Tizamwamba Kucemera Ŵanthu ku Cikumbusko pa Malici 1
1. Kasi tambenge pawuli kucemera ŵanthu ku Cikumbusko, ndipo cifukwa wuli caka cino tigaŵirenge tumapepara utu kwa nyengo yitaliko?
1 Tizamwamba kugaŵira tumapepara twakucemera ŵanthu ku Cikumbusko pa Cinkhondi, Malici 1. Pakuti Cikumbusko cizamuŵako pa Malici 26, tizamuŵa na nyengo yitaliko yakucemera ŵanthu kuluska kumasinda uku. Ici cizamutipa mpata wakuti ticeme ŵanthu ŵanandi, comenecomene mipingo iyo yili na cigaŵa cikuru.
2. Kasi ŵalara ŵazamunozga ndondomeko wuli kuti mpingo umalizge cigaŵa cake na umo ŵapharazgi ŵazamusangira tumapepara twakucemera ŵanthu?
2 Kunozgekera: Ŵalara ŵazamumuphalirani umo muzamucitira kuti muzakamalizge cigaŵa cinu, kweniso usange mungazakaleka tumapepara pa nyumba izo mundasangepo ŵanthu. Para mwamara kugaŵira kunyumba na nyumba, tumapepara uto tuzamukhalako muzamugawiranga mu nthowa na kulikose uko kukusangika ŵanthu ŵanandi. Mulaŵiliri wa uteŵeti wazamuwoneseska kuti tumapepara utu twaŵikika pa malo apo ŵabali ŵakutolera mabuku na magazini. Kweni kuŵikapo tose pa nyengo yimoza yayi. Tizamutoranga twekha uto tingakwaniska kugaŵira sabata iyo.
3. Kasi tikwenera kukumbuka vici para tikugaŵira tumapepara twakucemera ŵanthu ku Cikumbusko?
3 Kasi Tizamuyowoya Vici? Nchiwemi kuyowoya mwakudumura kuti tizakagaŵire ŵanthu ŵanandi. Pa peji 4 pali sacizgo la ivyo tingayowoya pakugaŵira. Tingasintha kuyana na cigaŵa cithu. Kweni tingakhaliska panyumba ya munthu usange ngwakunweka panji wali na mafumbo. Para mukugaŵira tumapepara utu pa Cisulo na pa Sabata, mungagaŵiraso magazini para nchakwenelera. Pa Malici 2, tizamugaŵira tumapepara m’malo mwa kwambiska masambiro gha Baibolo umo tikucitira nyengo zose pa Cisulo cakwamba ca mwezi.
4. Cifukwa wuli tikwenera kuzakagaŵira mwamwamphu tumapepara twakucemera ŵanthu ku Cikumbusko?
4 Tikugomezga kuti ŵanthu ŵanandi ŵazamwiza ku Cikumbusko. Nkhani iyo yizamuyowoyeka yizamutovwira kuti timumanye makora Yesu. (1 Kor. 11:26) Yizamulongosora umo nyifwa yake yikutovwilira. (Rom. 6:23) Kweniso yizamulongosora cifukwa ico tikwenera kumukumbukira. (Yoh. 17:3) Ipo tizakagaŵire mwamwamphu tumapepara utu!
[Bokosi papeji 4]
Ivyo tingayowoya Pakucemera Ŵanthu ku Cikumbusko
“Monire. Tikukhumba kumupani kapepara aka kakumucemerani ku ungano wakuzirwa comene uwo ukucitika caka cilicose. Caka cino, ungano uwu uzamucitika pa Malici 26. Ni ungano wakukumbukira nyifwa ya Yesu. Kwamuŵa nkhani ya mu Baibolo yakulongosora umo nyifwa yake yikutovwilira. Pa kapepara aka talembapo malo na nyengo iyo ungano uwu uzamucitikira mu cigaŵa cithu.”