthenga uwo ukupharazgika na Ŵakhristu ŵakuphakazgika ndiposo ŵa mzinda ukuru. Ukufuma mu Baibolo, ilo lili kulembeka mwakukhuŵilizgika na mzimu wa Ciuta. Ntheura, mzimu utuŵa ukovwira pa mulimo wa kucemera ŵanthu ku maji gha umoyo. Nakuti nase tikulongozgeka na mzimu weneuwu. Kasi tikwenera kumalira nyengo yitali wuli pa mulimo wa kucemera ŵanthu ku maji gha umoyo?
“Ŵakulutilira Kuyowoya Kuti: ‘Zanga!’”
13. Kasi mazgu ghakuti “mzimu na mwali ŵakulutilira kuyowoya kuti: ‘Zanga!’” ghakung’anamuraci?
13 “Mzimu na mwali” kuti ŵakucema ŵanthu kamoza pera yayi kuti “Zanga!” Mazgu Ghacigiriki agho pafuma mazgu agha, ghakulongora kuti mulimo wa kucemera ŵanthu ku maji gha umoyo ukucitika mwakulutilira. Pakughanaghanira fundo iyi, Baibolo la Malemba Ghakupatulika mu Mang’anamuliro gha Caru Ciphya, lili kung’anamura mazgu agha kuti: “Mzimu na mwali ŵakulutilira kuyowoya kuti: ‘Zanga!’” Fundo iyi yikulongora kuti Ciuta wacali kucemera ŵanthu ku maji gha umoyo. Wuli awo ŵakupulika na kuzomera nchemo iyi? Nawo ŵakuti, “Zanga!” Mzinda ukuru wa ŵasopi ŵaunenesko ukuyowoyeka kuti ‘ukucita uteŵeti wakupatulika muhanya na usiku mu tempele la Yehova.’ (Uvu. 7:9, 15) Kasi ukuteŵetera ‘muhanya na usiku’ mu nthowa wuli? (Ŵazgani Luka 2:36, 37; Milimo 20:31; 2 Ŵatesalonika 3:8.) Nkhani ya nchimi yanakazi, Ana ndiposo ya Paulosi zikulongora kuti mazgu ghakuti ‘muhanya na usiku’ ghakung’anamura kuteŵetera nyengo na nyengo ndiposo kufwilirapo mu uteŵeti.
14, 15. Kasi Daniyeli wakalongora wuli kuti kusopa Yehova lutaluta nkhwakuzirwa?
14 Nchimi Daniyeli nayo yikalongora kuzirwa kwa kusopa nyengo zose. (Ŵazgani Daniel 6:4-10, 16.) Yikaleka yayi kulomba kwa Ciuta ‘katatu pa zuŵa umo yikacitiranga kale,’ yikacita nthena kwa mwezi wose, nangauli yikamanyanga kuti ŵangayiponya mu cizenje ca nkhalamu cifukwa ca kulomba. Ŵanthu awo ŵakayiwonanga yikulomba ŵakamanya kuti kusopa Yehova lutaluta nkhwakuzirwa comene.—Mat. 5:16.
15 Daniyeli wati wakhala mu cizenje ca nkhalamu usiku umoza, themba likacelera kukamuwona ndipo likati lafika likacemerezga kuti: “We Daniel, muteŵeti wa Ciuta wamoyo, kasi Ciuta wako, uyo ukumuteŵetera lutaluta, waŵa na mazaza kukuthaska ku zinkhalamu?” Daniyeli wakazgora, wakati: “We themba, ughume kwamuyirayira! Ciuta wane watuma mungelo wake, ndipo wajara milomo ya nkhalamu, zilije kundipweteka, pakuti nkhasangika wambura mulandu pamaso pake; ndiposo pamaso pako, wa themba, ndilije kucita kaheni.” Yehova wakamutumbika Daniyeli cifukwa ca kumuteŵetera “lutaluta.”—Dan. 6:19-22.
16. Kasi tikwenera kujifumba mafumbo wuli ghakukhwaskana na umo tikucitira mu uteŵeti, para tikughanaghanira za ciyelezgero ca Daniyeli?
