‘Khumbo la Ciuta Licitike’
1. Kasi mutu wa ungano wapadera uwo wambenge mu cilimika ca uteŵeti ca 2012 ngwakuti wuli, ndipo cifukwa wuli ngwakuzirwa?
1 Tili kulengeka cifukwa ca khumbo la Yehova. (Uvu. 4:11) Ntheura vingacitika yayi kuti ticite vinthu mwakuyana na cilato ico wakatilengera kwambura kuti tasambira khumbo la Ciuta na kulicita. Nchipusu yayi kucita nthena, cifukwa tikulimbana na makhumbiro gha mtima withu ghakuti ticite ‘vinthu ivyo thupi likukhumba ndiposo ivyo maghanoghano’ ghakukhumba, panji kuti ticitenge “makhumbiro gha mitundu.” (Efe. 2:3; 1 Pet. 4:3; 2 Pet. 2:10) Kwambura wovwiri wa Ciuta, nchipusu kuti ‘Dyabulosi watikore ŵamoyo mwakuti ticite khumbo la iyo yura.’ (2 Tim. 2:26) Ungano withu wapadera wa cilimika ca uteŵeti ca 2012 uzamutovwira kuti ticitenge vinthu mwakukolerana na fundo yacitatu mu lurombo lwa Yesu, yakuti, “khumbo linu licitike.”—Mat. 6:9, 10.
2. Kasi ni mafumbo wuli agho ghamuzgoreka ku ungano?
2 Mafumbo Agho Ghamuzgoreka: Pakutegherezga ungano, mukakhazge comene mazgoro gha mafumbo agha: Kasi nchinthu wuli cakuzirwa ico tikwenera kucita padera pa kutegherezga Mazgu gha Ciuta? Kasi tingamanya wuli ivyo Ciuta wakukhumba kuti ticitenge? Cifukwa wuli tikwenera kuŵa na mtima wakovwira ŵanthu ŵakupambanapambana? Kasi tingacita wuli kuti tiŵe ŵakukhorwa mu umoyo withu? Ŵawukirano, kasi mungacita wuli kuti mukondweske Yehova? Kasi tikutumbikika wuli para tikucita khumbo la Ciuta? Cifukwa wuli tikwenera kucitapo kanthu mwaluŵiro kuti tikhozge ŵanji?
3. Kasi tingasanga wuli candulo na ungano wapadera uwu?
3 Woneseskani kuti muzakalute ku ungano na kutegherezga comene. Pa ungano uwu pakwenera kuti pazamuŵa mbali wakwimira Beteli panji mulaŵiliri wakwendakwenda, ndipo nkhani zinyake wazamuyowoya ndiyo. Fwatukani kuyowoya na mbali uyu kweniso muwoli wake pambere ungano undambe, panji para wamara. Para mwawelera ku nyumba, mungaŵanga ‘ŵakupulika na ciluwa cara.’ Pamoza na mbumba yinu, weleranimo fundo izo mukapulika ku ungano, na kudumbiskana umo zingamovwilirani kuti mucite khumbo la Ciuta mwakukwana.—Yak. 1:25.
4. Cifukwa wuli kucita khumbo la Ciuta ndico cikwenera kuŵa cinthu cakuzirwa pa umoyo withu?
4 Sonosono apa, wose awo ŵakucita makhumbiro ghawo ndipo ŵakukana kujilambika ku khumbo la Yehova, ŵaparanyikenge. (1 Yoh. 2:17) Ntheura tikuwonga Yehova cifukwa watinozgera ungano uwu, ndipo uzamutovwira kuti kucita khumbo la Ciuta ndico ciŵe cinthu cakuzirwa pa umoyo withu!