16 Daniyeli wakawona kuti cikaŵa ciwemi kufwa kuluska kuleka kusopa Yehova lutaluta. Ise ke? Kasi nase tikujinora vinthu vinyake mwakuti tipharazgenge makani ghawemi gha Ufumu wa Ciuta lutaluta? Mwezi ungamalanga yayi kwambura kuphalirako ŵanji za Yehova. Usange tingafiska, kasi cingaŵa cakwenelera yayi kuti tipharagenge sabata yiliyose? Nangauli tingapharazga kwa maminiti 15 pera cifukwa ca ucekuru panji ulwari, tikwenera kupeleka lipoti. Cifukwa wuli? Cifukwa tikukhumba kulutilira kuyowoya kuti “Zanga!” mwakukolerana na mzimu ndiposo mwali. Tikukhumba kuyezgayezga kuti tipharazgenge lutaluta.
17. Ni mipata wuli ya kapharazgiro iyo yikwenera kutijumpha yayi?
17 Nyengo zose tikwenera kucemera ŵanthu ku maji gha umoyo, kuti pa nyengo yakupharazgira, iyo yili kuŵikika pera yayi. Tingacema ŵanthu kuti “watore maji gha umoyo kwawanangwa” para tikuluta ku msika, ku sukulu, para tili paulendo, pa holide ndiposo ku nchito. Nanga ni para ŵamazaza ŵakanizga mulimo withu wa kupharazga, tikulutilira kupharazga mwakucenjera. M’malo mwa kupharazga nyumba yiliyose, tikupharazgira nyumba zicoko waka na kuluta ku cigaŵa cinyake, panji kulimbikira upharazgi wa mwamwaŵi.
Lutilirani Kuyowoya Kuti, “Zanga!”
18, 19. Kasi mukulongora wuli kuti mukuzirwiska mwaŵi wa kuŵa ŵanchito ŵanyake na Ciuta?
18 Kwa vilimika vyakujumpha 90, mzimu na mwali ŵalutilira kuyowoya kuti, “Zanga!” kwa waliyose uyo wali na nyota ya maji gha umoyo. Kasi namwe mwapulika nchemo yakukondweska iyi? Ipo namwe mukuciskika kuti mucemereko ŵanji.
19 Tikumanya yayi apo Yehova walekerenge kucemera ŵanthu ku maji gha umoyo, kweni para nase tikucemerako ŵanji ndikuti tili ŵanchito ŵanyake na Ciuta. (1 Kor. 3:6, 9) Uwu ni mwaŵi ukuru comene. Mphanyi talongora kuti tikuzirwiska mwaŵi uwu na ‘kupeleka kwa Ciuta sembe ya malumbo nyengo zose’ mwa kupharazga lutaluta. (Heb. 13:15) Tose ise tikulindilira kuzakakhala pa caru capasi, pamoza na gulu la mwali tilutilire kucemera ŵanthu ku maji gha umoyo mwa kuyowoya kuti “Zanga!” Mphanyi ŵanandi ‘ŵatora maji gha umoyo kwawanangwa!’
Kasi Mwasambiraci?
• Kasi nchemo yakuti, “Zanga!” yapelekeka kwa njani?
• Cifukwa wuli tingayowoya kuti Yehova ndiyo wakucema ŵanthu kuti ŵazakatore maji gha umoyo?
• Kasi mzimu ukovwira wuli pa mulimo wa kucemera ŵanthu ku maji gha umoyo?
• Cifukwa wuli tikwenera kuyezgayezga kuti tipharazgenge nyengo zose?
[Chati/Vithuzithuzi pa peji 16]
(Mu magazini yakusindikizga ndimo vikuwoneka makora)
Lutilirani Kuyowoya Kuti, “Zanga!”
1914
Ŵapharazgi 5,100
1918
Ŵanandi ŵazamukhala mu Paradiso pa caru capasi
1922
“Pharazgani, pharazgani, pharazgani, Fumu na ufumu wake”
1929
Nchemo yakuti, “Zanga!” nja ŵakuphakazgika pera yayi
1932
Ŵakuphakazgika awo ŵacali pa caru capasi ŵakuyowoya kuti, “Zanga!”
1934
Ŵa gulu la Jonadabu ŵakapempheka kuti ŵapharazgenge
1935
“Mzinda” ukuru ukamanyikwa
2009
Ŵapharazgi 7,313,173